ଆଇନର ହେଉଛି ଖୋଲା ଉଲଂଘନ, ଗଳି କନ୍ଧିରେ କଟା ହେଉଛନ୍ତି ଛେଳି-କୁକୁଡା

ପାରଳାଖେମୁଣ୍ଡି(ସୁଜିତ୍ ବିଷୋୟୀ): ସହରାଞ୍ଚଳରେ ସାଧାରଣତଃ ମାଛ ମାଂସ ଆଦି ଦ୍ରବ୍ୟର ବିକ୍ରୟ ଲାଗି ବିଭିନ୍ନ ବ୍ୟବସ୍ଥା ଗ୍ରହଣ କରାଯାଇଥାଏ । କେତେକ ସ୍ଥାନରେ ସ୍ୱତନ୍ତ୍ର ଆମିଷ ବଜାର ମଧ୍ୟ ଖୋଲାଯାଇଥାଏ । ଏହି ବ୍ୟବସ୍ଥା କିଛି ଦିନ ପୂର୍ବେ ଭୁବନେଶ୍ୱରରେ ଆରମ୍ଭ କରାଯାଇଛି । ରାଜ୍ୟ ରାଜଧାନୀରେ 'ଦି ନନ୍ ଭେଜ୍ ୱାର୍ଲ୍ଡ' (The Non Veg World) ନାମକ ଏକ ସ୍ୱତନ୍ତ୍ର ଆମିଷ ବଜାର ଖୋଲାଯାଇଛି ।    

ହେଲେ ଗଜପତି ଜିଲ୍ଲାର ମୁଖ୍ୟାଳୟ ପାରଳାଖେମୁଣ୍ଡି ସହରରେ ଦେଖିବାକୁ ମିଳିଛି ଏହାର ବ୍ୟତିକ୍ରମ । ସହର ସାରା ଯେଉଁଠି ଦେଖିବ ସେଇଠି କୁକୁଡା ଓ ଛେଳି ମାଂସର ଦୋକାନ । ଶିକ୍ଷାନୁଷ୍ଠାନ, ଧର୍ମାନୁଷ୍ଠାନ, ଜନ ଗହଳିପୁର୍ଣ୍ଣ ରାସ୍ତା କଡରେ ଖୁଲାମଖୁଲା କଟାଯାଉଛି ଛେଳି ଓ କୁକୁଡା । ଆଇନର ଖୋଲା ଖୋଲି ଉଲଂଘନ ହେଉଥିବା ବେଳେ, ଏହା ଉପରେ ପଡି ନାହିଁ ପ୍ରଶାସନର ନଜର । ବିକ୍ରି ହେଉଥିବା ମାଂସର ନା ହେଉଛି ମାନର ଯାଞ୍ଚ ନା ହେଉଛି ଦରର ନିୟନ୍ତ୍ରଣ । କୌଣସି ଆଇନକୁ ଏଠାରେ କାର୍ଯ୍ୟକାରୀ କରାଯାଉନାହିଁ ।

ଅନ୍ୟପକ୍ଷେ କୋଭିଡ କଟକଣାକୁ ମଧ୍ୟ କୌଣସି ଖାତିର ନାହିଁ । ଏଠାକାର ଦୋକାନୀଙ୍କ ମୁହଁରେ ମାସ୍କ ଅଛି ନା ରହିଛି ହାତରେ ରହିଛି ଗ୍ଳୋବସ । କହିବାକୁ ଗଲେ ଏକପ୍ରକାର ସଂକ୍ରମଣକୁ ବ୍ୟାପିବାର ମାଧ୍ୟମ ପାଲଟିଛି ମାଂସ ଦୋକାନ । ହେଲେ ଏ ଘଟଣାକୁ ନେଇ ପୌର ପରିଷଦ ତଥା ଜିଲ୍ଲା ପ୍ରଶାସନ ସାଜିଛି ନିରବ ଦ୍ରଷ୍ଟା । ପୋଲିସ ଜାଣି ଅଜଣା ହୋଇ ରହିଛି । ସରକାରଙ୍କ ଗାଇଡଲାଇନ ପ୍ରକାରେ ନିର୍ଦ୍ଦିଷ୍ଟ ସ୍ଥାନରେ ଯାଞ୍ଚ ପରେ ଛେଳିକୁ ସେଠାରେ ହିଁ କଟାଯାଇ ମାଂସକୁ ବଜାରରେ ବିକ୍ରି କରାଯାଇ ପାରିବ ହେଲ ଏଠାରେ ତାହା କାର୍ଯ୍ୟକାରୀ ହେଉନାହିଁ । 

ସେପଟେ ଶିକ୍ଷାନୁଷ୍ଠାନ, ଧର୍ମାନୁଷ୍ଠାନ ଆଦି ସର୍ବସାଧାରଣ ସ୍ଥାନରେ ଛେଳି କାଟିବା ବାରଣ ରହିଥିଲେ ସୁଦ୍ଧା ମନ ଇଛା ପ୍ରତି ସାହି ଗଳିରେ ଯେଉଁଠି ନାହିଁ ସେଇଠି କଟା ଯାଉଛି । ଯାହା ଦ୍ଵାରା ଆଇନର ଉଲଂଘନ ସାଙ୍ଗକୁ ସାମାଜିକ ପରିବେଶ କଳୁଷିତ ହେଉଥିବା ଅଭିଯୋଗ କରିଛନ୍ତି ବୁଦ୍ଧିଜୀବୀ । 

ବର୍ଷ ବର୍ଷ ଧରି ରାସ୍ତା କଡ଼ରେ ମାଂସ ବ୍ୟବସାୟ କରିଆସୁଥିଲେ ସୁଦ୍ଧା କୈାଣସି ଅଧିକାରୀ ପରିଦର୍ଶନ କରୁନାହାନ୍ତି କିମ୍ବା ଏମାନଙ୍କୁ ନିର୍ଦ୍ଦିଷ୍ଟ ସ୍ଥାନକୁ ସ୍ଥାନାନ୍ତରିତ କରିବା ପାଇଁ ପଦକ୍ଷେପ ନିଆଯାଉନଥିବା କହିଛନ୍ତି ବ୍ୟବସାୟୀ।  ଅନ୍ୟ ପକ୍ଷେ ପୌରପରିଷଦ ଓ ସ୍ୱାସ୍ଥ୍ୟ ବିଭାଗ ଏବଂ ମାପ ଓଜନ ବିଭାଗୀୟ ଅଧିକାରୀଙ୍କ କୌଣସି ହସ୍ତପେକ୍ଷ ନଥିବାରୁ ଓଜନରେ ଠକେଇ ସାଙ୍ଗକୁ ଚଢା ଦରରେ ନିମ୍ନ ମାନର ମାଂସ କିଣୁଛନ୍ତି ଖାଉଟି । ପରିବା ଦର ବୃଦ୍ଧି ହେଉଥିବା ଯୋଗୁଁ ଆମିଷ ପ୍ରତି ମନ ବଳାଉଛନ୍ତି ସାଧାରଣ ଲୋକ । 

ଯାହାର ଫାଇଦା ନେଉଛନ୍ତି ଅସାଧୁ ବ୍ୟବସାୟୀ । ଏଥି ପ୍ରତି ଯତ୍ନବାନ ହେବା ସହ ସ୍ୱତନ୍ତ୍ର ଆମିଷ ବଜାର ନିର୍ମାଣ ପାଇଁ ଦାବି ହେଉଛି । ବଜାରରେ ବିକ୍ରି ହେଉଥିବା ସମସ୍ତ ପ୍ରକାରର ଖାଦ୍ୟର ମାନ ନିର୍ଣ୍ଣୟ ଏକ ଗୁରୁତ୍ୱପୂର୍ଣ୍ଣ ବିଷୟ ହୋଇଥିବା ବେଳେ, ଏହାର ଅବହେଳା ଯୋଗୁଁ ମାରାତ୍ମକ ଭୂତାଣୁ ସଂକ୍ରମଣ ଅଥବା ବିଷାକ୍ତ ଖାଦ୍ୟ ଜନିତ ଅଘଟଣ ଯେ କେତେବେଳେ ନ ଘଟିବ ଏହାକୁ କୌଣସିମତେ ଏଡାଇ ଦିଆଯାଇନପାରେ । ଏଥିପ୍ରତି ବିଭାଗୀୟ କର୍ତ୍ତୃପକ୍ଷଙ୍କ ପକ୍ଷରୁ ଦୃଢ ପଦକ୍ଷେପ ନେବା ଜରୁରୀ ହୋଇପଡିଛି ।