 "ବନ୍ୟାରେ ସର୍ବସ୍ୱାନ୍ତ ହୋଇପଡିଛି ଚାଷୀକୂଳ, ସହାୟତା ଯୋଗାଇ ଦେବାକୁ ଦାବି")
)
ସନ୍ଦୀପ୍ତ ରାୟ, ଯାଜପୁର: ଚଳିତ ବର୍ଷର ହୋଇଥିବା ବନ୍ୟାରେ ଯାଜପୁର ଜିଲା (Jajpur District) ବିଞ୍ଝାରପୁର ବ୍ଲକରେ (Binjharpur Block) ବ୍ୟାପକ କ୍ଷୟକ୍ଷତି ଘଟିଛି । ବିଶେଷକରି ଚାଷୀଙ୍କର ସବୁକିଛି ଉଜୁଡିଯାଇଛି । ଧାନ ଠାରୁ ଆରମ୍ଭ କରି ପନିପରିବା ଚାଷ ପର୍ଯ୍ୟନ୍ତ ସବୁକିଛି ଛାରଖାର କରିଦେଇଛି ପ୍ରଳୟଙ୍କାରୀ ବନ୍ୟା । ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି ଚନ୍ଦ୍ରମୁଁ ଏବଂ ରଣପୁର ପଞ୍ଚାୟତର ଚାଷ ଜମି । ଆଉ ଦିନ କେଇଟା ପରେ ଅମଳ ହୋଇଥାନ୍ତା ବିଓଳି ଧାନ ।
ହେଲେ ଚଳିତ ବର୍ଷର ମହାବନ୍ୟା ଯୋଗୁଁ ଭାଙ୍ଗିଯାଇଛି ଚାଷୀଙ୍କ ମେରୁଦଣ୍ଡ । ଧାର କରଜ ନେଇ ଚାଷୀ କରିଥିବା ସୁନାର ଫସଲ ଏବେ ମାଟିରେ ମିଶିଯାଇଛି । ନିଜର ଋଣକୁ କିପରି ଶୁଝିବ ତାକୁ ନେଇ ଚିନ୍ତାରେ ଚାଷୀ । ସେପଟେ ଉଭୟ ପଞ୍ଚାୟତର ୧୧୫୦ ହେକ୍ଟର ଚାଷ ଜମି ନଷ୍ଟ ହୋଇଥିବା ସ୍ୱୀକାର କରିଛନ୍ତି ବ୍ଲକ କୃଷି ଅଧିକାରୀ । ସରକାରଙ୍କୁ ରିପୋର୍ଟ ପ୍ରଦାନ ପରେ ଇନପୁଟ ସବସିଡି (input subsidy) ମିଳିବ ବୋଲି କୃଷି ଅଧିକାରୀ ଜଣାଇଛନ୍ତି।
ଯାଜପୁର ଜିଲାକୁ ଆସିଥିବା ପ୍ରଳୟଙ୍କରି ମହାବନ୍ୟା ଛାଡିବାକୁ ୧୫ ଦିନ ବିତିଲାଣି । ହେଲେ ଆଜି ମଧ୍ୟ ଧାନ କିଆରିରେ ଲହଡି ଭାଙ୍ଗୁଛି ବନ୍ୟା ଜଳ (Flood Water)। କେଉଁଠି ଛାତିଏ ତ ଆଉ କେଉଁଠି ଅଣ୍ଟାଏ ଉଚ୍ଚର ବନ୍ୟା ଜଳ ଦେଖିବାକୁ ମିଳିଛି ଧାନ କିଆରିରେ । ଆଉ ଦିନ କେଇଟାରେ ସୁନା ଫସଲ ଅମଳ କରିବାକୁ ଆଶା ରଖିଥିଲା ଚାଷୀ । ହେଲେ ସବୁକିଛି ଉଜାଡିଦେଲା ପ୍ରଳୟଙ୍କାରୀ ବନ୍ୟା । ଦୀର୍ଘଦିନ ଧରି ବନ୍ୟା ଜଳରେ ସୁନାର ଫସଲ ବୁଡି ରହିବା ଫଳରେ ସବୁ କିଛି ନଷ୍ଟ ହୋଇଯାଇଛି । ଏପରିକି ବିହନ ମିଳିବାର ମଧ୍ୟ ସମ୍ଭାବନା ନାହିଁ । ହେକ୍ଟର ହେକ୍ଟର ଚାଷ ଜମି ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଯାହାକୁ ନେଇ ଚିନ୍ତାରେ ଦିନ କାଟୁଛନ୍ତି ଚାଷୀ ।
ବିଞ୍ଝାରପୁର ବ୍ଲକର ଚନ୍ଦ୍ରମୁଁ ଏବଂ ରଣପୁର ପଞ୍ଚାୟତବାସୀ ସମ୍ପୂର୍ଣ୍ଣ ଭାବେ ଚାଷ ଉପରେ ନିର୍ଭର କରିଥାନ୍ତି । ମୁଖ୍ୟତଃ ଏଠାରେ ଧାନ ଓ ପନିପରିବା ଚାଷ ହୋଇଥାଏ । ହେଲେ ଚଳିତ ବର୍ଷ ମହାବନ୍ୟାରେ ସବୁ କିଛି ଉଜୁଡିଯିବା ପରେ କେମିତି ଆଗକୁ ଚାଷୀ ଦିନ କାଟିବ ତାକୁ ନେଇ ଚିନ୍ତା କରୁଛି । ବନ୍ୟା ଯୋଗୁଁ କ୍ଷତିଗ୍ରସ୍ତ ଚାଷୀଙ୍କୁ ମାଗଣା ବିହନ ଓ ସାର ସହିତ କ୍ଷତିପୁରଣ ପ୍ରଦାନ କରିବାକୁ କ୍ଷତିଗ୍ରସ୍ତ ଚାଷା ଦାବି କରିଛନ୍ତି ।
ସେପଟେ ଉଭୟ ପଞ୍ଚାୟତର ପ୍ରାୟ ୧୧୫୦ ହେକ୍ଟର ଚାଷ ଜମି ନଷ୍ଟ ହୋଇଥିବା ବିଞ୍ଝାରପୁର ବ୍ଲକ କୃଷି ଅଧିକାରୀ ଜଣାଇଛନ୍ତି । ଏଥିସହିତ ଉଭୟ ପଞ୍ଚାୟତର ଚାଷୀଙ୍କ ବ୍ୟକ୍ତିଗତ କ୍ଷୟକ୍ଷତିର ରିପୋର୍ଟ ପ୍ରସ୍ତୁତ ହେଉଛି ଏବଂ ଏହାକୁ ରାଜ୍ୟ ସରକାରଙ୍କୁ ପ୍ରଦାନ କରାଯିବ ଏବଂ କ୍ଷତିପୁରଣ ମିଳିବ ବୋଲି ପ୍ରତିଶୃତି ମିଳିଛି । ପ୍ରତିବର୍ଷ ବନ୍ୟା ଓ ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟର ସାମ୍ନା କରୁଛି ଚାଷୀକୂଳ । ହେଲେ ଚଳିତ ବର୍ଷର ମହାବନ୍ୟା ଯୋଗୁଁ ଭାଙ୍ଗିଯାଇଛି ଚାଷୀଙ୍କ ମେରୁଦଣ୍ଡ । ଏଭଳି ସ୍ଥିତିରେ ସରକାର ଚାଷୀଙ୍କ ପ୍ରକୃତ କ୍ଷତିପୂରଣ ପ୍ରଦାନ କରିବା ପାଇଁ ଦାବି ହେଉଛି ।
