୪ ମାସ ପୂର୍ବରୁ ବାହାଘର ହୋଇଥିଲା, ଏବେ ଝୁଲନ୍ତା ମୃତଦେହ ଉଦ୍ଧାର ହେଲା...

ମନୋରଞ୍ଜନ ମହାନ୍ତି, ଆଠଗଡ଼: ୪ ମାସ ପୂର୍ବରୁ ବାହାଘର ହୋଇଥିଲା । ଏବେ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର ହେଲା । ଆଠଗଡ଼ ଥାନା ତରଡ଼ିଙ୍ଗ ଗାଁରେ ଘଟିଛି ଏହି ଘଟଣା । ଯୌତୁକ ପାଇଁ ଶାଶୁ ଘର ଲୋକ ହତ୍ୟା କରି ଟାଙ୍ଗି ଦେଇଥିବା ଅଭିଯୋଗ ଆଣିଲେ ମୃତ ନବବଧୂଙ୍କ ବାପ ଘର ଲୋକ । ପୋଲିସ ମୃତଦେହ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଛି । ଘଟଣାସ୍ଥଳରେ ସାଇଣ୍ଟିଫିକ ଟିମ୍ ପହଞ୍ଚିଛନ୍ତି । ତେବେ ଏହା ହତ୍ୟା ନା ଆତ୍ମହତ୍ୟା, ସେ ଉପରୁ ପରଦା ହଟିନି । 

ସୂଚନା ମୁତାବକ, ପୁରା ଘଟଣା ଥିଲା ଏପରି । ଚମ୍ପାପୁର ଗାଁର ଛବି ରାଉତଙ୍କ ଝିଅ ରୂପଶ୍ରୀ ରାଉତ (ରିଙ୍କି) ଗତ ୪ ମାସ ପୂର୍ବରୁ ବିବାହ କରିଥିଲେ । ତରଡ଼ିଙ୍ଗ ଗାଁର ଗୌରାଙ୍ଗ ମହାନ୍ତିଙ୍କ ପୁଅ ପ୍ରକାଶ ମହାନ୍ତିଙ୍କ ସହ ତାଙ୍କର ବିବାହ ହୋଇଥିଲା । ଯାହା କୁହାଯାଉଛି, ଯୌତୁକ ନେଇ ରିଙ୍କିଙ୍କୁ କୁଆଡ଼େ ନିର୍ଯ୍ୟାତନା ଦେଉଥିଲେ ଶାଶୁ ଘର ଲୋକେ । ତେବେ ଗତକାଲି ରାତିରେ ମୃତ ରିଙ୍କି ଘର ଭିତରୁ କବାଟ ବନ୍ଦ କରିଦେଇଥିଲେ । ଏନେଇ ପୋଲିସ ଏବଂ ରିଙ୍କିଙ୍କ ବାପ ଘର ଲୋକଙ୍କୁ ଖବର ଦେଇଥିଲେ ପ୍ରକାଶଙ୍କ ପରିବାର । ଆଜି ସକାଳୁ ପୋଲିସ ଘର ଭିତରୁ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କରିଛି । ଶବ ବ୍ୟବଚ୍ଛେଦ ପାଇଁ ପଠାଯାଇଛି । ରିଙ୍କିଙ୍କ ଶାଶୁ ଘର ଲୋକେ ଏହାକୁ ଆତ୍ମହତ୍ୟା ବୋଲି କହିଛନ୍ତି । ଅନ୍ୟପଟେ ଝିଅକୁ ହତ୍ୟା କରି ଟାଙ୍ଗି ଦେଇଥିବା ଅଭିଯୋଗ କରିଛନ୍ତି ମୃତ ରିଙ୍କିଙ୍କ ବାପ ଘର ଲୋକ । ଏନେଇ ଥାନାରେ ଏତଲା ମଧ୍ୟ ଦିଆଯାଇଛି । 

କ'ଣ ଅଭିଯୋଗ କରିଛନ୍ତି ବାପ ଘର ଲୋକେ ? 

ଆଜି ଆଠଗଡ଼ ଥାନାରେ ମୃତ ରିଙ୍କିଙ୍କ ପିତା ଛବି ରାଉତ ଝିଅର ମୃତ୍ୟୁ ନେଇ ଥାନାରେ ଅଭିଯୋଗ କରିଛନ୍ତି । ଏହାକୁ ଏକ ହତ୍ୟା ଭାବରେ ସେ ଦର୍ଶାଇଛନ୍ତି । ଆଉ ଏନେଇ ପୁରା ଘଟଣା ଅଭିଯୋଗ ପତ୍ରରେ ଉଲ୍ଲେଖ କରିଛନ୍ତି । ତାଙ୍କ ଅଭିଯୋଗ ମୁତାବକ, ଝିଅର ବିବାହ ବେଳେ ଯୌତୁକ ବାବଦରେ ନଗଦ ୬୦ ହଜାର ଟଙ୍କା, ସୁନା ଚେନ, ମୁଦି, ଏବଂ ଅନ୍ୟାନ୍ୟ  ସାମଗ୍ରୀ ଦିଆଯାଇଥିଲା । ତେବେ ଏତିକିରେ ଶାଶୁ ଘର ଲୋକଙ୍କ ମନ ବୁଝିନଥିଲା । ଆଉ ଏକ ଲକ୍ଷ ଟଙ୍କା ପାଇଁ ବାରମ୍ବାର ରିଙ୍କିଙ୍କୁ ଶାରୀରିକ ଓ ମାନସିକ ନିର୍ଯ୍ୟାତନା ଦେଉଥିଲେ ଶାଶୁ ଘର ଲୋକେ । 

ଏଫଆଇଆର କପିରେ ସେ ଏକଥା ମଧ୍ୟ ଉଲ୍ଲେଖ କରିଛନ୍ତି ଯେ, ଝିଅକୁ ନିର୍ଯ୍ୟାତନ ଦେବା ସହ ବାପ ଘରେ ଆଣି ଛାଡ଼ି ଦେଇଥିଲେ ପ୍ରକାଶ(ମୃତ ରିଙ୍କଙ୍କ ସ୍ୱାମୀ)ଙ୍କ ପରିବାର । ତେବେ ପରବର୍ତ୍ତୀ ସମୟରେ ବୁଝାସୁଝା କରି ଝିଅକୁ ପୁଣି ଥରେ ଶାଶୁ ଘରକୁ ପଠାଯାଇଥିଲା । ତେବେ ଗତକାଲି ଝିଅକୁ ହତ୍ୟା କରି ଆତ୍ମହତ୍ୟାର ରୂପ ଦେବାକୁ ଟାଙ୍ଗି ଦେଇଥିବା କହିଛନ୍ତି ମୃତ ରିଙ୍କିଙ୍କ ବାପା ଛବି ରାଉତ । 

ତେବେ ଏହା ହତ୍ୟା ନା ଆତ୍ମହତ୍ୟା, ସେନେଇ ତଦନ୍ତ କରୁଛି ପୋଲିସ । ଯଦି ଏହା ଆତ୍ମହତ୍ୟା, ତେବେ କାହିଁକି ଆତ୍ମହତ୍ୟା କଲେ ରିଙ୍କି, ସେନେଇ ମଧ୍ୟ ତଦନ୍ତ କରାଯାଉଛି । ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ପ୍ରମାଣ ଯୋଗାଡ଼ କରୁଛନ୍ତି । ତେବେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଏହା ଉପରୁ ପରଦା ହଟିବ ବୋଲି ଆଶା କରାଯାଉଛି ।