'ଯମରାଜ'ଙ୍କୁ ବି ଡରାଉଛି କୋରୋନା !

ପ୍ରେମାନନ୍ଦ ପୂଜାରୀ, ମୋହନା: ଯମରାଜଙ୍କୁ ନେଇ ଆମ ସଭିଙ୍କ ଭିତରେ ଭୟ ଥାଏ । ଅବଶ୍ୟ ମୃତ୍ୟୁକୁ କାହାର ବା ଭୟ ରହିବ ନାହିଁ । ହେଲେ ଆମକୁ ମୃତ୍ୟୁର ରାସ୍ତାକୁ ନେଉଯାଉଥିବା କୋରୋନାକୁ ନେଇ ସତେଯେମିତି ଅନେକ ନଛୋଡବନ୍ଧା । କୋରୋନାକୁ ମାତ ଦେବା ପାଇଁ ସରକାର ଲକଡାଉନ୍ ଘୋଷଣା କରିଛନ୍ତି । ହେଲେ କିଛି ଲୋକ ଏହାକୁ ମାନୁନାହାଁନ୍ତି । ତେବେ ଏଭଳି ଅମାନିଆଙ୍କୁ କୋରୋନାର ବାସ୍ତବ ପ୍ରଭାବ ବୁଝାଇବା ପାଇଁ ଚେଷ୍ଠା କରିଛି ଗଜପତି ଜିଲ୍ଲା ପ୍ରଶାସନ । 

ଜିଲ୍ଲାର ବିଭିନ୍ନ ସ୍ଥାନରେ ବୁଲୁଛନ୍ତି 'ଯଜରାଜ ଓ ଚିତ୍ରଗୁପ୍ତ' । ପାଖରେ 'କୋରୋନା' ବି ରହିଛି । ପଥପ୍ରାନ୍ତ ନାଟକ ମାଧ୍ୟମରେ ଲୋକଙ୍କୁ ସଚେତନ କରୁଛନ୍ତି । କିପରି ଆମେ କୋରୋନାକୁ ମାତ୍ ଦେଇପାରିବା, ସେନେଇ ବୁଝାଉଛନ୍ତି । ତେବେ ଲୋକଙ୍କ ସାମ୍ନାରେ ଯେଉଁ ନାଟକ ଉପସ୍ଥାପନ ହେଉଛି, ତାହା ବେଶ୍ ଆକର୍ଷଣୀୟ ହୋଇଛି । କୋରୋନା ଭାଇରସକୁ ଯମରାଜ ବି ଡରୁଛନ୍ତି । ନିଜର ପାଖ ମାଡ଼ିବାକୁ ଦେଉନାହାଁନ୍ତି ଏହି କିଲର କୋରୋନାକୁ । ଭାଇରସ୍ ଠୁ ନିଜେ ଦୂରେଇ ରହୁଛନ୍ତି । 

ଏଭଳି କିଛି ନାଟକ ମାଧ୍ୟମରେ ଅନ୍ୟମାନେ ମଧ୍ୟ ସାମାଜିକ ଦୂରତ୍ୱ ଅବଲମ୍ବନ କରନ୍ତୁ ବୋଲି ବାର୍ତ୍ତା ଦିଆଯାଇଛି । ଯାହା ଲୋକଙ୍କ ମନ କିଣିଛି । ଜିଲ୍ଲା ପ୍ରଶାସନର ଏଭଳି ସଚେତନତାକୁ ବିଭିନ୍ନ ମହଲରେ ପ୍ରଶଂସା କରାଯାଉଛି । ଏଭଳି ଅଭିନୟ କରି ଲୋକଙ୍କୁ ସଚେତନ କରାଯାଇପାରିବ ବୋଲି କହିଛନ୍ତି ନାଟକରେ ଯମରାଜ ଓ ଚିତ୍ରଗୁପ୍ତର ଅଭିନୟ କରୁଥିବା ଅଭିନେତା । ଏହି କାର୍ଯ୍ୟକ୍ରମଟି ଗଜପତି ଏସପି ସାରା ଶର୍ମାଙ୍କ ନିର୍ଦ୍ଦେଶରେ ଚାଲୁଛି । ଆଗକୁ ବିଭିନ୍ନ ଗାଁରେ କରିବାକୁ ଲକ୍ଷ୍ୟ ରଖାଯାଇଥିବା କହିଛନ୍ତି ଆର ଉଦୟଗିରି ଏସଡିପିଓ ଅଶୋକ ମହାନ୍ତି I