ରାଜଧାନୀରେ ୮୩ ହଜାର ଟପିଲା କୋରୋନା ସଂକ୍ରମିତଙ୍କ ସଂଖ୍ୟା, ୨୬୦୦ରୁ ଉର୍ଦ୍ଧ୍ୱ ମୃତ୍ୟୁ

ନୂଆଦିଲ୍ଲୀ: କୋରୋନା ଭାଇରସ ଦେଶରେ ଆତଙ୍କ ସୃଷ୍ଟି କରୁଛି । ଭାରତରେ ୫ ଲକ୍ଷ ୨୮ ହଜାରରୁ ଅଧିକ କୋରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଏହାସହ ଏପର୍ଯ୍ୟନ୍ତ ୧୬ ହଜାରରୁ ଅଧିକ କୋରୋନା ସଂକ୍ରମିତ ଲୋକ ପ୍ରାଣ ହରାଇଛନ୍ତି । ଏହି ସମୟରେ ଦେଶର ରାଜଧାନୀରେ କୋରୋନା ସଂକ୍ରମିତଙ୍କ ସଂଖ୍ୟା ୮୩ ହଜାରରୁ ଅଧିକ ହୋଇଯାଇଛି । ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀରେ ୨,୮୮୯ ନୂତନ କୋରୋନା ମାମଲା ଚିହ୍ନଟ ହୋଇଛି । ଏହି ସମୟ ମଧ୍ୟରେ ୬୫ ଜଣ ସଂକ୍ରମିତ ପ୍ରାଣ ହରାଇଛନ୍ତି । ଦିଲ୍ଲୀରେ ସଂକ୍ରମିତଙ୍କ ସଂଖ୍ୟା ବର୍ତ୍ତମାନ ୮୩,୦୭୭ରେ ପହଞ୍ଚିଛି । ଏପର୍ଯ୍ୟନ୍ତ ଏଠାରେ ୨,୬୨୩ ଜଣ ସଂକ୍ରମିତଙ୍କର ମୃତ୍ୟୁ ହୋଇଛି । ଗତ ୨୪ ଘଣ୍ଟା ବିଷୟରେ କହିବାକୁ ଗଲେ ଦିଲ୍ଲୀରେ ୩,୩୦୬ କୋରୋନା ସଂକ୍ରମିତ ଆରୋଗ୍ୟ ଲାଭ କରିଛନ୍ତି । ଫଳରେ ରାଜଧାନୀରେ ଏପର୍ଯ୍ୟନ୍ତ ୫୨ ହଜାର ୬୦୭ କୋରୋନା ସଂକ୍ରମିତ ସୁସ୍ଥ ହୋଇ ନିଜ ଘରକୁ ଯାଇଛନ୍ତି ।

ଅନ୍ୟପକ୍ଷରେ ଦିଲ୍ଲୀର କୋଭିଡ-19 କଣ୍ଟେନମେଣ୍ଟ ଜୋନର ସଂଖ୍ୟା ୨୮୦ରୁ ବୃଦ୍ଧି ୪୧୭କୁ ପହଞ୍ଚିଛି । ଗୃହ ମନ୍ତ୍ରଣାଳୟର ଆଦେଶ ପରେ ଦିଲ୍ଲୀର କଣ୍ଟେନମେଣ୍ଟ ଜୋନକୁ ରିଡିଜାଇନ୍ କରିବା ପରେ ଏହି ସଂଖ୍ୟା ବୃଦ୍ଧି ପାଇଛି । ବର୍ତ୍ତମାନ ମଧ୍ୟ କିଛି କଣ୍ଟେନମେଣ୍ଟ ଜୋନକୁ ରିଡିଜାଇନ୍ କରିବାର କାର୍ଯ୍ୟ ଜାରି ରହିଛି । ଏଭଳି ପରିସ୍ଥିତିରେ ଦିଲ୍ଲୀରେ କଣ୍ଟେନମେଣ୍ଟର ଜୋନ୍ ସଂଖ୍ୟା ଆହୁରି ବଢ଼ିବାର ସମ୍ଭାବନା ରହିଛି ।