ଦିଲ୍ଲୀରେ କୋରୋନା ସ୍ଥିତିରେ ସୁଧାର, ମୁଖ୍ୟମନ୍ତ୍ରୀ କହିଲେ...

ନୂଆଦିଲ୍ଲୀ: ଦିଲ୍ଲୀରେ କୋରୋନା ସ୍ଥିତିରେ ପୂର୍ବାପେକ୍ଷା ବହୁ ସୁଧାର ଆସିଛି । ବୁଧବାର ସାମ୍ବାଦିକ ସମ୍ମିଳନୀରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏପରି କହିଛନ୍ତି । ସମସ୍ତେ ଆମର ସାହାଯ୍ୟ କରିଛନ୍ତି ବୋଲି କହିଛନ୍ତି କେଜ୍ରିୱାଲ । ପ୍ରତ୍ୟେକ ଦିନ ରୋଗୀଙ୍କ ସଂଖ୍ୟାରେ ହ୍ରାସ ଘଟୁଛି । ଦିଲ୍ଲୀରେ ୧୫ ହଜାର ଶଯ୍ୟାର ବ୍ୟବସ୍ଥା କରାଯାଇଛି । ଏବେ ଦିଲ୍ଲୀର ସ୍ଥିତି ଭୟାନକ ନାହିଁ ବୋଲି କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ । 

କେଜ୍ରିୱାଲ କହିଛନ୍ତି ଯେ ମାସକ ପୂର୍ବରୁ ଯେବେ ଲକଡାଉନ ଖୋଲିଥିଲା, ସେ ସମୟରେ ତୀବ୍ରଗତିରେ କୋରୋନା ବ୍ୟାପୁଥିଲା । କେନ୍ଦ୍ର ସରକାରଙ୍କ ୱେବସାଇଟ ଅନୁସାରେ ଏହା ଆଗକୁ ଭୟଙ୍କର ରୂପ ନେବ ବୋଲି ମନେହେଉଥିଲା । ୩୦ ଜୁନ ମଧ୍ୟରେ କେବଳ ଦିଲ୍ଲୀରେ ଆକ୍ରାନ୍ତଙ୍କ ସଂଖ୍ୟା ୧ ଲକ୍ଷ ପାର ହେବ ବୋଲି ଅନୁମାନ କରାଯାଇଥିଲା । ସେହିପରି ଏହି ସମୟ ମଧ୍ୟରେ ଆକ୍ଟିଭ କେସ ମଧ୍ୟ ୬୦ ହଜାର ପାର କରିଯିବ ବୋଲି ଆଶଙ୍କା ରହିଥିଲା । ସ୍ଥିତିକୁ ଦେଖି ମୁଁ ବିଭିନ୍ନ ସ୍ଥାନରୁ ସାହାଯ୍ୟ ମାଗିଥିଲି ବୋଲି କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ । ଆଜି ମୁଁ ଖୁସି ଯେ, ଆମେ ଯେଉଁ ଆଶଙ୍କା କରୁଥିଲୁ ସେମିତି ହୋଇନାହିଁ । ଏବେ ଦିଲ୍ଲୀରେ କୋରୋନା ସ୍ଥିତିରେ ବହୁତ ସୁଧାର ଆସିଥିବା କହିଛନ୍ତି କେଜ୍ରିୱାଲ । 

ଦିଲ୍ଲୀ ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଛନ୍ତି, ଏବେ ଦିଲ୍ଲୀରେ କେବଳ ୨୬ ହଜାର ଆକ୍ଟିଭ କେସ ରହିଛି । ଆପଣମାନଙ୍କ ସମସ୍ତଙ୍କ ସହଯୋଗ ପାଇଁ ଦିଲ୍ଲୀ ସ୍ଥିତିରେ ଏତେ ସୁଧାର ଆସିଥିବା କହିଛନ୍ତି ଅରବିନ୍ଦ କେଜ୍ରିୱାଲ । ମାସକ ପୂର୍ବରୁ ମାତ୍ର ୩୮ ପ୍ରତିଶତ ଆକ୍ରାନ୍ତ ସୁସ୍ଥ ହୋଇଥିଲେ । ମାତ୍ର ଏବେ ଏହି ସଂଖ୍ୟା ୬୭ ପ୍ରତିଶତରେ ପହଞ୍ଚିଛି । ଗତ ୨୩ ଜୁନରେ ୪ ହଜାର ଆକ୍ରାନ୍ତ ଦିଲ୍ଲୀରୁ ଚିହ୍ନଟ ହୋଇଥିଲେ । ଦିନକରେ ଏତେ ସଂଖ୍ୟକ ଆକ୍ରାନ୍ତ ଚିହ୍ନଟ ହେବା ଦିଲ୍ଲୀ ପାଇଁ ବଡ଼ ଚିନ୍ତାଜନକ ବିଷୟ ଥିଲା । ମାତ୍ର ଗତକାଲି ଏହି ସଂଖ୍ୟା ୨ ହଜାର ରହିଛି ବୋଲି କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ । 

ସେହିପରି ପୂର୍ବରୁ ୧୦୦ଟି ଟେଷ୍ଟରେ ୩୧ଟି କୋରୋନା ଆକ୍ରାନ୍ତ ଚିହ୍ନଟ ହେଉଥିଲେ । ମାତ୍ର ଏବେ ଏହି ସଂଖ୍ୟା ୧୩ ରହିଛି । ତେବେ ଏବେ ଏହି ଭାଇରସକୁ ନେଇ କିଛି କୁହାଯାଇପାରିବ ନାହିଁ । ଏହାକୁ ହାଲୁକା ଭାବେ ନିଆଯିବା ଉଚିତ ନୁହେଁ ବୋଲି କହିଛନ୍ତି କେଜ୍ରିୱାଲ ।