ଆଉ ଦୁଇଟି କମ୍ପାନୀକୁ ବିକିବେ ସରକାର

ନୂଆଦିଲ୍ଲୀ: ରାଜକୋଷ ଭରିବାକୁ କେନ୍ଦ୍ର ସରକାର ଘରୋଇକରଣ ଯୋଜନା ଆରମ୍ଭ କରିଛନ୍ତି। ଯାହାକୁ ସରକାରୀ ଭାଷାରେ ମନିଟାଇଜେସନ୍ କୁହାଯାଉଛି। ବିମାନ, ରେଳ, ସଡକ, ବନ୍ଦର, ବିମାନବନ୍ଦର, ପେଟ୍ରୋଲିୟମ, ଟେଲିକମ, ପ୍ରତିରକ୍ଷା, ବୀମା ଓ ଉତ୍ପାଦନ ଭଳି ସରକାରୀ ସଂସ୍ଥାରୁ ପୁଞ୍ଜି ପ୍ରତ୍ୟାହାର କରି ଘରୋଇ କମ୍ପାନୀଙ୍କୁ ବନିଯୋଗ ପାଇଁ ଅନୁମତି ଦିଆଯାଇଛି। ଆଉ ଏବେ ଏହି ମନିଟାଇଜେସନ ତାଲିକାରେ ଖଣୀଜ ସମ୍ପଦ ସାମିଲ ହୋଇଛି। ଏକ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ କେନ୍ଦ୍ର ସରକାର ଖୁବଶୀଘ୍ର ଦୁଇଟି ରାଷ୍ଟ୍ରାୟତ ଖଣିଜ ସଂସ୍ଥାରୁ ପୁଞ୍ଜି ପ୍ରତ୍ୟାହାର କରିବେ ବା ଘରୋଇ କରଣ କରିବେ।

ପ୍ରତିଷ୍ଠିତ ଗଣମାଧ୍ୟମର ରିପୋର୍ଟ ଅନୁସାରେ କେନ୍ଦ୍ର ସରକାର ଖୁବଶୀଘ୍ର ରାଷ୍ଟ୍ରାୟତ କମ୍ପାନୀ ନାଲକୋ ଏବଂ ହିନ୍ଦୁସ୍ତାନ କପରରୁ ପୁଞ୍ଜି ପ୍ରତ୍ୟାହାର କରିବେ। ଏଥିପାଇଁ ପ୍ରକ୍ରିୟା ମଧ୍ୟ ଆରମ୍ଭ ହୋଇଯାଇଛି। ନାଲକୋ ଏବଂ ହିନ୍ଦୁସ୍ତାନ କପର ଉଭୟ ଖଣି ମନ୍ତ୍ରଣାଳୟ ଅଧିନରେ ଅଛି। ତେଣୁ ମନ୍ତ୍ରାଳୟ ଏହାର ପୁଞ୍ଜି ପ୍ରତ୍ୟାହାରକୁ ନେଇ ପ୍ଲାନ୍ ଚୂଡାନ୍ତ କରିବା ସହ କ୍ୟାବିନେଟର ମଞ୍ଜୁରୀ ପାଇଁ ଆବେଦନ କରିବ। ବର୍ତ୍ତମାନ ଖଣିଜ ଦ୍ରବ୍ୟର ଚାହିଦା ଅଧିକ ଥିବାରୁ ସରକାର ଏହି କମ୍ପାନୀର ସେୟାର ବିକ୍ରି କରିବାକୁ ଆଗ୍ରହ ଦେଖାଉଛନ୍ତି।

Also Read: ରାଜଧାନୀବାସୀଙ୍କୁ ନୂଆବର୍ଷ ଭେଟି, BDA ନେଲା ବଡ଼ ନିଷ୍ପତ୍ତି

ଆସନ୍ତା ବର୍ଷ ନାଲକୋ ଏବଂ ହିନ୍ଦୁସ୍ତାନ କପରର ଅଂଶଧନ ବିକ୍ରି ହୋଇପାରେ। କ୍ୟାବିନେଟ୍ ଅନୁମୋଦନ ସମେତ ସମସ୍ତ କ୍ଲିୟରାନ୍ସ ଏହି ଆର୍ଥିକ ବର୍ଷ ମଧ୍ୟରେ ଶେଷ ହେବ ବୋଲି ବିଶ୍ୱସ୍ତ ସୂତ୍ରରୁ ଜଣାପଡିଛି। ଏହି ଦୁଇଟି ସଂସ୍ଥା ସମେତ ଅନେକ non-strategic  ରାଷ୍ଟ୍ରୟତ କମ୍ପାନୀ ଗୁଡ଼ିକର ଘରୋଇକରଣ ପାଇଁ ନୀତି ଆୟୋଗ ପରାମର୍ଶ ଦେଇଛନ୍ତି। ଏହି ସଂସ୍ଥାଗୁଡ଼ିକରେ କେନ୍ଦ୍ରର କିଛି ଅଂଶଧନ ବଜାୟ ରଖିପାରେ ବୋଲି ଜଣେ ଅଧିକାରୀ କହିଛନ୍ତି। 

ହିନ୍ଦୁସ୍ତାନ କପରରେ ୬୬.୧୪% ଏବଂ ନ୍ୟାସନାଲ ଆଲୁମିନିୟମ କମ୍ପାନୀ (ନାଲକୋ) ରେ ୫୧.୨୮% ସରକାରୀ ଅଂଶଧନ ଅଛି। ବେଦାନ୍ତ ଗ୍ରୁପ୍ ସମେତ ଏକାଧିକ ନିବେଶକ ହିନ୍ଦୁସ୍ତାନ କପରର ସେୟାର କିଣିବାକୁ ଆଗ୍ରହ ପ୍ରକାଶ କରିଛନ୍ତି। ବିଶ୍ୱ ବଜାରରେ ଆଲୁମିନିୟମ୍ ଏବଂ ତମ୍ବା ମୂଲ୍ୟରେ କିଛି ସଂଶୋଧନ ହୋଇଛି। ବର୍ତ୍ତମାନ ଏହି କମ୍ପାନୀ ଗୁଡିକର ସେୟାର ମୂଲ୍ୟ କିଛିଟା କମ ହୋଇଥିବା ବେଳେ ଆସନ୍ତାବର୍ଷ ତାହା ବୃଦ୍ଧି ପାଇପାରେ ବୋଲି ବିଶେଷଜ୍ଞମାନେ ପୂର୍ବାନୁମାନ କରିଛନ୍ତି।

Also Read: ଓଡ଼ିଶୀ ସଂଗୀତକୁ ମିଳିବ ନାହିଁ ଶାସ୍ତ୍ରୀୟ ମାନ୍ୟତା, କାରଣ କହିଲେ କେନ୍ଦ୍ର ସରକାର

ଗତ ସପ୍ତାହରେ ସରକାର କହିଥିଲେ ଯେ, ୧୭ଟି ଷ୍ଟ୍ରାଟେଜିକ୍-ସେଲ୍ ଟ୍ରାଞ୍ଜାକସନ୍ ଚାଲିଛି। ଏଥି ମଧ୍ୟରେ ପ୍ରୋଜେକ୍ଟ ଆଣ୍ଡ ଡେଭଲପମେଣ୍ଟ ଇଣ୍ଡିଆ ଲିମିଟେଡ୍, ଇଞ୍ଜିନିୟରିଂ ପ୍ରୋଜେକ୍ଟ (ଇଣ୍ଡିଆ) ଲିମିଟେଡ୍, ବିଏମ୍ଏଲ୍ ଲିମିଟେଡ୍, ଭରତ ପେଟ୍ରୋଲିୟମ କର୍ପୋରେସନ୍ ଲିମିଟେଡ୍ (ନମାଲିଗଡ ରିଫାଇନାରୀ ଲିମିଟେଡ୍କୁ ବାଦ ଦେଇ), କଣ୍ଟେନେର୍ କର୍ପୋରେସନ୍ ଅଫ୍ ଇଣ୍ଡିଆ ଲିମିଟେଡ୍ ଏବଂ ରାଷ୍ଟ୍ରିୟ ଇସ୍ପାଟ ନିଗମ ଲିମିଟେଡ୍ ଅନ୍ତର୍ଭୁକ୍ତ। ଚଳିତ ଆର୍ଥିକ ବର୍ଷ ପାଇଁ ସରକାର ମନିଟାଇଜେସନରୁ ୧.୭୫ ଲକ୍ଷ କୋଟି ଟଙ୍କା ଆୟ କରିବାକୁ ଲକ୍ଷ୍ୟ ଧାର୍ଯ୍ୟ କରିଛନ୍ତି।

ସୂଚନାଯୋଗ୍ୟ, ୨୦୨୧ ଅକ୍ଟୋବରରେ ଏୟାର ଇଣ୍ଡିଆ ପାଇଁ ଟାଟା ଗ୍ରୁପ୍ ସଫଳ ବିଡର ଭାବରେ ଉଭା ହେଲା। ଯାହାକି ୧୯ ବର୍ଷ ମଧ୍ୟରେ ଏକ ସରକାରୀ କ୍ଷେତ୍ରର ଉଦ୍ୟୋଗର ପ୍ରଥମ ଘରୋଇକରଣକୁ ଚିହ୍ନିତ କରିଥିଲା। ଗତ ସପ୍ତାହରେ ସେଣ୍ଟ୍ରାଲ ଇଲେକ୍ଟ୍ରୋନିକ୍ସ ଲିମିଟେଡ୍ (CEL)ର ସେୟାରକୁ ଦିଲ୍ଲୀର ନନ୍ଦଲ ଫାଇନାନ୍ସ ଏବଂ ଲିଜ୍ ପିଭି ଲିମିଟେଡକୁ ୨୧୦ କୋଟି ଟଙ୍କାରେ ବିକ୍ରିକୁ ସରକାର ଅନୁମୋଦନ କରିଛନ୍ତି।