ରାଜ ଦରବାରରେ ରାଜବୀର! ୧୬ କୋଟି ପାଇଁ ବାଜିରେ ଜୀବନ, ହାତରେ ମାତ୍ର ୨ ମାସ

ନୂଆଦିଲ୍ଲୀ: କେଉଁଠି ଅଛି ଅଯୋଧ୍ୟା? କେଉଁଠି ଅଛି ରାମରାଜ୍ୟ? କେଉଁଠି ଅଛନ୍ତି ପ୍ରଜାବତ୍ସଳ, ପୁରୁଷତ୍ତୋମ ରାଜା ରାମଚନ୍ଦ୍ର? ନିଜ ରାଜ୍ୟରେ ପାଇଲେନି ବୋଲି ଜଣେ ୧୯ ମାସର ଶିଶୁକୁ ଧରି ବାପା-ମାଆ ରାମଚନ୍ଦ୍ରଙ୍କୁ ଖୋଜିବାକୁ ଓଡ଼ିଶାର କନ୍ଧମାଳରୁ ଜାତୀୟ ରାଜଧାନୀ ଦିଲ୍ଲୀରେ ଆସିଛନ୍ତି। ପ୍ରଜାବତ୍ସଳ ରାଜାଙ୍କୁ ଭେଟିବାକୁ, ତାଙ୍କ ରୋଗୀଣା ପିଲାର ପ୍ରାଣଭିକ୍ଷା ମାଗିବାକୁ ପିଲ୍ଲିରୁ ଦିଲ୍ଲୀ ପହଞ୍ଚିଛନ୍ତି। ଭୁବନେଶ୍ୱରରେ ଓଡ଼ିଶାର ମଉଜମଣୀଙ୍କ ଦର୍ଶନ ମିଳିଲାନାହିଁ। ଶେରେ ବାଧ୍ୟ ହୋଇ ଦିଲ୍ଲୀ ଦରବାରକୁ ଛୁଟି ଆସିଛନ୍ତି। ଦିଲ୍ଲୀରେ କାଳେ ତାଙ୍କ ମନସ୍କାମନା ପୂରଣ ହେବ, ଆଉ ପୁଅ ପାଇଁ ସେମାନଙ୍କ ପ୍ରାର୍ଥନା ଏହି ଦରବାରର ରାଜାଙ୍କ କାନରେ ପଡ଼ିବ। ହେଲେ ଏଯାଏଁ ତ ତାହା ହୋଇପାରିନାହିଁ। ଆପଣମାନେ ଚାହିଁଲେ କିନ୍ତୁ ବିନ୍ଦୁ ବିନ୍ଦୁ, ସିନ୍ଧୁ ହେଲା ପରି କିଛି ସାହାଯ୍ୟ କରି ତାଙ୍କର ସେହି କୋମଳମତି ଶିଶୁର ଜୀବନ ବଞ୍ଚାଇପାରିବେ। ସେଥିପାଇଁ ଏବେ ସେମାନେ ସମସ୍ତଙ୍କୁ ନେହୁରା ହେଉଛନ୍ତି।

'ମାଆ ମୁଁ ବଞ୍ଚିବି। ତୋ କୋଳରେ ମୁଣ୍ଡ ଥୋଇବି। ତୋ ପଣତରେ ମୁହଁ ପୋଛିବି। ତୋ ହାତ ଧରି ବାଟ ଚାଲିବି। ହସିବି, କାନ୍ଦିବି, ଖେଳିବି, ବୁଲିବି। ଦୁନିଆ ଦେଖିବି।' ପାଟି ଖୋଲି ସିନା କହୁନାହିଁ ହେଲେ କୁନିକୁନି ଆଖିରେ, ଖିଲିଖିଲି ହସ ପଛରେ ଲୁଚିଥିବା ଯନ୍ତ୍ରଣାର ଭାଷାରେ ନିଜ ମାଆକୁ ୧୯ ମାସର ଏହି କଅଁଳ ଛୁଆ କହୁଛି। ଭଲମନ୍ଦ ଭିତରେ ଦୂରତା କେତେ, ଦୁନିଆଦାରୀ କାହାକୁ କହନ୍ତି। ଏସବୁ ବୁଝିବା ଆଗରୁ ବିଧାତା ତା ଭାଗ୍ୟ ଆକାଶରେ ନେଇ ଆସିଛି କଳାବଉଦ। ଦୁରାରୋଗ୍ୟ ସ୍ପାଇନାଲ୍ ମସ୍କୁଲାର୍ ଆଟ୍ରୋଫି ବା SMA ରୋଗରେ ପୀଡ଼ିତ କନ୍ଧମାଳ ଆମ୍ବପଡ଼ା ଗାଁର ଏହି ପିଲା ରାଜବୀର ରଣା। ମେରୁଦଣ୍ଡରେ ସମସ୍ୟା ଯୋଗୁଁ ଛିଡ଼ାହୋଇ ପାରୁନାହିଁ କି ବସି ପାରୁନାହିଁ। ଚିକିତ୍ସା ପାଇଁ ଜୋଲଗେନସ୍ମା ଇଞ୍ଜେକସନ୍ ଦରକାର। ଏହାର ଦାମ ଲକ୍ଷେ କି ଦୁଇ ଲକ୍ଷ ନୁହେଁ  ୧୬ କୋଟି ଟଙ୍କା। ପୁଅର ଏମିତି ଅବସ୍ଥା ଦେଖି କଉ ବାପା-ମାଆ ବି କେମିତି ଧର୍ଯ୍ୟ ଧରିବେ। 

Also Read: ସରକାରଙ୍କ ପାଖରେ ନାହିଁ ୧୬ କୋଟି? ସୋନୁଙ୍କ ଶରଣ ପଶିଲେ ରାଜବୀର

ସେଦିନ ସିନା ଶ୍ରବଣ କୁମାର କାନ୍ଧରେ ବାପା-ମାଆଙ୍କୁ ବହିଥିଲା। ହେଲେ ୧୯ ମାସର ରାଜବୀରକୁ କାନ୍ଧରେ ପକାଇ ଆ'ଦୁଆରରୁ ତା'ଦୁଆର, ଏସହରରୁ ସେସହରକୁ ବାୟା ହୋଇ ବାପା କୁଳମଣି ରଣା ଓ ମାଆ ତମଲିକା ଘୁରି ବୁଲୁଛନ୍ତି। ପ୍ରଥମେ ଭୁବନେଶ୍ୱରର କ୍ୟାପିଟାଲ ହସ୍ପିଟାଲରେ ପୁଅକୁ ଭର୍ତ୍ତି କରିଥିଲେ। ପରେ ସାହାଯ୍ୟ ପାଇଁ ନବୀନ ନିବାସ ଯାଇଥିଲେ, ହେଲେ ପୋଲିସ ଘଉଡ଼େଇ ଦେଲା। ମାଡ଼ ତ ମାରିଲାନି ବରଂ ନାଚ, ଗୀତ, ସାଜସଜ୍ଜା, ବାଜା ବଜାଇ ସରକାର ସ୍ୱାସ୍ଥ୍ୟକାର୍ଡ ନାଁରେ ଯେଉଁ ସହାୟତା ବାଣ୍ଟୁଛନ୍ତି, ତାର ମୁଖା ମଧ୍ୟ ଖୋଲିଦେଲା। କେଉଁଆଡ଼ୁ ସାହାଯ୍ୟ ନପାଇ ଶେଷରେ କୁଳମଣି ଓ ତମଲିକା, ମୁମ୍ୱାଇରେ ଅଭିନେତା ସୋନୁ ସୁଦଙ୍କୁ ଭେଟିଥିଲେ। ଯେଉଁଠି ରାଜବୀରଙ୍କୁ ସାହାଯ୍ୟ କରିବା ପାଇଁ ଦେଶବାସୀଙ୍କୁ ସୋନୁ ଅପିଲ କରିଥିଲେ। ଏବେ ପୁଅକୁ ଧରି ସେମାନେ ଦିଲ୍ଲୀ ଦରବାରରେ ପହଞ୍ଚିଛନ୍ତି। ପ୍ରଧାନମନ୍ତ୍ରୀଙ୍କୁ ଭେଟି ପୁଅର ଜୀବନ ଭିକ୍ଷା ମାଗିବାର ପ୍ରୟାସ କରୁଛନ୍ତି। ତେଣୁ ଏଭଳି ସମୟରେ ଜୀ ଓଡ଼ିଶା ବି ସେମାନଙ୍କ ଦୁଃଖରେ ଛିଡ଼ା ହେବାର ପ୍ରୟାସ କରିଛି। 

ଆପଣମାନେ ମଧ୍ୟ ରାଜବୀରଙ୍କୁ ସାହାଯ୍ୟ କରିପାରିବେ

ନାମ: ରାଜବୀର ରଣା
ଆକାଉଣ୍ଟ ନମ୍ୱର: 90922555912074
IFSC କୋଡ୍ : IDFB0020101
UPI Transaction: assist.rajveer@icici

ଆପଣମାନେ ଚାହିଁଲେ 6360371595 ନମ୍ୱରରେ ଫୋନ୍ ପେ କିମ୍ୱା ଗୁଗୁଲ ପେ ମଧ୍ୟ କରିପାରିବେ। ବିନ୍ଦୁ ବିନ୍ଦୁ ହୋଇ ସିନ୍ଧୁ ହୁଏ। ଆପଣମାନଙ୍କ ଅଳ୍ପ ସାହାଯ୍ୟ ମଧ୍ୟ ଏହି ଛୋଟ ପିଲାର ଜୀବନ ବଞ୍ଚାଇବାରେ ସହାୟକ ହେବ। ଆଉ ତା ବାପାମାଆଙ୍କ ଜୀବନରେ ଯେଉଁ ଦୁଃଖର କଳାବଉଦ ଘୋଟି ଆସିଛି, ସେସବୁ ମଧ୍ୟ ଦୂରେଇ ଦେବ।