ଏବେ ଚୀନ ତୁଳନାରେ ୬୮୬ ଗୁଣ ଅଧିକ ଆକ୍ସିଭ କେସ୍ ଆମ ଦେଶରେ

ଭୁବନେଶ୍ୱର: କୋରୋନା ଭାଇରସର ଉତ୍ପତ୍ତି ସ୍ଥଳ ଚୀନ । ଏହି ଦେଶର ଉହାନ ସହରରେ ଦିନେ ତାଣ୍ଡବ ରଚୁଥିଲା ମହାମାରୀ କୋରୋନା । ସେତେବେଳେ ଭାରତରେ ଏହାର କୌଣସି ପ୍ରଭାବ ନଥିଲା । ହେଲେ ଏବେ ଚିତ୍ର ଓଲଟି ଯାଇଛି । କୋରୋନାକୁ ନିୟନ୍ତ୍ରଣକୁ ନେଇଯାଇଛି ଚୀନ, ମୁକାବିଲା କରୁଛି ଭାରତ । ଚୀନରେ ଏବେ ଆକ୍ସିଭ କେସ୍ ୧୦୦ରୁ ମଧ୍ୟ କମ୍, ହେଲେ ଆମ ରାଜ୍ୟ ଓଡ଼ିଶାରେ ଏହା ୬ଶହ ଉପରେ ରହିଛି । ଆଉ ଭାରତରେ ତ ଏହି ସଂଖ୍ୟା ୫୬ ହଜାର ପାର୍ କରିସାରିଲାଣି । 

ଏବେ ଏକ ତୁଳନାତ୍ମକ ଚିତ୍ର ଦେଖିବା । ଚୀନରେ ଏବେ ମାତ୍ର ୮୨ ଜଣ ସକ୍ରିୟ ଆକ୍ରାନ୍ତ ରହିଛନ୍ତି । ହେଲେ ଆମ ରାଜ୍ୟ ଓଡ଼ିଶାରେ ଏବେ ସକ୍ରିୟ ଆକ୍ରାନ୍ତଙ୍କ ସଂଖ୍ୟା ରହିଛି ୬୫୨ । ଅର୍ଥାତ ଚୀନ ତୁଳନାରେ ଆମ ରାଜ୍ୟରେ ପାଖାପାଖ ୮ ଗୁଣ ଆକ୍ସିଭ କେସ୍ ରହିଛି । ଏବେ ଭାରତର ଆକ୍ସିଭ କେସ୍ ଉପରେ ନଜର ପକାଇବା । ଦେଶରେ ଆଜି କୋରୋନା ଆକ୍ସିଭ କେସ୍ ସଂଖ୍ୟା ୫୬୩୧୬ ରହିଛି । ଚୀନ ତୁଳନାରେ ଏହା ୬୮୬ ଗୁଣରୁ ବି ଅଧିକ । 

ଏବେ ବିଶ୍ୱର ସବୁଠୁ ଶକ୍ତିଶାଳୀ ରାଷ୍ଟ୍ର ଆମେରିକା ଉପରେ ନଜର ପକାଇବା । କୋରୋନା ଯୋଗୁ ସବୁଠୁ ଅଧିକ ପ୍ରଭାବିତ ହୋଇଛି ଆମେରିକା । ଏବେ ଏହି ଦେଶରେ ୧୦ଲକ୍ଷ ୯୦ ହଜାର ୨୯୭ଟି ଆକ୍ସିଭ କେସ୍ ରହିଛି । ଅନ୍ୟପଟେ ଚୀନରେ ମାତ୍ର ୮୨ । ଅର୍ଥାତ ଚୀନରେ ଏବେ ଯେତିକି ସକ୍ରିୟ ମାମଲା, ସେ ତୁଳନାରେ ଆମେରିକାରେ ୧୩୨୯୬ ଗୁଣରୁ ବି ଅଧିକ ସକ୍ରିୟ ମାମଲା ରହିଛି । ଏ ତୁଳନାତ୍ମକ ଚିତ୍ର ଏଇଥି ପାଇଁ ଯେ, ଯେଉଁଠି କୋରୋନା ଠାବ ହୋଇଥିଲା, ସେ ଦେଶ ତ ବର୍ତ୍ତିଗଲା । ହେଲେ ସମଗ୍ର ବିଶ୍ୱ ଏବେ ତ୍ରାହି ଡାକୁଛି ।