ଦୁଇ ଗଞ୍ଜେଇ ଚୋରାଚାଲାଣକାରୀ ଗିରଫ, ଗାଡ଼ି ସହ ଲକ୍ଷାଧିକ ଟଙ୍କାର ଗଞ୍ଜେଇ ଜବତ

ଗଜପତି: ଗଜପତି ଜିଲ୍ଲାରେ ବଢୁଛି ଗଞ୍ଜେଇ ମାଫିଆଙ୍କ ରାଜୁତି। ଦିନକୁ ଦିନ ଜିଲ୍ଲାରେ ବଢୁଛି ଗଞ୍ଜେଇ ଚୋରାଚାଲାଣର ମାତ୍ରା। ମୋହନା ଅଞ୍ଚଳରେ ଗଞ୍ଜେଇ ମାଫିଆଙ୍କ ଆଡ୍ଡାସ୍ଥଳୀ ପାଲଟିଛି। ତେବେ ପୋଲିସର ତୁରନ୍ତ ପଦକ୍ଷେପ ଫଳରେ ଜିଲ୍ଲାରେ ନିୟମିତ ବ୍ୟବଧାନରେ ଗଞ୍ଜେଇ ଚୋରାଚାଲାଣକାରୀ ଧରାପଡ଼ୁଛନ୍ତି। 

ଗତକାଲି ଏକ ଦାମୀ ହୋଣ୍ଡା କାରରେ ୫୩ କିଲୋ ଗଞ୍ଜେଇକୁ ଜବତ କରିବା ସହିତ ଦୁଇ ଜଣଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିବା ବେଳେ ଆଜି ପୁଣି ବିପୁଳ ପରିମାଣର ଗଞ୍ଜେଇ ସହ ବ୍ୟବହୃତ ବୋଲେରୋ ପିକଅପ ଭ୍ୟାନକୁ ଜବତ କରିଛି ପୋଲିସ। ଏଥିରେ ମଧ୍ୟ ଦୁଇ ଜଣଙ୍କୁ ଗିରଫ କରିଛି ଯାଇଥିବା ପୋଲିସ ପକ୍ଷରୁ ସୂଚନା ମିଳିଛି । ପୋଲିସର ସୂଚନା ମୁତାବକ ଗଜପତି ନୂତନ ଏସପିଙ୍କ ନିର୍ଦ୍ଦେଶ କ୍ରମେ ଆର ଉଦୟଗିରି ଏସଡିପିଓ ଓ ମୋହନା ଥାନାଧିକାରୀ ସୁଜିତ ନାୟକଙ୍କ ତତ୍ତ୍ୱାବଧାନରେ ଗତକାଲି ମୋହନାର ବିଭିନ୍ନ ସ୍ଥାନରେ ପୋଲିସର ପେଟ୍ରୋଲିଂ ଚାଲିଥିଲା। 

ଦିନ ସାଢେ୧୧ଘଣ୍ଟ ସମୟରେ ରାଣିଖମା ଓ ବାଲିପଙ୍କ ରାସ୍ତା ଦେଇ ଚାନ୍ଦିପୁଟ ଅଭିମୁଖେ ଏକ ବୋଲେରୋ ପିକଅପ ଗାଡ଼ି OD04 N3579 ଯାଉଥିବା ବେଳେ ପୋଲିସ ଯାଞ୍ଚ କରିଥିଲା। ଯାଞ୍ଚ ବେଳେ ୩୮ ବସ୍ତା ପ୍ଲାଷ୍ଟିକ ବ୍ୟାଗ ଯାହାର ଓଜନ ୧୨୩୫କେଜି ଗଞ୍ଜେଇ ରହିଥିବା ଜଣାପଡିଥିଲା । ଜବତ ଗଞ୍ଜେଇର ଆନୁମାନିକ ମୂଲ୍ୟ ୫ ଲକ୍ଷ ହେବ ବୋଲି ଜଣାପଡିଛି । ତେବେ ଉକ୍ତ ଚୋରା ଚାଲାଣରେ ସମ୍ପୃକ୍ତ ଦୁଇଜଣଙ୍କୁ ଗିରଫ କରାଯାଇଛି। ଗିରଫ ଅଭିଯୁକ୍ତମାନେ ହେଲେ କଟକ ମହାଙ୍ଗା ଅଞ୍ଚଳ କୁଆପାଇ ଗ୍ରାମର ରବୀନ୍ଦ୍ର ନାଥ ଜେନା ଓ ଯାଜପୁର ବାଲିଚନ୍ଦ୍ରପୁର ଅଞ୍ଚଳର ପୂର୍ଣ୍ଣଚନ୍ଦ୍ର ବଳ । ଏମାନେ ଆଦିବାସୀ ଗାଁ ଗାଁ ବୁଲି ଗଞ୍ଜେଇ କିଣି ପୁରୀରେ ନେଇ ବିକ୍ରି କରୁଥିଲେ ।