ଜଗତସିଂହପୁର ଛୁଇଁଲା କୋରୋନା, ଜିଲ୍ଲାରୁ ୪ ଆକ୍ରାନ୍ତ ଚିହ୍ନଟ

ଭୁବନେଶ୍ୱର: ରାଜ୍ୟରେ କୋରୋନା କାୟା ବିସ୍ତାର କରିବାରେ ଲାଗିଛି। ପୂର୍ବରୁ ୧୫ଟି ଜିଲ୍ଲା କୋରୋନା ପ୍ରଭାବିତ ହୋଇଥିବା ବେଳେ ଆଜିର ଜଗତସିଂହପୁର ଜିଲ୍ଲାରେ କୋରୋନା ତାର କାୟା ମେଲାଇଛି। ଆଜି ଜିଲ୍ଲାରୁ ୪ଟି ମାମଲା ସାମ୍ନାକୁ ଆସିଛି। ଏହା ସହିତ କେନ୍ଦ୍ରାପଡ଼ା ଜିଲ୍ଲାରୁ ଆଉ ଏକ ମାମଲା ରହିଛି। ଫଳରେ ଆଜି ସନ୍ଧ୍ୟା ସୁଦ୍ଧା ପ୍ରାୟ ୯ଟି ମାମଲା ସାମ୍ନାକୁ ଆସିଛି। ବର୍ତ୍ତମାନ ସୁଦ୍ଧା ରାଜ୍ୟରେ ୧୮୫ଟି ମାମଲା ରହିଛି। 

ମିଳିଥିବା ସୂଚନା ମୁତାବକ ଗ୍ରୀନ ଜୋନରେ ରହିଥିବା ଜଗତସିଂହପୁର ଜିଲ୍ଲାରେ ପୂର୍ବରୁ କୌଣସି ମାମଲା ଆସିନଥିଲା। ଆଜି ଏକ ସଂଗେ ଜିଲ୍ଲାରୁ ଚାରିଟି ମାମଲା ସାମ୍ନାକୁ ଆସିଛି। ଫଳରେ ଜିଲ୍ଲା ପ୍ରଶାସନର ମୁଣ୍ଡବିନ୍ଧାର କାରଣ ପାଲଟିଛି। ତେବେ ଜିଲ୍ଲାରୁ ବାହାରିଥିବା ସମସ୍ତ ଆକ୍ରାନ୍ତ ନାଉଗାଁ ଅଞ୍ଚଳର ବୋଲି ସୂଚନା ରହିଛି। ସେହିପରି କେନ୍ଦ୍ରାପଡ଼ା ଜିଲ୍ଲାରୁ ମଧ୍ୟ ଜଣେ ଆକ୍ରାନ୍ତ ଚିହ୍ନଟ ହୋଇଥିବା ସୂଚନା ରହିଛି। 

ସେପଟେ ଆଜି ଦିନ ଆରମ୍ଭରୁ ୪ଟି ମାମଲା ସାମ୍ନାକୁ ଆସିଥିଲା। ଗଞ୍ଜାମରୁ ଜଣେ ଚିହ୍ନଟ ହୋଇଥିବା ବେଳେ ଯାଜପୁରର ଜିଲ୍ଲାର ୩ ଜଣ ରହିଛନ୍ତି। ତେବେ ଆଜି ତମାମ ଦିନରେ ଚିହ୍ନଟ ହୋଇଥିବା ସମସ୍ତ ଆକ୍ରାନ୍ତ ସୁରଟ ଫେରନ୍ତା ବୋଲି ଜଣାପଡ଼ିଛି। ଏନେଇ ରାଜ୍ୟ ସ୍ୱାସ୍ଥ୍ୟ ବିଭାଗ ତାର ଓ୍ୱେବସାଇଟରେ ସୂଚନା ପ୍ରଦାନ କରିଛନ୍ତି।