କୋରୋନା ମହାସଙ୍କଟ: ଇଟାଲୀରେ ୧୪ ହଜାରରୁ ଉର୍ଦ୍ଧ୍ୱ ଲୋକଙ୍କ ମୃତ୍ୟୁ

ରୋମ: କୋରୋନା ଭାଇରସ ବା କୋଭିଡ-19 ସମଗ୍ର ବିଶ୍ୱରେ ମୃତ୍ୟୁର ତାଣ୍ଡବଲୀଳା ଜାରି ରଖିଛି । ଏହି ମହାମାରୀ ଯୋଗୁଁ ଆଜି ଅର୍ଥାତ ଶନିବାର ବର୍ତ୍ତମାନ ଯାଏ ୬୦ ହଜାରରୁ ଉର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଛି । ୧୧ ଲକ୍ଷରୁ ଉର୍ଦ୍ଧ୍ୱ ଲୋକ ଏହି କୋରୋନା ଭାଇରସ ଦ୍ୱାରା ସଂକ୍ରମିତ ହୋଇଛନ୍ତି । କେବଳ ଇଟାଲୀରେ ଏହି ମହାମାରୀ ଭାଇରସ ଯୋଗୁଁ ୧୪ ହଜାରରୁ ଉର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଛି । ଅନ୍ୟପଟେ ଆମେରିକାରେ ମଧ୍ୟ କୋରୋନା ତାଣ୍ଡବ ଜାରି ରଖିଛି । ବିଗତ ୨୪ ଘଣ୍ଟାରେ ଆମେରିକାରେ ୧୪୮୦ ଲୋକଙ୍କ ମୃତ୍ୟୁ ଘଟିଛି । 

ସେହିପରି ୟୁରୋପ ମହାଦେଶରେ କୋରୋନା ସର୍ବାଧିକ କ୍ଷତି ପହଞ୍ଚାଇଛି । ଇଟାଲୀ ପରେ ସ୍ପେନରେ ସର୍ବାଧିକ କୋରୋନା ଯୋଗୁଁ ଲୋକଙ୍କ ମୃତ୍ୟୁ ଘଟିଛି । ବର୍ତ୍ତମାନ ଯାଏ ସ୍ପେନରେ ୧୧ ହଜାରରୁ ଉର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଛି । ଏହାସହ ସ୍ପେନରେ କୋରୋନା ଆକ୍ରାନ୍ତଙ୍କ ସଂଖ୍ୟା ୧ ଲକ୍ଷ ୧୯ ହଜାର  ୧୯୯ ପହଞ୍ଚିଛି । ଏଥିରୁ ୩୦ ହଜାର ୫୧୪ କୋରୋନା ଆକ୍ରାନ୍ତ ସୁସ୍ଥ ମଧ୍ୟ ହୋଇଛନ୍ତି । 

ଋଷରେ ବିଗତ ୨୪ ଘଣ୍ଟାରେ ୫୮୨ କୋରୋନା ପଜିଟିଭ ମାମଲା ସାମ୍ନାକୁ ଆସିଛି । ଋଷ କୋରୋନା ମୁକାବିଲା ପାଇଁ ଆମେରିକା ଓ ୟୁରୋପ ପରି ଦେଶରେ ଲକ୍ ଡାଉନ୍ ଲାଗୁ କରିଛି । ତଥାପି ଋଷରେ କୋରୋନା ଆକ୍ରାନ୍ତଙ୍କ ସଂଖ୍ୟାରେ ବୃଦ୍ଧି ଦେଖା ଦେଉଛି । ଋଷରେ ବର୍ତ୍ତମାନ ଯାଏ ୪ ହଜାରରୁ ଉର୍ଦ୍ଧ୍ୱ କୋରୋନା ଆକ୍ରାନ୍ତଙ୍କୁ ଚିହ୍ନଟ କରାଯାଇଛି । 

ଅନ୍ୟପଟେ ଆମେରିକାର ନ୍ୟୁୟର୍କ ସହରରେ କୋରୋନାର ଧ୍ୱଂସଲୀଳା ଜାରି ରହିଛି । ବିଗତ ୨୪ ଘଣ୍ଟାରେ ୫୬୨ କୋରୋନା ଆକ୍ରାନ୍ତଙ୍କ ମୃତ୍ୟୁ ଘଟିଛି । ଯଦି ସଂଖ୍ୟାକୁ ଦେଖିବା ତେବେ ନ୍ୟୁୟର୍କରେ ପ୍ରତି ଅଢ଼େଇ ମିନିଟରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟୁଛି । ଏହି ସହରରେ କୋରୋନା ସଂକ୍ରମିତଙ୍କ ସଂଖ୍ୟା ୧ ଲକ୍ଷ ପହଞ୍ଚି ଯାଇଛି ।