କାହିଁକି ଆତ୍ମହତ୍ୟା କଲେ ଆତ୍ମସମର୍ପଣ କରିଥିବା ମହିଳା ମାଓବାଦୀ ସିଜୁ କହଁର ?

ବର୍ଷେ ପୂର୍ବରୁ ଆତ୍ମସମର୍ପଣ କରିଥିଲେ, ଏବେ ଆତ୍ମହତ୍ୟା !

ପ୍ରିୟବ୍ରତ ସାହୁ, ଫୁଲବାଣୀ: ଆତ୍ମସମର୍ପଣର ବର୍ଷେ ପରେ ଆତ୍ମହତ୍ୟା କଲେ ମହିଳା ମାଓବାଦୀ ! ମୃତ ମହିଳା ମାଓବାଦୀ ହେଉଛନ୍ତି ସିଜୁ କହଁର । ବେକରେ ଦୌଡ଼ି ଲାଗାଇ ସେ ଆତ୍ମହତ୍ୟା କରିଥିବା ଜଣାପଡ଼ିଛି । ତେବେ କେଉଁ କାରଣରୁ ସିଜୁ ଆତ୍ମହତ୍ୟା କଲେ ତାହା ସ୍ପଷ୍ଟ ହୋଇନାହିଁ । ତଦନ୍ତ ପରେ ପୁରା ଘଟଣା ସାମ୍ନାକୁ ଆସିବ ବୋଲି କହିଛନ୍ତି କନ୍ଧମାଳ ଏସପି ପ୍ରତୀକ ସିଂହ । 

ସୂଚନା ମୁତାବକ, ଗତବର୍ଷ(୨୦୧୯) ମାର୍ଚ୍ଚ ୨୯ରେ କନ୍ଧମାଳ ଏସପିଙ୍କ ପାଖରେ ଆତ୍ମସମର୍ପଣ କରିଥିଲେ ମାଓ କ୍ୟାଡର ସିଜୁ କହଁର । ମାଓବାଦୀଙ୍କ କାର୍ଯ୍ୟକଳାପରେ ଅସନ୍ତୁଷ୍ଟ ହୋଇ ଏଭଳି ନିଷ୍ପତ୍ତି ନେଇଥିଲେ ସିଜୁ । ତେବେ ତାଙ୍କ ଜୀବନ ପ୍ରତି ବିପଦ ଥିବାରୁ ଆଉ ସେ ଗାଁକୁ ଫେରି ନ ଥିଲେ । କନ୍ଧମାଳ ପୋଲିସ ରିଜର୍ଭଠାରେ ତାଙ୍କୁ ପୋଲିସର ହେପାଜତରେ ରଖାଯାଇଥିଲା । ତେବେ ଆଜି ସକାଳ ୯ଟା ବେଳେ ତାଙ୍କ ମୃତଦେହ ଝଲନ୍ତା ଅବସ୍ଥାରେ ଉଦ୍ଧାର ହୋଇଛି । ବେକରେ ରସି ଲଗାଇ ସେ ଆତ୍ମହତ୍ୟା କରିଥିବା ପୋଲିସ ପକ୍ଷରୁ ସୂଚନା ମିଳିଛି । 

ତେବେ ଏଠାରେ ପ୍ରଶ୍ନ ଉଠୁଛି, କେଉଁ କାରଣରୁ ଆତ୍ମହତ୍ୟା କଲେ ସିଜୁ ? ସମାଜର ମୁଖ୍ୟସ୍ରୋତରେ ସାମିଲ ହେବାକୁ ଦିନେ ମନ ବଳାଇଥିଲେ ଏହି ମହିଳା ମାଓ କ୍ୟାଡର । ଆଉ ସେଇଥିପାଇଁ ତ କନ୍ଧମାଳ ଏସପିଙ୍କ ପାଖରେ ଆତ୍ମସମର୍ପଣ କରିଥିଲେ । ମୃତ ସିଜୁ କହଁରଙ୍କ ଘର ଫିରିଙ୍ଗିଆ ଥାନା ସୁମରବନ୍ଧ ପଞ୍ଚାୟତ ଅନ୍ତର୍ଗତ ଗାର୍ଗୀସୋରୁ ଗାଁରେ । ହେଲେ ଆତ୍ମ ସମର୍ପଣ ପରେ ଗାଁକୁ ଫେରିନଥିଲେ ସିଜୁ । ବର୍ଷେରୁ ଉର୍ଦ୍ଧ୍ୱ ସମୟ ହେଲା ରିଜର୍ଭ ପୋଲିସ ହେପାଜତରେ ଥିଲେ । ତେବେ ହଠାତ ଏମିତି କ'ଣ ହେଲା, ଯେଉଁଥିପାଇଁ ଆତ୍ମହତ୍ୟା ପରି ଚରମ ନିଷ୍ପତ୍ତି ନେଲେ ସିଜୁ ? ଏ ତମାମ ପ୍ରଶ୍ନ ଏବେ ଉଠିବା ସ୍ୱାଭାବିକ କଥା । ଅବଶ୍ୟ ପୋଲିସର ତଦନ୍ତ ପରେ ଏହା ଉପରୁ ପରଦା ହଟିପାରେ ।