ସିନେଜଗତରୁ ପୁଣି ଦୁଃଖଦ ଖବର, ଆଉ ନାହାନ୍ତି ଏହି ଅଭିନେତା

Bollywood News: ଆଜି ହୋଲି ପାଇଁ ସମଗ୍ର ଦେଶ ଉତ୍ସବମୁଖର ଥିବା ସମୟରେ ବଲିଉଡରୁ ଏକ ଅତ୍ୟନ୍ତ ଦୁଃଖଦ ଖବର ସାମ୍ନାକୁ ଆସିଛି। ପ୍ରସିଦ୍ଧ ଚଳଚ୍ଚିତ୍ର ନିର୍ମାତା ଆୟନ ମୁଖାର୍ଜୀଙ୍କ ପିତା ତଥା ବରିଷ୍ଠ ଅଭିନେତା ଦେବ ମୁଖାର୍ଜୀଙ୍କ ଦେହାନ୍ତ ହୋଇଯାଇଛି। ସେ ଆଜି (ମାର୍ଚ୍ଚ ୧୪) ଶୁକ୍ରବାର ଦିନ ୮୩ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଛନ୍ତି। ଦେବ ମୁଖାର୍ଜୀଙ୍କ ମୃତ୍ୟୁ ଖବର ଆସିବା ପରେ ବଲିଉଡରେ ଶୋକର ଛାୟା ଖେଳିଯାଇଛି।

ସୂଚନା ଅନୁସାରେ, ଦେବ ମୁଖାର୍ଜୀ ଦୀର୍ଘ ଦିନ ଧରି ଅସୁସ୍ଥ ଥିଲେ। ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା କରାଯାଉଥିଲା । କିନ୍ତୁ ଆଜି ସକାଳେ ସେ ଶେଷ ନିଶ୍ୱାସ ତ୍ୟାଗ କରିବା ସହ ସବୁଦିନ ପାଇଁ ଦୁନିଆରୁ ବିଦାୟ ନେଇଛନ୍ତି। ଦେବ ମୁଖାର୍ଜୀଙ୍କ ବିୟୋଗରେ ତାଙ୍କ ପରିବାର ସଦସ୍ୟମାନେ ଗଭୀର ମର୍ମାହତ ହୋଇଛନ୍ତି। ବଲିଉଡରେ ଶୋକାକୁଳ ପରିବେଶ ଦେଖିବାକୁ ମିଳିଛି । ଅନେକ ବଲିଉଡ କଳାକାର ଦେବଙ୍କ ଦେହାନ୍ତ ଖବର ଶୁଣି ଶୋକ ବ୍ୟକ୍ତ କରିଛନ୍ତି । ଖବର ମୁତାବକ, ଆଜି ମୁମ୍ବାଇର ଜୁହୁସ୍ଥିତ ପବନ ହଂସ ଶ୍ମଶାନରେ ଦେବ ମୁଖାର୍ଜୀଙ୍କ ଶେଷକୃତ୍ୟ ସମ୍ପନ୍ନ କରାହେବ। ଏହି ସମୟରେ ଶ୍ରଦ୍ଧାଞ୍ଜଳୀ ଦେବା ପାଇଁ ଅନେକ ବଡ଼ ବଡ଼ ବଲିଉଡ ସେଲିବ୍ରିଟି ଓ ବିଶେଷ ବ୍ୟକ୍ତିମାନେ ପହଞ୍ଚିପାରନ୍ତି।

Add Zee News as a Preferred Source

ଆପଣଙ୍କୁ କହିରଖୁଛୁ ଯେ, ଦେବ ମୁଖାର୍ଜୀଙ୍କର ଭାରତୀୟ ଚଳଚ୍ଚିତ୍ର ଶିଳ୍ପ ସହିତ ଗଭୀର ସମ୍ପର୍କ ରହିଛି। ଦେବ ମୁଖାର୍ଜୀ ଅଭିନେତା ଜୟ ମୁଖାର୍ଜୀ ଏବଂ ଚଳଚ୍ଚିତ୍ର ନିର୍ମାତା ସୋମୁ ମୁଖାର୍ଜୀଙ୍କ ସାନ ଭାଇ ଥିଲେ, ଯିଏ କାଜୋଲଙ୍କ ମାଆ ଏବଂ ଅଭିନେତ୍ରୀ ତନୁଜାଙ୍କୁ ବିବାହ କରିଥିଲେ। ଦେବ ମୁଖାର୍ଜୀ ବଲିଉଡ୍ ଅଭିନେତ୍ରୀ କାଜୋଲ ଏବଂ ତନିଷା ମୁଖାର୍ଜୀଙ୍କ ମାମୁଁ । ତାଙ୍କ ପୁଅ ଆୟନ ମୁଖାର୍ଜୀ ଜଣେ ପ୍ରସିଦ୍ଧ ନିର୍ଦ୍ଦେଶକ, ଯିଏ ୱେକ୍ ଅପ୍ ସିଡ୍, ୟେ ଜୱାନି ହୈ ଦିୱାନି ଏବଂ ବ୍ରହ୍ମାସ୍ତ୍ର ଭଳି ଫିଲ୍ମ ପାଇଁ ବେଶ ପ୍ରସିଦ୍ଧି ହାସଲ କରିଛନ୍ତି ।

ଏଥିସହ ଦେବ ମୁଖାର୍ଜୀ ବହୁ ବର୍ଷ ଧରି 'ଉତ୍ତର ବମ୍ବେ ସାର୍ବଜନୀନ ଦୁର୍ଗା ପୂଜା ମଣ୍ଡପ' ଆୟୋଜନ କରିଆସୁଥିଲେ । ଉକ୍ତ ପୂଜା ମଣ୍ଡପଟି ମୁମ୍ବାଇର ସବୁଠାରୁ ବଡ଼ ଦୁର୍ଗା ମହୋତ୍ସବ ଭାବରେ ବିବେଚନା କରାଯାଉଥିଲା। ଦେବଙ୍କ ଭାଣିଜୀ କାଜୋଲ ଏବଂ ତନିଷା ମୁଖାର୍ଜୀଙ୍କ ସହିତ ତାଙ୍କର ବିଶେଷ ସମ୍ପର୍କ ଦେଖିବାକୁ ମିଳିଥିଲା। ବହୁତ କମ୍ ଲୋକ ଏହା ଜାଣନ୍ତି ଯେ, ଦେବ ମୁଖାର୍ଜୀଙ୍କ ଝିଅ ସୁନୀତା ନିର୍ଦ୍ଦେଶକ ଆଶୁତୋଷ ଗୋୱାରିକରଙ୍କୁ ବିବାହ କରିଛନ୍ତି।

କେବଳ ସେତିକି ନୁହେଁ, ଦେବ ମୁଖାର୍ଜୀ ୬୦ ଏବଂ ୭୦ ଦଶକର ଜଣେ ପ୍ରସିଦ୍ଧ ଅଭିନେତା ଥିଲେ। ସେ ଅନେକ ଫିଲ୍ମରେ ଅଭିନୟ କରି ପ୍ରଶଂସକଙ୍କ ହୃଦୟ ଜିତିବାରେ ସଫଳ ହୋଇଥିଲେ । ଦେବ ମୁଖାର୍ଜୀ ତାଙ୍କ ଫିଲ୍ମ କ୍ୟାରିୟରରେ ତୁଳସୀ ତେରେ ଆଙ୍ଗନ କି, ଆସୂ ବନେ ଅଙ୍ଗରେ, ହୈୱାନ ଭଳି ଫିଲ୍ମରେ କାମ କରି ଲୋକପ୍ରିୟତା ହାସଲ କରିଥିଲେ।