'ଯଦି କେହି ରେଳ ଟ୍ରାକରେ ଶୋଇଯିବ, ତେବେ ତାକୁ କେମିତି ଅଟକାଇ ହେବ ?'

ନୂଆଦିଲ୍ଲୀ: ମହାରାଷ୍ଟ୍ର ଔରଙ୍ଗାବାଦ(Aurangabad) ଜିଲ୍ଲାରେ ରେଳ ଲାଇନ ଦୁର୍ଘଟଣା ମାମଲା । ଏହି ମାମଲାରେ ଟିପ୍ପଣୀ ରଖିଲେ ଦେଶର ସର୍ବୋଚ୍ଚ ନ୍ୟାୟାଳୟ । ସୁପ୍ରିମକୋର୍ଟ କହିଛନ୍ତି, ଯଦି ସେମାନେ ରେଳ ଟ୍ରାକ ଉପରେ ଶୋଇଯିବେ, ତେବେ କିଏ ଏହାକୁ କେମିତି ଅଟକାଇ ପାରିବ ? ରାଜ୍ୟ ସରକାର ପରିବହନର ବ୍ୟବସ୍ଥା କରୁଛନ୍ତି । ମାତ୍ର ଲୋକେ ଚାଲିଚାଲି ଘରକୁ ବାହାରୁଛନ୍ତି । ଏପରି କ୍ଷେତ୍ରରେ କ'ଣ କରାଯାଇପାରିବ ? ସରକାର କେବଳ ଚାଲିଚାଲି ପଳାଉଥିବା ଲୋକଙ୍କୁ ନଯିବା ପାଇଁ ଅନୁରୋଧ କରିପାରିବେ । ତାଙ୍କ ଉପରେ ବଳପ୍ରୟୋଗ କରାଯାଇପାରିବ ନାହିଁ । 

ସୁପ୍ରିମକୋର୍ଟ କେନ୍ଦ୍ର ସରକାରଙ୍କ ଓକିଲ ସଲିସିଟର ଜେନେରାଲଙ୍କୁ ପଚାରିଛନ୍ତି, ରାସ୍ତାରେ ଚାଲି ଚାଲି ଘରମୁହାଁ ହେଉଥିବା ଲୋକଙ୍କୁ କେମିତି ଅଟକେଇ ହେବ ? ସେହିପରି ଏହି ମାମଲାରେ ଦାଖଲ ହୋଇଥିବା ଜନହିତ ଯାଚିକାକୁ ମଧ୍ୟ ଖାରଜ କରିଦେଇଛନ୍ତି ଦେଶର ସର୍ବୋଚ୍ଚ ଅଦାଲତ । 

ଆପଣଙ୍କୁ କହିରଖୁଛୁ, ମହାରାଷ୍ଟ୍ର ଔରଙ୍ଗାବାଦରେ ରେଳ ଲାଇନରେ ୧୬ ଶ୍ରମିକଙ୍କ ଭୟାନକ ମୃତ୍ୟୁ ହୋଇଥିଲା । ପ୍ରବାସୀ ଶ୍ରମିକ ଘର ଅଭିମୁଖେ ଯାଉଥିବା ବେଳେ ରାସ୍ତାରେ ଥକିପଡ଼ି ଟ୍ରାକ ଉପରେ ଶୋଇ ପଡ଼ିଥିଲେ । ଆଉ ରେଳ ଧକ୍କାରେ ଜୀବନ ଯାଇଥିଲା । ଶ୍ରମିକଙ୍କ ଘର ମଧ୍ୟପ୍ରଦେଶରେ । ଏମାନେ ମହାରାଷ୍ଟ୍ରର ଏକ କମ୍ପାନୀରେ କାମ କରୁଥିଲେ । ତେବେ ଲକଡାଉନ୍ ଯୋଗୁ ଫସି ରହିଥିବା ପ୍ରବାସୀ ଶ୍ରମିକ ଶେଷରେ ରେଳ ଟ୍ରାକରେ ଚାଲିଚାଲି ଘରକୁ ଫେରୁଥିବା ବେଳେ ଏଭଳି ଦୁର୍ଘଟଣାର ସାମ୍ନା କରିଥିଲେ ।