ଭାରତରେ ଶସ୍ତା ହୋଇପାରେ ବ୍ରଡବ୍ୟାଣ୍ଡ, ଜାଣନ୍ତୁ ଏହାର କାରଣ

ନୂଆଦିଲ୍ଲୀ: ଭାରତରେ ଫିକ୍ସଡ୍ ଲାଇନ ବ୍ରଡବ୍ୟାଣ୍ଡ ସେବା ପାଇଁ ଲାଗୁ ଲାଇସେନ୍ସ ଶୁଳ୍କ ହ୍ରାସ କରିବାକୁ ସରକାର ବିଚାର କରୁଛନ୍ତି । ଏହି ପରିବର୍ତ୍ତନ ଦେଶରେ ଘରୋଇ ବ୍ରଡବ୍ୟାଣ୍ଡ ସେବାର ମୂଲ୍ୟ ହ୍ରାସ କରିପାରେ । ଏହାସହ ସେବା ପ୍ରଦାନକାରୀଙ୍କୁ କମ୍ ମୂଲ୍ୟରେ ସେମାନଙ୍କର କଭରେଜକୁ ବିସ୍ତାର କରିବାରେ ସାହାଯ୍ୟ କରିପାରେ । ଏକ ରିପୋର୍ଟ ଅନୁଯାୟୀ, ଏହି ନୂତନ ପ୍ରସ୍ତାବ ଦେଶରେ ଇଣ୍ଟରନେଟ୍ ସଂଯୋଗ ପ୍ରଦାନ କରିବା ପାଇଁ ବ୍ରଡବ୍ୟାଣ୍ଡ କମ୍ପାନୀ ଦ୍ୱାରା ଅର୍ଜିତ AGR ଉପରେ ଲାଇସେନ୍ସ ଶୁଳ୍କ କମ୍ ହୋଇଯିବ । ସେବା ପ୍ରଦାନକାରୀଙ୍କ ପାଇଁ ଏହା ସିଧାସଳଖ ଲାଭ ହେବ । ଏହି ଲାଭରୁ ଗ୍ରାହକମାନେ ମଧ୍ୟ ଉପକୃତ ହେବେ । ଟେଲିକମ୍ ରେଗୁଲେଟୋରୀ ଅଥରିଟି ଅଫ୍ ଇଣ୍ଡିଆ (TRAI) ଦ୍ୱାରା ପ୍ରଦାନ କରାଯାଇଥିବା ସର୍ବଶେଷ ତଥ୍ୟ ଅନୁଯାୟୀ ଦେଶରେ ୧.୯୮ କୋଟିରୁ ଅଧିକ ଫିକ୍ସଡ ଲାଇନ ବ୍ରଡବ୍ୟାଣ୍ଡ ଗ୍ରାହକ ଅଛନ୍ତି ।

ବ୍ଲୁମବର୍ଗର ରିପୋର୍ଟ ଅନୁଯାୟୀ, ପ୍ରସ୍ତାବିତ ଯୋଜନାରେ ଦର୍ଶାଯାଇଛି ଯେ ବ୍ରଡବ୍ୟାଣ୍ଡ କମ୍ପାନୀଗୁଡିକ ଦ୍ୱାରା ଘରୁ ମିଳିଥିବା AGR ଉପରେ ଲାଇସେନ୍ସ ଶୁଳ୍କ ବର୍ଷକୁ ୧ ଟଙ୍କାକୁ ହ୍ରାସ ପାଇବ । ୮ ପ୍ରତିଶତ ଦରରେ ଗଣନା କରାଯାଇଥିବା ଫିକ୍ସଡ୍ ଲାଇନ୍ ବ୍ରଡବ୍ୟାଣ୍ଡ ସେବା ପାଇଁ ଆନୁମାନିକ ଲାଇସେନ୍ସ ଶୁଳ୍କ ବର୍ତ୍ତମାନ ବର୍ଷକୁ ପ୍ରାୟ ୮୮୦ କୋଟି ରହିଛି । ଏପରି ପରିସ୍ଥିତିରେ ଏହା ନିଶ୍ଚିତ ଭାବରେ ଏକ ବଡ ପରିବର୍ତ୍ତନ ହେବ । ଏହି ପ୍ରସ୍ତାବକୁ ବର୍ତ୍ତମାନ ଯାଏ କ୍ୟାବିନେଟର ଅନୁମୋଦନ କରି ନାହିଁ । ଯଦିଓ କୁହାଯାଇଛି ଯେ, ଏହି ପ୍ରସ୍ତାବ ସଂପୃକ୍ତ ମନ୍ତ୍ରଣାଳୟର ବିଚାର ପାଇଁ ପହଞ୍ଚିଛି ।

ଏହି ପ୍ରସ୍ତାବର ସବୁଠାରୁ ବଡ ହିତାଧିକାରୀ ହେବେ ରିଲାଏନ୍ସ ଜିଓ ଇନଫୋକମ୍ର ଜିଓ ଫାଇବର । ଯାହାକି ଏକ ବର୍ଷ ପୂର୍ବରୁ ଆରମ୍ଭ ହୋଇଥିଲା । ଏୟାରଟେଲ, ACT ଫାଇବରନେଟ ଏବଂ ଏପରିକି ରାଷ୍ଟ୍ରାୟତ୍ତ କମ୍ପାନୀ ଭାରତ ସଞ୍ଚାର ନିଗମ ଲିମିଟେଡ୍(ବିଏସଏନଏଲ) ଭଳି ଭାରତର ଅନ୍ୟାନ୍ୟ ପ୍ରମୁଖ ବ୍ରଡବ୍ୟାଣ୍ଡ ସେବା ପ୍ରଦାନକାରୀଙ୍କୁ ଟକ୍କର ଦେଉଛି । ଲାଇସେନ୍ସ ଶୁଳ୍କ ହ୍ରାସ ମାଧ୍ୟମରେ ରାଜସ୍ୱ ସମ୍ଭାବନା ବୃଦ୍ଧି ଜିଓ ଫାଇବରକୁ ଦେଶରେ ଏହାର ବ୍ରଡବ୍ୟାଣ୍ଡ ସେବାକୁ ତ୍ୱରାନ୍ୱିତ କରିବ ।