ଆଇପିଏଲ ସୂଚୀ ପ୍ରକାଶ, ମୁମ୍ବାଇ-ଚେନ୍ନାଇ ଉଦଘାଟନୀ ମ୍ୟାଚ

ନୂଆଦିଲ୍ଲୀ: ଆସନ୍ତା ୧୯ ତାରିଖରୁ ଆରମ୍ଭ ହେବାକୁ ଯାଉଛି ଆଇପିଏଲର ତ୍ରୟୋଦଶ ସଂସ୍କରଣ (IPL 2020) । ଆଜି ଏନେଇ ଆନୁଷ୍ଠାନିକ ଭାବେ କ୍ରୀଡ଼ା ସୂଚୀ ଘୋଷଣା ହୋଇଛି । ମୋଟ ୫୬ ଦିନରେ ୪୬ଟି ଲିଗ ମ୍ୟାଚ ଖେଳାଯିବ । ବର୍ତ୍ତମାନ ସୁଦ୍ଧା ପ୍ଲେଅଫ ଓ ଫାଇନଲ ପାଇଁ ସୂଚୀ ଘୋଷଣା ହୋଇ ନାହିଁ । ତେବେ ମୋଟ ୬୦ ଦିନ ଧରି ମ୍ୟାଚ ଖେଳାଯିବ । ମୁମ୍ବାଇ ଇଣ୍ଡିଆନସ (mumbai indians) ଓ ଚେନ୍ନାଇ ସୁପର କିଙ୍ଗସ (Chennai Super Kings) ମଧ୍ୟରେ ଆବୁଧାବି ଉଦଘାଟନୀ ମ୍ୟାଚ ଖେଳାଯିବ ।

ପ୍ରକାଶିତ ସୂଚୀ ଅନୁଯାୟୀ ଏହି ଟୁର୍ଣ୍ଣାମେଣ୍ଟରେ ମୋଟ ୧୦ ଡବଲ ହେଡ଼ର ଡେ ରହିଛି । ଏହା ସହିତ ସର୍ବାଧିକ ୨୪ଟି ମ୍ୟାଚ ଦୁବାଇରେ ଖେଳାଯିବାକୁ ଥିବା ବେଳେ ୧୨ଟି ସାରଜାହ ଓ ୨୦ଟି ଆବୁଧାବିରେ ଖେଳାଯିବାକୁ ରହିଛି । ପ୍ରଥମ ୧୪ ଦିନ ଗୋଟିଏ ଲେଖାଏଁ ମ୍ୟାଚ ଖେଳାଯିବ । ପରବର୍ତ୍ତୀ ଅଧିକାଂଶ ଦିନ ଗୁଡ଼ିକରେ ଦୁଇଟି ଲେଖାଏଁ ମ୍ୟାଚ ଖେଳାଯିବ । ଭାରତୀୟ ସମୟ ଦିନ ସାଢେ ୩ଟା ଓ ସନ୍ଧ୍ୟା ସାଢେ ୭ଟାରେ ପ୍ରସାରଣ ହେବ । ନଭେମ୍ବର ୩ ତାରିଖ ପର୍ଯ୍ୟନ୍ତ ଲିଗ ମ୍ୟାଚ ଖେଳାଯିବ । ତେବେ ବର୍ତ୍ତମାନ ସୁଦ୍ଧା କେବଳ ଲିଗ ମ୍ୟାଚର ସୂଚୀ ପ୍ରକାଶ ପାଇଛି । 

ସୂଚନାଯୋଗ୍ୟ ଚଳିତ ବର୍ଷ କୋରୋନା ମହାମାରୀକୁ ନେଇ ଆଇପିଏଲ ଆୟୋଜନ ମଧ୍ୟରେ ଦ୍ୱନ୍ଦ୍ୱ ସୃଷ୍ଟି ହୋଇଥିଲା । ଭାରତରେ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଦେଶ ବାହାରେ ଏହାର ଆୟୋଜନ ନେଇ ବିସିସିଆଇ ଚିନ୍ତା କରିଥିଲା । ଆୟୋଜକଙ୍କ ପାଇଁ ବିସିସିଆଇ ପକ୍ଷରୁ ବିଭିନ୍ନ ଦେଶକୁ ପ୍ରସ୍ତାବ ଦିଆଯାଇଥିଲା । ତେବେ ଶେଷରେ ୟୁଏଇରେ ଆୟୋଜନ ହେବା ନେଇ ସ୍ପଷ୍ଟ ହୋଇଥିଲା ।