ଦିଲ୍ଲୀରେ କୋରୋନା ଆକ୍ରାନ୍ତଙ୍କ ସଂଖ୍ୟା ଛୁଇଁଲା ପ୍ରାୟ ୧ ଲକ୍ଷ, ୩ ହଜାର ଟପିଲା ମୃତ୍ୟୁ ସଂଖ୍ୟା

ନୂଆଦିଲ୍ଲୀ: ଦେଶରେ କୋରୋନା ଭୂତାଣୁର ଆତଙ୍କ କ୍ରମାଗତ ଭାବେ ବୃଦ୍ଧି ପାଉଛି । ଭାରତରେ କୋରୋନା ସଂକ୍ରମିତ ସଂଖ୍ୟା ୬ ଲକ୍ଷ ୭୪ ହଜାରରେ ପହଞ୍ଚିଛି । ଦେଶରେ ଏପର୍ଯ୍ୟନ୍ତ ୧୯ ହଜାର ୨୦୦ରୁ ଅଧିକ ସଂକ୍ରମିତଙ୍କର ମୃତ୍ୟୁ ଘଟିଛି । ଅନ୍ୟପକ୍ଷେ ଏହି ସମୟରେ ଦିଲ୍ଲୀରେ କୋରୋନା ସଂକ୍ରମିତ ସଂଖ୍ୟା ପ୍ରାୟ ପାଖାପାଖି ୧ ଲକ୍ଷରେ ପହଞ୍ଚିଛି । ଦିଲ୍ଲୀ ସରକାରଙ୍କ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଦେଶର ରାଜଧାନୀରେ ୨,୨୪୪ ନୂଆ କୋରୋନା ସଂକ୍ରମିତ ମାମଲା ଚିହ୍ନଟ ହୋଇଛି । ଅନ୍ୟପକ୍ଷେ ଦିଲ୍ଲୀରେ ଗତ ୨୪ ଘଣ୍ଟା ମଧ୍ୟରେ ୬୩ ଜଣ ସଂକ୍ରମିତ ପ୍ରାଣ ହରାଇଛନ୍ତି । 

ଏହା ସହିତ ଦିଲ୍ଲୀରେ ବର୍ତ୍ତମାନ ପର୍ଯ୍ୟନ୍ତ ୯୯,୪୪୪ କୋରୋନା ସଂକ୍ରମିତଙ୍କୁ ଚିହ୍ନଟ କରାଯାଇଛି ।  ଏହାସହ ଏପର୍ଯ୍ୟନ୍ତ ୩,୦୬୭ ଜଣ ସଂକ୍ରମିତଙ୍କର ମୃତ୍ୟୁ ଘଟିଛି । ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀରେ ୩,୦୮୩ ରୋଗୀ ଆରୋଗ୍ୟ ଲାଭ କରିଛନ୍ତି । ଏହାସହ ବର୍ତ୍ତମାନ ପର୍ଯ୍ୟନ୍ତ ରାଜଧାନୀରେ ୭୧,୩୩୯ କୋରୋନା ସଂକ୍ରମିତ ଏହି ମହାମାରୀ ଭାଇରସକୁ ମାତ୍ ଦେବାରେ ସଫଳ ହୋଇଛନ୍ତି ।

ଅନ୍ୟପଟେ ଦିଲ୍ଲୀ ସରକାର, କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ, ଏନସିଡିସି, ଆଇସିଏମଆର ଏବଂ ଏନଆଇଟି ଆୟୋଗ କୋରୋନା ଭାଇରସ ସମ୍ବନ୍ଧରେ ବର୍ତ୍ତମାନର ରଣନୀତି ବଦଳାଇବାକୁ ଯୋଜନା ପ୍ରସ୍ତୁତ କରିଛନ୍ତି । ଏହି ଯୋଜନା ଅନୁଯାୟୀ, ଦିଲ୍ଲୀର ସମସ୍ତ ଘରରେ ଡୋର ଟୁ ଡୋର ସର୍ଭେ କରିବା ଏକ ଭଲ ବିକଳ୍ପ ନୁହେଁ, କିନ୍ତୁ ଦିଲ୍ଲୀର ଜନସଂଖ୍ୟାକୁ ୩ ଭାଗରେ ବିଭକ୍ତ କରି ଏହି କାର୍ଯ୍ୟ କରାଯାଇପାରିବ ।