ଲକଡାଉନରେ ବିଜେପି କାର୍ଯ୍ୟକର୍ତ୍ତା କରୁଥିଲେ କ'ଣ, ଆସନ୍ତାକାଲି ଦେଖିବେ ମୋଦି

ନୂଆଦିଲ୍ଲୀ: ଲକଡାଉନ ବେଳେ ଭାରତୀୟ ଜନତା ପାର୍ଟି କ'ଣ ସବୁ କରିଛି ? ସାଧାରଣ ଲୋକଙ୍କ ପାଇଁ କେଉଁ ସବୁ ସେବା ଯୋଗାଇଛନ୍ତି ବିଜେପି କାର୍ଯ୍ୟକର୍ତ୍ତା ? ଆସନ୍ତାକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଖରେ ଏହାର ପ୍ରେଜେଣ୍ଟେସନ କରାଯିବ । ଅପରାହ୍ନ ୪ଟାରେ ଏହି ପ୍ରଜେଣ୍ଟେସନ ଦେଖିବେ ପ୍ରଧାନମନ୍ତ୍ରୀ । ଏହି ସମୟରେ ଦଳର ରାଷ୍ଟ୍ରୀୟ ସଭାପତି ଜେପି ନଡ୍ଡା ବିଜେପି ପାର୍ଟି ଅଫିସରେ ଉପସ୍ଥିତ ରହିବେ । ଅନ୍ୟମାନଙ୍କ ମଧ୍ୟରେ କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ, ବାଣିଜ୍ୟ ଓ ପରିବହନ ମନ୍ତ୍ରୀ ନୀତିନ ଗଡକରୀ ପ୍ରମୁଖ ମଧ୍ୟ ଏଥିରେ ସାମିଲ ହେବେ । 

ବିଜେପି ମହାସଚିବ ଅରୁଣ ସିଂହ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗରିବଙ୍କୁ ମାଗଣାରେ ରାସନ ଦେବା ପାଇଁ ଘୋଷଣା କରିଥିଲେ । ଏହା ନଭେମ୍ବର ପର୍ଯ୍ୟନ୍ତ ଜାରି ରହିବ । ୨୦ କୋଟି ମହିଳାଙ୍କ ଆକାଉଣ୍ଟକୁ ଟଙ୍କା ପଠାଯାଇଛି । ୮ କୋଟିରୁ ଅଧିକ ଲୋକଙ୍କୁ ମାଗଣାରେ ଗ୍ୟାସ ମିଳିଛି । ଗରିବଙ୍କ ପାଇଁ ମୋଦି ସରକାର ବିଭିନ୍ନ କାମ କରୁଥିବା ସେ କହିଛନ୍ତି । ମୋଦିଙ୍କ ନେତୃତ୍ୱରେ ବିଜେପି ସରକାର ଦ୍ୱିତୀୟ ପାଳିର ପ୍ରଥମ ବର୍ଷ ପୁରଣ ହୋଇଛି । ପ୍ରଧାନମନ୍ତ୍ରୀଙ୍କ ନେତୃତ୍ୱରେ କୋରୋନା ପୂର୍ବରୁ ଐତିହାସିକ କାମ ସବୁ ହୋଇଛି । ରାମ ମନ୍ଦିର ନିର୍ମାଣ, ତିନ ତଲାକ ବିଲ, ସିଏଏ ଇତ୍ୟାଦି ସମ୍ଭବ ହୋଇପାରିଛି ବୋଲି ସେ କହିଛନ୍ତି । 

ଅରୁଣ ସିଂହ ଆହୁରି ମଧ୍ୟ କହିଛନ୍ତି, କୋରୋନା ସଙ୍କଟ ସମୟରେ ବିଜେପି କାର୍ଯ୍ୟକର୍ତ୍ତା ୮୦ ଲକ୍ଷ ସାନିଟାଇଜର ଓ ୨ କୋଟି ମାସ୍କ ବଣ୍ଟନ କରିଛଝନ୍ତି । କେବଳ ଏତିକି ନୁହେଁ, ୨୨ କୋଟିରୁ ଅଧିକ ଲୋକଙ୍କ ପାଇଁ ଭୋଜନ ବ୍ୟବସ୍ଥା କରିଥିଲେ ବିଜେପି କାର୍ଯ୍ୟକର୍ତ୍ତା । ୪.୫ କୋଟି ମାସ୍କ ଦଳୀୟ କର୍ମୀ ନିଜେ ତିଆରି କରିଛନ୍ତି । ୫ଲକ୍ଷ ୪୧ ହଜାର କାର୍ଯ୍ୟକର୍ତ୍ତା ବୃଦ୍ଧ ଲୋକଙ୍କ ସେବାରେ ନିୟୋଜିତ ହୋଇଛନ୍ତି । କୋରୋନା ସଙ୍କଟକୁ ନେଇ ବିଜେପି ପକ୍ଷରୁ ସବୁଠୁ ବଡ଼ ଅଭିଯାନ ଚଳାଯାଇଥିଲା ବୋଲି କହିଛନ୍ତି ବିଜେପି ମହାସଚିବ ।