ବଜ୍ରପାତରେ ୧୦ ମୃତ

ଛପରା: ବିହାରର ଛପରା  ସ୍ଥିତ ମୁଫାସିଲ ପୋଲିସ ଷ୍ଟେସନର ଖାଲପୁରା ଦିଆରା ଅଞ୍ଚଳରେ ବଜ୍ରପାତରେ ୧୦ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଏଥିସହିତ ଅଧା ଡଜନରୁ ଅଧିକ ଲୋକ ଆହତ ହୋଇଛନ୍ତି । ରବିବାର ସକାଳେ ମିଳିଥିବା ସୂଚନା ଅନୁଯାୟୀ ପୋଟଳ ଚାଷ ପାଇଁ କିଛି ଗ୍ରାମବାସୀ ସକାଳେ ଦିଆରା ଅଞ୍ଚଳରେ ପହଞ୍ଚିଥିଲେ । ଏହି ସମୟ ମଧ୍ୟରେ ପ୍ରବଳ ବଜ୍ରପାତ ଏବଂ ବର୍ଷା ଆରମ୍ଭ ହୋଇଥିଲା । ଏହି କାରଣରୁ ସମସ୍ତ ଲୋକ ନିକଟସ୍ଥ ଏକ ଚାଳ ଘରରେ ଏକାଠି ହୋଇଥିଲେ । ଏହି ସମୟରେ ଏକ ଶକ୍ତିଶାଳୀ ବଜ୍ରପାତ ଚାଳ ଘର ଉପରେ ପଡିଥିଲା, ଯାହାର ଶିକାର ହୋଇଥିଲେ ଏହି ଗ୍ରାମବାସୀମାନେ ।

ଅନେକ ଆହତଙ୍କୁ ଛାପରା ସଦର ଡାକ୍ତରଖାନାକୁ ଅଣାଯାଇଥିଲା । ଏହି ଘଟଣା ସମ୍ପର୍କରେ ସୂଚନା ପାଇବା ପରେ ସିଭିଲ ସର୍ଜନ ଡାକ୍ତର ମାଧେଶ୍ୱର ଝା ଏବଂ ସଦର ଡାକ୍ତରଖାନାର ଡେପୁଟି ସୁପରିଟେଣ୍ଡେଣ୍ଟ ଡାକ୍ତର ରାମ ଇକବାଲ ପ୍ରସାଦ ଘଟଣାସ୍ଥଳରେ ପହଞ୍ଚିଥିଲେ । ବଜ୍ରପାତ ଯୋଗୁଁ ଆହତମାନଙ୍କ ପାଇଁ ତୁରନ୍ତ ଚିକିତ୍ସା ଆରମ୍ଭ ହୋଇଥିଲା । ସଦର ଏସଡିପିଓ ଅଜୟ କୁମାର ମଧ୍ୟ ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ଘଟଣାସ୍ଥଳରେ ପହଞ୍ଚିଛନ୍ତି ।