India's Myanmar border:ଭାରତର ଏମିତି ଗୋଟିଏ ଗାଁ,ଯେଉଁଠି ବାଥରୁମ୍ ଯିବାକୁ ଦରକାର ହୁଏ ପାସପୋର୍ଟ !

India's Myanmar border: ଗୋଟିଏ ଦେଶରୁ ଆଉ ଗୋଟିଏ ଦେଶକୁ ଯିବାକୁ ଆବଶ୍ୟକ ହୋଇଥାଏ ପାସପୋର୍ଟ । ପାସପୋର୍ଟ ହେଉଛି ଜଣେ ବ୍ୟକ୍ତିଙ୍କର ଜାତୀୟତାର ପରିଚୟ । ଆପଣ ଯେଉଁ ଦେଶର ପାସପୋର୍ଟ ଧାରକ,ଆପଣଙ୍କୁ ସେହି ଦେଶର ନାଗରିକ ବୋଲି କୁହାଯିବ । ବିନା ପାସପୋର୍ଟରେ ଆପଣ ଭିସା ପାଇପାରିବେ ନାହିଁ  । ଆଉ ବିନା ଭିସାରେ ଆପଣ ବିଦେଶକୁ ଯାଇ ପାରିବେ ନାହିଁ । ସିଧା କହିବାକୁ ଗଲେ ଆପଣ ଯଦି ଭାରତୀୟ ନାଗରିକ ଓ ଭାରତରୁ ବାହାରକୁ ଯିବାକୁ ଚାହୁଁଛନ୍ତି ତେବେ ଆପଣଙ୍କ ପାଖରେ ନିହାତି ପାସପୋର୍ଟ ରହିବା ଆବଶ୍ୟକ । ଆପଣଙ୍କ ପୃଷ୍ଠଭୂମିର ଯାଂଚ ପରେ ହିଁ ପାସପୋର୍ଟ ଜାରି ହୋଇଥାଏ । ଅପରାଧିକ ଇତିହାସ ଥିବା ବ୍ୟକ୍ତିଙ୍କୁ ପାସପୋର୍ଟ ମିଳିନଥାଏ । ଏମିତିରେ ଯଦି ଆମେ ଆପଣଙ୍କୁ କହିବୁ ଯେ, ଆପଣଙ୍କୁ ବାଥରୁମ ବ୍ୟବହାର ପାଇଁ ମଧ୍ୟ ପାସପୋର୍ଟ ଦେଖାଇବାକୁ ପଡିବ ତେବେ ଆପଣ ନିଶ୍ଚିତ ଭାବେ ଚକିତ ହେବେ । କିନ୍ତୁ ଏହା ସତ । ଦେଶର ଏମିତି ଗୋଟିଏ ସ୍ଥାନ ଅଛି ଯେଉଁଠାରେ ଆପଣଙ୍କୁ ବାଥରୁମ ଯିବାକୁ ମଧ୍ୟ ଏକରକମ ପାସପୋର୍ଟ୍ ଆବଶ୍ୟକ ପଡିପାରେ । ଦେଶର କେଉଁ ରାଜ୍ୟରେ ଏମିତି ସ୍ଥିତି ରହିଛି ଆସନ୍ତୁ ଜାଣିବା ।

ଗତ ଫେବୃଆରୀ ୬ରୁ ଉତ୍ତର-ପୂର୍ବ ଭାରତ ଏବଂ ମିଆଁମାର ମଧ୍ୟରେ ଯିବାଆସିବାରେ କଟକଣା  ଲାଗୁ କରିଦିଆଯାଇଛି। ପୂର୍ବଭଳି ଦୁଇ ଦେଶର ଲୋକେ ସୀମାରେ ଅବାଧ ପ୍ରବେଶ ଆଉ କରିପାରିବେ ନାହିଁ  ।  ଏହା ସହିତ ଦୁଇ ଦେଶ ମଧ୍ୟରେ ଏବେ ତାରବାଡ ଲଗାଇ ଦିଆଯାଇଛି। କେନ୍ଦ୍ର ସରକାରଙ୍କ ଏଭଳି ନିଷ୍ପତ୍ତି ପରେ ସମସ୍ୟାରେ ସ୍ଥାନୀୟ ବାସିନ୍ଦା  । କାରଣ ସୀମାରେ ଏମିତି କିଛି ଘର ରହିଛି ,ଯାହାର  ଶୟନ କକ୍ଷ ଯଦି ଭାରତରେ ଅଛି,ତେବେ ତାର ରୋଷେଇ ଘର କିମ୍ବା ଶୌଚାଳୟ ମିଆଁମାର ସୀମାରେ ଅଛି  । ଏଭଳି ପରିସ୍ଥିତିରେ ଏବେ ବଡ ପ୍ରଶ୍ନ ହେଉଛି ଏହି ଶୋଇବା ଘରୁ ରୋଷେଇ ଘରକୁ ଯିବା ପାଇଁ ପାସପୋର୍ଟ ଦେଖାଇବାକୁ ପଡିବ କି?

ବେଡ୍ ରୁମ୍ ଭାରତରେ,ବାଥରୁମ୍ ମିଆଁମାରରେ !

ମିଆଁମାର ସୀମାନ୍ତରେ ଭାରତର ଚାରୋଟି ରାଜ୍ୟ ଅଛି।  ଏହି ଚାରିଟି ରାଜ୍ୟରୁ ମିଆଁମାର ସୀମା ପର୍ଯ୍ୟନ୍ତ ଯିବାଆସିବା ଲାଗି ରହିଥିଲା  । ସ୍ଥାନୀୟ ବାସିନ୍ଦା ଦୁଇ ଦେଶର ସୀମା ମଧ୍ୟରେ ୧୬ କିଲୋମିଟର ପର୍ଯ୍ୟନ୍ତ ଯିବାଆସିବା କରିବା ପାଇଁ କୌଣସି କଟକଣା ନଥଲା। ତେବେ ମିଆଁମାରରେ ରାଜନୈତିକ ଅସ୍ଥିରତା କାରଣରୁ ସରକାର ଏବେ ମିଆଁମାର ସୀମାର ତାରବାଡ଼ ଲଗାଇବାକୁ ନିଷ୍ପତି ନେଇଛନ୍ତି । ଏହି ନିଷ୍ପତ୍ତି ପାଇଁ ସୀମାବର୍ତ୍ତୀ ଗାଁ ଗୁଡିକରେରେ ଅସୁବିଧା ସୃଷ୍ଟି ହୋଇଛି । ମିଆଁମାର ସୀମାକୁ ଲାଗିଥିବା ଦେଶର ୪ଟି ରାଜ୍ୟରେ ଏମିତି ବହୁ ସଂଖ୍ୟକ ଘର ଅଛି ଯାହା ମଧ୍ୟରେ ଆନ୍ତର୍ଜାତୀୟ ସୀମା ଅତିକ୍ରମ କରେ  । ଏଭଳି ପରିସ୍ଥିତିରେ ଯଦି ଗୋଟିଏ ଘରର ଶୋଇବା ଘର ଭାରତରେ ଥାଏ, ତେବେ ରୋଷେଇ ଘର ମିଆଁମାରରେ ଅଛି  । ସେହିପରି କାହାର ଡ୍ରଇଂ ରୁମ୍ ଓ ଶୌଚାଳୟ ମଧ୍ୟ ପଡୋଶୀ ଦେଶରେ ଅଛି  । ଏଭଳି ପରିସ୍ଥିତିରେ ଫେନସିଂ କାର୍ଯ୍ୟରେ ନିୟୋଜିତ ଅଧିକାରୀ ଏବଂ କର୍ମଚାରୀଙ୍କ ପାଇଁ ଅଡୁଆ ପରିସ୍ଥିତି ସୃଷ୍ଟି ହୋଇଛି । ନାଗାଲାଣ୍ଡର ଶେଷ ଗାଁ ଲଙ୍ଗୱାଠାରେ ମଧ୍ୟ ଅବସ୍ଥା ସମାନ।

ଏଠାରେ ଅଧିକାଂଶଙ୍କ ଘର ପାହାଡ ଓ ଖାଲ ମଧ୍ୟରେ ରହିଛି  । ଭାରତ ଓ ମିଆଁମାର ସୀମା ମଧ୍ୟ ଏହି ଖାଲ ଓ ଘର ଭିତର ଦେଇ ଯାଇଛି  ।ଏହି ସୀମାରେ ଅବସ୍ଥିତ ୫୦୦ରୁ ଅଧିକ ଗାଁରେ ସମାନ ସ୍ଥିତି ଦେଖାଯାଉଛି। ଜଣେ ଅଧିକାରୀଙ୍କ କହିବାନୁସାରେ, ସେଠାରେ ଦୁଇ ହଜାରରୁ ଅଧିକ ଘର ଅଛି ଯେଉଁଥିରେ ଦୁଇ ଦେଶର ସୀମା ରହିଛି ।

ବର୍ତ୍ତମାନ ଖାଲି ଥିବା ଜମିରେ ତାରବାଡ ଘେରେଇବା ସମ୍ଭବ, କିନ୍ତୁ ଦୁଇ ଦେଶ ମଧ୍ୟରେ ଭାଗ କରିବାବେଳେ ଗୋଟିଏ ଘରେ କିପରି ତାରବାଡ ଘେରାଯିବ ତାହା କଷ୍ଟକର  । ଏହି ଅସୁବିଧା ହେତୁ ମଣିପୁରରେ ପ୍ରାୟ ୧୦ କିଲୋମିଟର ତାରବାଡ଼ ଲଗାଇବା ପରେ ବର୍ତ୍ତମାନ କାମ ବନ୍ଦ ରହିଛି।

ଉଭୟ ଦେଶର ସୀମାରେ ଅବସ୍ଥିତ ଏହି ଗ୍ରାମଗୁଡ଼ିକର ଇତିହାସ ଶହ ଶହ ବର୍ଷ ପୁରୁଣା  । ବିଶେଷକରି କନିଆକ ନାଗା ଜନଜାତିର ଲୋକମାନେ ଲଙ୍ଗୱାରେ ରୁହନ୍ତି  । ଗୋଟିଏ ସମୟରେ ଏହି ଜାତିର ଲୋକଙ୍କୁ ହେଡ୍ ହଣ୍ଟର ବା ମୁଣ୍ଡ ଶିକାରୀ ବୋଲି କୁହାଯାଉଥିଲା । କାରଣ ସେମାନେ ଶତ୍ରୁମାନଙ୍କର ମୁଣ୍ଡ କାଟି ନିଜ ଘର ବାହାରେ ଟାଙ୍ଗୁ ଥିଲେ ।

ରାଜା ଫୱାଙ୍ଗ କୁହନ୍ତି ଯେ ତାଙ୍କ ଗାଁର ୨୦ କିଲୋମିଟର ସୀମା ମିଆଁମାର ସହିତ ସଂଯୁକ୍ତ। ସେ ନିଜେ ୩୩ ଟି ଗାଁକୁ ଶାସନ କରନ୍ତି। ସେଥିମଧ୍ୟରୁ 7 ଟି ଗାଁ ଅରୁଣାଚଳ ପ୍ରଦେଶରେ ଅଛି  । ମଣିପୁର ରାଜ୍ୟରେ କିଛି ଗାଁ ଏବଂ ମିଆଁମାରରେ ମଧ୍ୟ କିଛି ଗାଁ ଅଛି  । କେବଳ ଏତିକି ନୁହେଁ, ଏଠାରେ ୩୫୦୦ ଭୋଟର ନାଗାଲାଣ୍ଡର ଫୋମିଂ ଆସନ ପାଇଁ ଭୋଟ୍ ଦିଅନ୍ତି ଏବଂ ମିଆଁମାର ସରକାର ଚୟନ କରିବାକୁ ପ୍ରାୟ ୧୩୦୦ ଭୋଟର ମଧ୍ୟ ଭୋଟ୍ ଦେଇଛନ୍ତି।  ଭାରତ ସରକାର ସୀମାରେ ତାରବାଡ଼ ଘେରାଉ କରୁଛନ୍ତି। ଯଦି ଏହା ସଫଳ ହୁଏ ତେବେ ସେମାନେ ତାଙ୍କ ସମ୍ପର୍କୀୟଙ୍କ ଠାରୁ ଦୂରେଇ ଯିବେ ବୋଲି ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି  ।