ଜାଣନ୍ତୁ ବ୍ୟକ୍ତିତ୍ୱ ଓ ସ୍ୱଭାବ ବିଷୟରେ...

ତପନ କୁମାର କର, ନୂଆଦିଲ୍ଲୀ: ପରିବାର ବା ସମ୍ପର୍କରେ ଥିବା ବ୍ୟକ୍ତିମାନଙ୍କ ସହିତ ଆମର ବ୍ୟବହାର ଆତ୍ମୀୟତାରେ ପରିପୂର୍ଣ୍ଣ ଓ ମଧୁର ହେବା ଦରକାର । ପରିବାରରେ ମାଆ, ବାପା, ଭାଇ, ଭଉଣୀଙ୍କ ସହିତ ମଧ୍ୟ ଆମର ସମ୍ପର୍କ ନିଶ୍ଚିତ ଭାବରେ ମଧୁର ଓ ନ୍ୟାୟପୂର୍ଣ୍ଣ ହେବା ଉଚିତ । ଅନ୍ୟଥା ବାହାର ଲୋକଙ୍କ ସହିତ ଉତ୍ତମ ସମ୍ପର୍କ ସ୍ଥାପନ କରିବା ସମ୍ଭବ ନୁହେଁ । ବ୍ୟବହାରରେ ମଧୁର ସ୍ୱଭାବ ଆଣିବା ପାଇଁ ଆମର ଆତ୍ମ ବୃତିର ପରିଶୋଧନ ଆବଶ୍ୟକ । ଈର୍ଷା, ଦ୍ଵେଷ, ପ୍ରତିଶୋଧପରାୟଣତା ଆଦି କଳୁଷିତ ଭାବନାକୁ ମନରୁ ନିଷ୍କାସନ କରିବା ଦରକାର । ଚିର ବୃତ୍ତିରୁ କଳୁଷିତ ବିଚାର ଗୁଡିକର ନିବୃତ୍ତି ହେବା ଦ୍ଵାରା ଆମେ ଶାନ୍ତ, ଶିଷ୍ଠ ଓ ସଜ୍ଜନ ହୋଇ ପାରିବା ।  ଅଧ୍ୟବସାୟ ଏବଂ ସାହସ ହିଁ ମଣିଷର ଜୀବନକୁ କାର୍ଯ୍ୟକୁଶଳ ଓ ପରିପୂର୍ଣ୍ଣ କରେ । ଜୀବନେ ଈପ୍ସିତ ଲକ୍ଷ୍ୟ ହାସଲ କରିବାକୁ ହେଲେ ସମସ୍ତ ସକାରାତ୍ମକ ଗୁଣର ବିକାଶ କରିବା ଆବଶ୍ୟକ । ଯେଉଁ କାର୍ଯ୍ୟକ୍ଷେତ୍ରରେ ଆପଣ କାମ କରୁଥାନ୍ତୁନା କାହିଁକି ସେହି କର୍ମକ୍ଷେତ୍ର ଓ ସହକର୍ମୀଙ୍କ ସହିତ ଉତ୍ତମ ବ୍ୟବହାର କରନ୍ତୁ । ନିଜର ଯୋଗ୍ୟତା ପ୍ରତି ସନ୍ଦିହାନ ହେବା ଆଦୌ ଠିକ ନୁହେଁ । ନିଜ ଉପରେ ଜାହାର ଭରସା ନାହିଁ ସିଏ କେବେବି ସଫଳ ହୋଇ ପାରିବ ନାହିଁ । ମଣିଷ ମନର ସକାରାତ୍ମକ ବିଚାରଧାରା ଉପରେ ହିଁ ସଫଳତା ବା ବିଫଳତା ନିର୍ଭର କରିଥାଏ ।

ଦୁନିଆରେ କେତେକ ଲୋକ ଆଛନ୍ତି ଯେଉଁମାନଙ୍କ ମନ ଦୁଇ ଭାଗରେ ବିଭକ୍ତ ହୋଇଥାଏ । ଅଧା ଭାଗରେ ରଚନାତ୍ମକ, ନିର୍ମାଣାତ୍ମକ, ସକାରାତ୍ମକ ଏବଂ ଅନ୍ୟ ଭାଗଟିରେ ନିଷେଧାତ୍ମକ ବିଚାରଧାରା ପୂରି ରହିଥାଏ । ଏପରି ବ୍ୟକ୍ତି ପୂର୍ଣ୍ଣ ସଫଳ ହୁଅନ୍ତି ନାହିଁ ସେମାନଙ୍କ ମନ ସବୁବେଳେ ଦୋଦୁଲ୍ୟମାନ ସ୍ଥିତିରେ ରହିଥାଏ । କେତେବେଳେ ସେମାନଙ୍କ ମନରେ ଆଶା, ବିଶ୍ୱାସ ଅଚାନକ ଜାଗ୍ରତ ହୋଇଯାଏ ତ କେତେବେଳେ ସେଗୁଡିକ ପୁଣି ମଉଳି ଯାଏ । ତେଣୁ ଏପରି ବ୍ୟକ୍ତି ମାନେ ନିଜର ମାନସିକ ଅବସ୍ଥା ଅନୁସାରେ କୌଣସି କାର୍ଯ୍ୟରେ ଲାଭ ବା କ୍ଷତିର ସାମ୍ନା କରିଥାନ୍ତି ।

ତେଣୁ ଜାଣି ରଖନ୍ତୁ ସମୟ ବଡ ବଳବାନ । ଯାହା ବିତି ଯାଇଛି ଆଉ ଏ ଜୀବନରେ କେବେ ଫେରିବ ନାହିଁ । ବର୍ତ୍ତମାନ ସମୟ ଆମ ସମ୍ମୁଖରେ ଉପନିତ, ବର୍ତ୍ତମାନ ସମୟର ଆହ୍ୱାନକୁ ଶୁଣି ଯିଏ ନିଜକୁ ପରିବର୍ତ୍ତନ କରି ପାରିଛି ସେଭଳି ବ୍ୟକ୍ତିଙ୍କୁ ଏକ ସୁଖଦ ଭବିଷ୍ୟତ ସ୍ଵାଗତ କରିବାପାଇଁ ସର୍ବଦା ଅପେକ୍ଷାରତ ରହିଥାଏ । ନିଜ ମନ ଓ ମନୋବୃତ୍ତିକୁ ନିରନ୍ତର ରଚନାତ୍ମକ ବିଚାର ସମୂହରେ ପରିପୂର୍ଣ୍ଣ ରଖିବା ଦ୍ଵାରା ଆମର ଜୀବନ ସୁଖରେ ପରିପୂର୍ଣ୍ଣ ହୋଇଯିବ ।