କୋରୋନାକୁ ନେଇ ଖୁସି ଖବର ଦେଲା ସ୍ୱାସ୍ଥ୍ୟ ମନ୍ତ୍ରଣାଳୟ

ଜିନୁ ଜେନା, ନୂଆଦିଲ୍ଲୀ: କୋରୋନା (COVID-19 ) ସଂକଟ କାଳରେ ପ୍ରଭାବଶାଳୀ ଟିକା ଆସିନଥିବା ବେଳେ ସବୁଠୁ ଏକ ବଡ଼ ତଥା ଆତ୍ମସନ୍ତୋଷ ଦେଲା ଭଲି ଖବର ଆସି ପହଞ୍ଚିଛି । ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ସୂଚନା ଅନୁଯାୟୀ ଦେଶରେ କୋରୋନାରୁ ଆରୋଗ୍ୟ ସଂଖ୍ୟା ଏବେ ସୁଦ୍ଧା ୫୦ ଲକ୍ଷ ଅତିକ୍ରମ କରିଛି । କେବଳ ଗତ ୧୧ ଦିନରେ ୧୦ ଲକ୍ଷ କୋରୋନା ରୋଗୀ ସୁସ୍ଥ ହୋଇଛନ୍ତି । ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ଦିଆ ୟାଇଥିବା ତଥ୍ୟ ଅନୁଯାୟୀ ସୁସ୍ଥ ସଂଖ୍ୟା ଜୁନ୍ ୩ରୁ କ୍ରମାଗତ ଭାବେ ବୃଦ୍ଧି ପାଇଛି। ଜୁନ୍ ୩ ତାରିଖ ଭାରତରେ ମୋଟ ସୁସ୍ଥ ସଂଖ୍ୟା ୧ ଲକ୍ଷ ରେକର୍ଡ ଥିବା ବେଳେ ସେହି ସଂଖ୍ୟା  ସେପ୍ଟେମ୍ବର ୨୮ ଅର୍ଥାତ୍ ଆଜି ସୁଦ୍ଧା ୫୦ ଲକ୍ଷ ଛୁଇଁଛି।

ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି, ''ଦେଶରେ ପ୍ରତିଦିନ ୯୦ ହଜାରରୁ ଅଧିକ ରୋଗୀ ସୁସ୍ଥ ହେବାରେ ଲାଗିଛନ୍ତି । ସୁସ୍ଥ ସଂଖ୍ୟା ସକ୍ରିୟ କୋରୋନା ସଂକ୍ରମଣ ଠାରୁ ୫ ଗୁଣା ଅଧିକ ରହିଛି।'' ମନ୍ତ୍ରଣାଳୟ ଏକ ଟୁଇଟ୍ ଜରିଆରେ କହିଛି ଯେ, 'ଉନ୍ନତ ଚିକିତ୍ସା ଭିତ୍ତିଭୂମି, ଷ୍ଟାଣ୍ଡାର୍ଡ ଟ୍ରିଟମେଣ୍ଟ ପ୍ରୋଟୋକଲ୍ ଲାଗୁ, ଡାକ୍ତର, ପାରାମେଡିକାଲ ଏବଂ ଫ୍ରଣ୍ଟଲାଇନ କର୍ମଚାରୀଙ୍କ ପୂର୍ଣ୍ଣ ଉତ୍ସର୍ଗୀକୃତ ଏବଂ ପ୍ରତିବଦ୍ଧତା ପାଇଁ ଏହି ସଫଳତା ମିଳିଛି।

ରବିବାର ଦିନ, ୯୨ ହଜାର ୪୩ ଜଣ ସୁସ୍ଥ ହୋଇଥିଲେ । ଯେଉଁଥିରୁ ୭୬% ସୁସ୍ଥ ମାମଲା 10ଟି ରାଜ୍ୟ / ୟୁଟିରୁ ଆସିଛି । ଏହି ସବୁ ରାଜ୍ୟ ଗୁଡ଼ିକ ହେଲେ ମହାରାଷ୍ଟ୍ର, ଆନ୍ଧ୍ରପ୍ରଦେଶ, ଉତ୍ତରପ୍ରଦେଶ, ତାମିଲନାଡୁ, କର୍ଣ୍ଣାଟକ, ଓଡିଶା, ଦିଲ୍ଲୀ, ଛତିଶଗଡ, କେରଳ, ପଶ୍ଚିମବଙ୍ଗ । ଏହି ସୁସ୍ଥ ହାର ଆଗାମୀ ଦିନରେ ଆହୁରି ବଢିବ ।