ଅନୁପମଙ୍କ ସ୍ୱାସ୍ଥ୍ୟବସ୍ଥା ଗୁରୁତର, ଡାକ୍ତରଖାନାରେ ଭର୍ତ୍ତି

ନୂଆଦିଲ୍ଲୀ: ବଲିଉଡ଼ରୁ ଆଉ ଏକ ଦୁଃଖଦ ଖବର ସାମ୍ନାକୁ ଆସିଛି। ବଲିଉଡ଼ର ବରିଷ୍ଠ ଅଭିନେତା ଅନୁପମ ଶ୍ୟାମ ଗୁରୁତର ଅସୁସ୍ଥ ହୋଇ ପଡ଼ିବାରୁ ତାଙ୍କୁ ସ୍ଥାନୀୟ ଗୋରେଗାଓଁ ଲାଇଫଲାଇନ ଡାକ୍ତରଖାନାରେ ଭର୍ତ୍ତି କରାଯାଇଛି। ବଲିଉଡ଼ରେ ଏକାଧିକ ସିନେମାରେ ସେ ନିଖୁଣ ଅଭିନୟ କରି ଦର୍ଶକଙ୍କ ହୃଦୟରେ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଛନ୍ତି। ତେବେ ତାଙ୍କର ଚିକିତ୍ସା ପାଇଁ ଅମିର ଖାନ ଓ ସୋନୁ ସୁଦ ସହାୟତା ପାଇଁ ଗୁହାରୀ କରିଛନ୍ତି। 

ମିଳିଥିବା ସୂଚନା ମୁତାବକ ଅନୁପମ କିଛିଦିନ ପୂର୍ବରୁ ତଳେ ପଡ଼ିଯାଇଥିଲେ। ପରବର୍ତ୍ତି ସମୟରେ ସେ କିଡନୀ ରୋଗରେ ପିଡ଼ିତ ହୋଇଥିଲେ। ଅନୁପମ ଷ୍ଟାରପ୍ଲସର ଟିଭି ଶୋ ମନକି ଆଓ୍ୱାଡ ପ୍ରତିଜ୍ଞାରେ ଠାକୁର ସଜ୍ଜନ ଚରିତ୍ରରେ ଅଭିନୟ କରି ଚର୍ଚ୍ଚାକୁ ଆସିଥିଲେ। ଏଠାରେ କହି ରଖୁଛୁ କି ଅନୁପମଙ୍କ ସ୍ୱାସ୍ଥ୍ୟବସ୍ଥା ସମ୍ପର୍କରେ ସୂଚନା ପାଇବା ପରେ ଅଭିନେତା ମନୋଜ ବାଜପେୟୀ ତାଙ୍କୁ ସହାୟତାର ହାତ ବଢାଇଥିଲେ। 

ଅନୁପମ ଶ୍ୟାମ ଟିଭି ସିରିଏଲ ବ୍ୟତୀତ ସିନେମାରେ ମଧ୍ୟ ବେଶ ପ୍ରଶଂସା ସାଉଣ୍ଟିଛନ୍ତି। ଅନୁପମ ଲଜ୍ଜା, ନାୟକ, ଦୁବାଇ, ରିଟର୍ଣ୍ଣ, ପରଜନିଆ, ହଜାରୋ ଖ୍ୱାଇସେଁ ଏସି, ଶକ୍ତି: ଦ ପାଓ୍ୱାର, ବେଣ୍ଡିଟ କ୍ୱିଇନ, ସ୍ଲମ ଡଗ ମିଲିଓନାୟର ଭଳି ସିନେମାରେ ମଧ୍ୟ କାର୍ଯ୍ୟ କରିସାରିଛନ୍ତି। ଅନୁପମଙ୍କ ନିଜ ଗ୍ରାମ ଉତ୍ତରପ୍ରଦେଶର ପ୍ରତାପଗଡ଼ରେ। ଭାରତେନ୍ଦୁ ଏକାଡ଼େମୀ ଅପ ଡ୍ରାମାଟିକ ଆର୍ଟସର ପୂର୍ବତନ ଛାତ୍ର ରହି ସାରିଛନ୍ତି।