ଛାଡିଯାଇଛି ବନ୍ୟା, ବଢିଯାଇଛି କ୍ଷତିଗ୍ରସ୍ତ ଚାଷୀଙ୍କ ଦୁର୍ଦ୍ଦଶା

ସନ୍ଦୀପ୍ତ ରାୟ, ଯାଜପୁର: ଜିଲ୍ଲାରେ ଛାଡିଛି ବନ୍ୟା କିନ୍ତୁ ବଢ଼ିଛି ବନ୍ୟା ବିପନ୍ନଙ୍କ ଦୁର୍ଦ୍ଧଶା । ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛନ୍ତି ଚାଷୀ କୂଳ । ଆଉ ଦିନ କେଇଟା ପରେ ଅମଳ ହୋଇଥାନ୍ତି ବିଓଳି ଧାନ ।  ହେଲେ ବନ୍ୟାର ମାଡରେ ସବୁ କିଛି ଛାରଖାର ହୋଇଯାଇଛି । ସେହିପରି ପନିପରିବା ଚାଷ ସମ୍ପୂର୍ଣ୍ଣ ନଷ୍ଟ ହୋଇଥିବାରୁ ମୁଣ୍ଡରେ ହାତ ଦେଇ ବସିଛି ଚାଷୀ । ନିଜର ସବୁ କିଛିକୁ ବାଜି ଲଗାଇ ଧାନ ଓ ପନିପରିବା ଚାଷ କରିଥିବା ଚାଷୀ କିପରି ନିଜର ଋଣ ଶୁଝିବ ତାକୁ ନେଇ ଚିନ୍ତାରେ । ଏଭଳି ସ୍ଥିତିରେ ଚାଷୀ କେବଳ ସରକାରୀ ସହାୟତାକୁ ଚାହିଁ ବସିଛି । 

ଯାଜପୁରରେ ସୃଷ୍ଟି ହୋଇଥିବା ପ୍ରଳୟଙ୍କାରୀ ମହାବନ୍ୟା ଛାଡି ଯାଇଛି ହେଲେ ବିପନ୍ନଙ୍କ ଦୁର୍ଦ୍ଧଶା ବଢ଼ିଯାଇଛି । ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛନ୍ତି ଚାଷୀକୂଳ । ବନ୍ୟାର ଆଁରେ ଚାଷୀର ସବୁ କିଛି ଛାରଖାର ହୋଇଯାଇଛି । ଯାଜପୁର ବ୍ଲକ ଭୁବନେଶ୍ୱରପୁର ପଞ୍ଚାୟତ କଳସଢ଼ିହ ଓ କୁନିନ୍ଦା ଗାଁର ଚାଷ ଜମି ବନ୍ୟାରେ କ୍ଷତିଗ୍ରସ୍ତ ହୋଇଛି । ଦିନ କେଇଟା ପରେ ଅମଳ ହୋଇଥାନ୍ତା ସୁନାର ଧାନ ଫସଲ । ହେଲେ ବୈତରଣୀର ଶାଖା ଯମୁନା ନଦୀ ସବୁ କିଛି ଉଜାଡି ଦେଲା ଏହି ଚାଷୀଙ୍କର । ଯମୁନା ନଦୀର ପାଗଳା ଘାଇ ଏବଂ ବାୟାଣି ଘାଇ ଯୋଗୁଁ ପ୍ରଭାବିତ ହୋଇଛନ୍ତି ଶହ ଶହ ଚାଷୀ ଓ ୫୦୦ରୁ ଉର୍ଦ୍ଧ୍ୱ ଏକରର ଚାଷ ଜମି । ଘାଇ ମୁହଁରେ ଥିବା ଧାନ ବିଲ ଏବେ ପାଣି ଘେରରେ । ସବୁ କିଛି ନଷ୍ଟ ହୋଇଯାଇଛି । ଧାନ ବିହନ ବି ମିଳିବା କଷ୍ଟ । କେବଳ ଧାନ ଚାଷ ନୁହେଁ ବାଇଗଣ,କଲରା,ଭେଣ୍ଡି ଭଳି ଅନେକ ପନିପରିବା ଚାଷ ମଧ୍ୟ ବନ୍ୟାରେ ପ୍ରଭାବିତ ହୋଇଛି।

ଯମୁନା ନଦୀରେ ପୂର୍ବର୍ରୁ ସୃଷ୍ଟି ହୋଇଥିବା ଏହି ପାଗଳା ଘାଇ ଏବଂ ବାୟାଣି ଘାଇ ଯୋଗୁଁ ପ୍ରତିବର୍ଷ ଶହ ଶହ ଚାଷୀ କ୍ଷତିଗ୍ରସ୍ତ ହୋଇଥାନ୍ତି । ହେଲେ ଘାଇ ମରାମତି ହେଉନାହିଁ । ଫଳରେ ପ୍ରତିବର୍ଷ ଧାର କରଜ କରି ଚାଷବାସ କରୁଥିବା ଚାଷୀ ବନ୍ୟାରେ ପ୍ରଭାବିତ ହେଉଛି । ଚଳିତ ବର୍ଷ ଯମୁନା ନଦୀରେ ଆସିଥିବା ବନ୍ୟା ୨୦୧୧ ମସିହା ବନ୍ୟାକୁ ଟପିଯାଇଛି । ଫଳରେ କ୍ଷତିର ପରିମାଣ ବଢିଯାଇଛି । ଏହି ଘାଇ ଯୋଗୁଁ କ୍ଷତିଗ୍ରସ୍ତ ଚାଷର ଆକଳନ ପାଇଁ ସ୍ଥାନୀୟ ଚାଷୀ ଦାବି କରିଛନ୍ତି । ତୁରନ୍ତ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୁରଣ ପ୍ରଦାନ ସହିତ ଏହି ଦୁଇଟି ଘାଇର ମରାମତି କଲେ ଶହ ଶହ ଚାଷୀ ଉପକୃତ ହୋଇପାରନ୍ତେ ବୋଲି ସାଧାରଣରେ ମତ ପ୍ରକାଶ ପାଇଛି । ଯାଜପୁର ଜିଲାର ୧୦ ଗୋଟି ବ୍ଲକରେ ବନ୍ୟା ଯୋଗୁଁ ୬୪ ହଜାର ହେକ୍ଟର ଚାଷୀ ଜମି ପ୍ରଭାବିତ ହୋଇଛି । କ୍ଷତିଗ୍ରସ୍ତ ଚାଷୀଙ୍କୁ ତୁରନ୍ତ କ୍ଷତିପୁରଣ ସହିତ ସରକାରୀ ସହାୟତା ପ୍ରଦାନ କରିବାକୁ ଦାବି ହୋଇଛି ।