ଲକଡାଉନରେ ନିୟମକୁ ଅଣଦେଖା କରି ପାଳିଲେ ଜନ୍ମଦିନ, ବିଧାୟକଙ୍କ ବିରୋଧରେ ମାମଲା ରୁଜୁ

ନୂଆଦିଲ୍ଲୀ: କୋରୋନା ଭୂତାଣୁ ମହାମାରୀ ଯୋଗୁଁ ଦେଶରେ ଲକଡାଉନ୍ ଜାରି ରହିଛି । ଲକଡାଉନର ଚତୁର୍ଥ ପର୍ଯ୍ୟାୟରେ ସରକାର କିଛି ନିୟମକୁ କୋହଳ କରିଛନ୍ତି । କିନ୍ତୁ ରେଡ୍ ଜୋନକୁ ଏଥିରୁ ଦୂରେଇ ରଖାଯାଇଛି । ରେଡ୍ ଜୋନରେ କୌଣସି ପ୍ରକାରର ଆୟୋଜନ ଉପରେ ନିଷେଧାଦେଶ ଲଗାଯାଇଛି । କିନ୍ତୁ କ୍ଷମତାର ନିଶାରେ ଥିବା କିଛି ନେତାଙ୍କ ପାଇଁ ନିୟମ ଭାଙ୍ଗିବା ପାଇଁ ହୋଇଥାଏ । 

ଲକଡାଉନ୍ ନିୟମକୁ ଅବମାନନା କରି ତେଲେଙ୍ଗାନାର ଶାସକ ଦଳ(ଟିଆରଏସ)ର ବିଧାୟକ ଏନ ନରେନ୍ଦ୍ର ତାଙ୍କ ଜନ୍ମଦିନ ପାଳନ କରିଛନ୍ତି । ନରେନ୍ଦ୍ର କେବଳ କେକ୍ କାଟି ନାହାଁନ୍ତି, ବରଂ ତାଙ୍କ ନିର୍ବାଚନମଣ୍ଡଳୀର ୨୫ଟି ଡିଭିଜନରେ ଥିବା ଲୋକଙ୍କୁ ଖାଦ୍ୟ ସାମଗ୍ରୀ ମଧ୍ୟ ବଣ୍ଟନ କରିଥିଲେ । ଖାଦ୍ୟ ସାମଗ୍ରୀ ବଣ୍ଟନରେ ବେଳେ ଲକଡାଉନ୍ ନିୟମ ଓ ସାମାଜିକ ଦୂରତା ନିୟମକୁ ମଧ୍ୟ ଅଣଦେଖା କରାଯାଇଥିଲା । ଏହି ଘଟଣା ମେ ୨୦ରେ ଘଟିଥିଲା ।

ଏବେ ବିରୋଧୀ ଭାରତୀୟ ଜନତା ପାର୍ଟି (ବିଜେପି)ର ନେତାଙ୍କ ଅଭିଯୋଗ ଉପରେ ପୋଲିସ ବିଧାୟକ ନରେନ୍ଦ୍ରଙ୍କ ବିରୋଧରେ ମାମଲା ରୁଜୁ କରିଛି । ଅଭିଯୋଗ ହୋଇଛି ଯେ, ବିଧାୟକ ନରେନ୍ଦ୍ରଙ୍କ ଜନ୍ମଦିନରେ ଆୟୋଜିତ ପାର୍ଟିରେ ପ୍ରାୟ ୩୦୦୦ ଲୋକ ଏକାଠି ହୋଇଥିଲେ । ଏହା ସେତେବେଳେ ହେଉଛି ଯେତେବେଳେ ୱାରଙ୍ଗାଲର ସହରାଞ୍ଚଳକୁ ଏକ ରେଡ୍ ଜୋନ୍ ଭାବରେ ଚିହ୍ନିତ କରାଯାଇଛି ।

ପୋଲିସର ଉପସ୍ଥିତିରେ ଏହା ଘଟିଛି । ଯେଉଁଠାରେ ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ନିଜେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ଯେ, ଲକଡାଉନକୁ କଡାକଡି ଭାବେ ପାଳନ କରାଯାଉ । ଏବେ ଏହି ଘଟଣା ପରେ ବିରୋଧୀ ବିଜେପି ସରକାର ଉପରେ ଆକ୍ରମଣ କରୁଛି । ଶାସକ ଦଳର ବିଧାୟକଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଦାବି କରି ବିଜେପି କହିଛି ଯେ, ଏହା କରିବା ଦ୍ୱାରା ସେ ଅନେକ ଲୋକଙ୍କ ଜୀବନକୁ ବିପଦରେ ପକାଇ ଦେଇଛନ୍ତି । ଉଲ୍ଲେଖନୀୟ କଥା ହେଉଛି, ରାଜ୍ୟରେ କୋରୋନା ଭୂତାଣୁ ସଂକ୍ରମିତ ରୋଗୀଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି ।