ଅନୁପମ୍ ଖେରଙ୍କ ମାଆ, ଭାଇ, ଭାଉଜ ଓ ଝିଆରୀଙ୍କୁ କୋରୋନା

ମୁମ୍ବାଇ: ସିନେ ଜଗତର ଗୋଟିଏ ପରେ ଗୋଟିଏ ପରିବାରକୁ ବ୍ୟାପିଲାଣି କୋରୋନା । ଗତକାଲି ବିଗ୍ ଓ ଅମିତାଭ ବଚ୍ଚନ ଓ ତାଙ୍କ ପୁଅ ଅଭିଷେକ ବଚ୍ଚନ କୋରୋନା ପଜିଟିଭ ଟିହ୍ନଟ ହେବା ପରେ ଆଜି ଅଭିନେତା ଅନୁପମ୍ ଖେରଙ୍କ ମାଆ କୋରୋନା ପଜିଟିଭ ବୋଲି ସ୍ପଷ୍ଟ ହୋଇଛି । କେବଳ ଅନୁପମଙ୍କ ମାଆ କାହିଁକି, ଭାଇ, ଭାଉଜ ଓ ଝିଆରୀ ମଧ୍ୟ କୋଭିଡ ୧୯ ପଜିଟିଭ ଚିହ୍ନଟ ହୋଇଛନ୍ତି । ଟ୍ୱିଟରରେ ଏକ ଭିଡିଓ ମାଧ୍ୟମରେ ଏନେଇ ସୂଚନା ଦେଇଛନ୍ତି ଅନୁପମ୍ ଖେର । 

ଅନପମ୍ ଖେର୍ କହିଛନ୍ତି, ବେଶ କିଛି ଦିନ ହେବ ମୋ ମାଆଙ୍କୁ ଭୋକ ହେଉନଥିଲା । ପରବର୍ତ୍ତୀ ସମୟରେ କୋଭିଡ ୧୯ ଟେଷ୍ଟ କରିବାରୁ ପଜିଟିଭ ବୋଲି ଜଣାପଡ଼ିଥିଲା । ଏହା ଜାଣିବା ପରେ ମୁଁ ଓ ମୋ ଭାଇ ମଧ୍ୟ କୋରୋନା ଟେଷ୍ଟ କରିଥିଲୁ । ତେବେ ମୁଁ ନେଗେଟିଭ ଥିବା ବେଳେ ଭାଇ ପଜିଟିଭ ବୋଲି ଜଣାପଡ଼ିଛି ବୋଲି କହିଛନ୍ତି ଅନୁପମ୍ । 

ସେହିପରି ଭାଇଙ୍କ ପରିବାରର ସମସ୍ତ ସଦସ୍ୟଙ୍କ ମଧ୍ୟ ସ୍ୱାବ ଟେଷ୍ଟ କରାଯାଇଛି । ତେବେ ଭାଇଙ୍କ ସମେତ ଭାଉଜ ଓ ଝିଆରୀ ମଧ୍ୟ କୋରୋନା ଆକ୍ରାନ୍ତ ହୋଇଛନ୍ତି । ହେଲେ ପୁତୁରା କୋରୋନା ନେଗେଟିଭ ବୋଲି କହିଛନ୍ତି ଅନୁପମ୍ । 

ତେବେ ଟ୍ୱିଟରରେ ଭିଡିଓ ପୋଷ୍ଟ କରି ସେ ଏକ ଅନୁରୋଧ ମଧ୍ୟ କରିଛନ୍ତି । ଯଦି ପରିବାରର ବୟସ୍କ ସଦସ୍ୟଙ୍କୁ ଭୋକ ହେଉନାହିଁ, ତେବେ ଥରେ କୋରୋନା ଟେଷ୍ଟ କରିଦେବାକୁ କହିଛନ୍ତି ବଲିଉଡର ଏହି ବରିଷ୍ଠ ଅଭିନେତା ।