ଚାଇନା ବିରୋଧରେ ଗର୍ଜିଲେ ପିଓକେବାସୀ

ମୁଜାଫରବାଦ: ପିଓକେରେ ଚାଇନା ଓ ପାକିସ୍ତାନ ବିରୋଧରେ ବିକ୍ଷୋଭ । ନୀଲମ ଓ ଜେଲମ ନଦୀରେ ବେଆଇନ ଡ୍ୟାମ ନିର୍ମାଣ ବିରୋଧରେ ବିକ୍ଷୋଭ ପ୍ରଦର୍ଶନ କରିଛନ୍ତି ପିଓକେବାସୀ ।  ନୀଲମ ଜେଲମ ଏବଂ କୋହଲା ହାଇଡ୍ରୋ ପାୱାର ପ୍ରୋଜେକ୍ଟ ବିରୋଧରେ ସ୍ୱର ଉତ୍ତୋଳନ କରିଛନ୍ତି ଶହ ଶହ ଲୋକ । ଉଭୟ ପ୍ରକଳ୍ପକୁ ବନ୍ଦ କରିବାକୁ ଦାବି କରିଛନ୍ତି ଆନ୍ଦୋଳନକାରୀ । 

ସୋମବାର ଶହ ଶହ ସଂଖ୍ୟାରେ ପିଓକେବାସୀ ବିକ୍ଷୋଭ ପ୍ରଦର୍ଶନ କରିଥିଲେ । ନୀଲମ ଜେଲମ ଏବଂ କୋହଲା ହାଇଡ୍ରୋ ପାୱାର ପ୍ରୋଜେକ୍ଟର ବେଆଇନ ନିର୍ମାଣକୁ କଡ଼ା ବିରୋଧ କରିଥିଲେ ଆନ୍ଦୋଳନକାରୀ । ଉଭୟ ପାକିସ୍ତାନ ଓ ଚାଇନା ଦ୍ୱାରା ନିର୍ମାଣ ହେଉଥିବା ଏହି ପ୍ରକଳ୍ପ ଯୋଗୁ ପରିବେଶ ଉପରେ କୁପ୍ରଭାବ ପଡ଼ିବ ବୋଲି ଏଠାରେ କୁହାଯାଇଛି । 

ସେହିପରି ସୋସିଆଲ ମିଡିଆରେ ମଧ୍ୟ ଏହା ବିରୋଧରେ ଏକ କ୍ୟାମ୍ପେନ ଆରମ୍ଭ ହୋଇଛି । #SaveRiversSaveAJK ମଧ୍ୟ ଟ୍ୱିଟରରେ ଟ୍ରେଣ୍ଡ କରାଇଥିଲେ ଆନ୍ଦୋଳନକାରୀ । ଏହାରି ମାଧ୍ୟମରେ ଗ୍ଲୋବାଲ ପ୍ଲାଟଫର୍ମରେ ସମସ୍ତଙ୍କ ଦୃଷ୍ଟି ଆକର୍ଷଣ କରାଯାଇଛି । 

କେଉଁ ଆଇନ ଆଧାରରେ ବିବାଦୀୟ କ୍ଷେତ୍ରରେ ପାକିସ୍ତାନ ଓ ଚୀନ ମଧ୍ୟରେ ପ୍ରକଳ୍ପ ନିର୍ମାଣ ପାଇଁ ଚୁକ୍ତି ହୋଇଛି ବୋଲି ଆନ୍ଦୋଳନକାରୀ ପ୍ରଶ୍ନ ଉଠାଇଛନ୍ତି । ଏପରିକି ପ୍ରକଳ୍ପ କାର୍ଯ୍ୟ ବନ୍ଦ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ଚେତାବନୀ ମଧ୍ୟ ଦେଇଛନ୍ତି । 

କହିରଖୁଛୁ, ନିକଟରେ ଚାଇନିଜ କମ୍ପାନୀ, ଚାଇନା ଓ ପାକିସ୍ତାନ ସରକାର ମଧ୍ୟରେ ଏକ ଚୁକ୍ତି ସ୍ୱାକ୍ଷରିତ ହୋଇଛି । ଏହି ଚୁକ୍ତି ଅନୁସାରେ ୨.୪ ବିନିୟନ ଡଲାର ବ୍ୟୟରେ ୧୧୨୪ ମେଗାୱାଟ ହାଇଡ୍ରୋ ପାୱାର ପ୍ଲାଣ୍ଟ ନିର୍ମାଣ କରୁଛି ଚାଇନା କମ୍ପାନୀ ।