ବାଲି ଖାଦାନରେ ଫସି ଯାଇଥିବା ୫ଟି ଡମ୍ପର ଉଦ୍ଧାର

ଯାଜପୁର: ଜିଲ୍ଲାର ଲିଙ୍ଗେଶ୍ୱର ବାଲି ଖାଦାନରେ ଫସି ଯାଇଥିବା ୫ଟି ଡମ୍ପରକୁ ଉଦ୍ଧାର କରାଯାଇଛି । ଆଜି(ରବିବାର) ପ୍ରୋକଲିନ ମେସିନ ସାହାଯ୍ୟରେ ଡମ୍ପର ଗୁଡିକୁ ନଦୀ କୂଳକୁ ଟାଣି ଟାଣି ଅଣାଯିବା ପରେ ଉଦ୍ଧାର ହୋଇଛି । ଏହି ଘାଟରୁ ବାଲି ନେବା ପାଇଁ ଡମ୍ପର ଗୁଡିକ ଆସିଥିବା ବେଳେ ସଂଧ୍ୟା ହୋଇ ଯିବାରୁ ନଦୀ ଭିତରେ ରହିଯାଇଥିଲେ । କିନ୍ତୁ ହଠାତ୍ ରାତିରେ ବୈତରଣୀ ନଦୀରେ ପାଣି ଆସିଯିବା ଫଳରେ ଡମ୍ପରଗୁଡିକ ପାଣି ଭିତରେ ରହିଯାଇଥିଲା ।

ଗାଡିର ଡ୍ରାଇଭର ଓ ହେଲପରମାନେ ନଦୀ କୂଳକୁ ପଳାଇଆସିଥିଲେ । ପରେ ଲିଙ୍ଗେଶ୍ୱର ଉନ୍ନୟନ କମିଟି ପକ୍ଷରୁ ଟ୍ରକ ଗୁଡିକୁ ଉଦ୍ଧାର କରିବା ପାଇଁ ଜିଲ୍ଲା ପ୍ରଶାସନକୁ ଅନୁରୋଧ କରାଯାଇଥିଲା । ଜିଲ୍ଲା ପ୍ରଶାସନ ନଦୀର ରୁଢ଼ିଆ ଆନିକଟ ଗେଟ ଖୋଲିବା ପରେ ଜଳସ୍ତର କମିଥିଲା । ଏହା ପରେ ଆଜି ପ୍ରୋକଲିନ ମେସିନ ସାହାଯ୍ୟରେ ଗାଡି ଗୁଡିକୁ ଉଦ୍ଧାର କରାଯାଇପାରିଛି ।