ଚୀନ ରାଡ଼ାରରେ ନବୀନଙ୍କ ସହ ୩ ଓଡ଼ିଆ, ଦୁଇ ଡର୍ଜନ ମୁଖ୍ୟମନ୍ତ୍ରୀ !

ନୂଆଦିଲ୍ଲୀ: ଉଭୟ ଭାରତ ଓ ଚୀନ ମଧ୍ୟରେ ସୀମା ବିବାଦ ଚରମ ସୀମାରେ ପହଞ୍ଚିଥିବା ବେଳେ ଆଉ ଏକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ଭାରତ ବିରୋଧରେ ଭୟଙ୍କର ହାଇବ୍ରିଡ଼ ଯୁଦ୍ଧ ପାଇଁ ପ୍ରସ୍ତୁତି ଚଳାଇଥିବା ନେଇ ଏକ ଜାତୀୟ ସ୍ତରୀୟ ଖବର କାଗଜ ପକ୍ଷରୁ କରାଯାଇଥିବା ଅନୁଧ୍ୟାନରୁ ସୂଚନା ସାମ୍ନାକୁ ଆସିଛି। ତେବେ ଭାରତର ଏହି ୧୦ ହଜାର ବ୍ୟକ୍ତିବିଶେଷ ଓ ଅନୁଷ୍ଠାନ ଉପରେ ଚୀନ ନଜର ରଖିଛି। ଏହି ବ୍ୟକ୍ତିବିଶେଷଙ୍କ ଉପରେ ବର୍ତ୍ତମାନର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ପୂର୍ବତନ ୫ ପ୍ରଧାନମନ୍ତ୍ରୀ, ୨୪ରୁ ଊର୍ଦ୍ଧ୍ୱ ମୁଖ୍ୟମନ୍ତ୍ରୀ, ୩୫୦ରୁ ଊର୍ଦ୍ଧ୍ୱ ସାଂସଦ ଓ ବହୁ ଗୁରୁତ୍ତ୍ୱ ପଦପଦବୀରେ ରହିଥିବା ବ୍ୟକ୍ତିବିଶେଷ ରହିଛନ୍ତି।  

ଚୀନର ଏକ ସଂସ୍ଥା ଜେନହୁଆ ଡାଟା ଇନଫର୍ମେସନ ଟେକ୍ନୋଲୋଜି ଲି। ନାମକ ଏକ ସଂସ୍ଥା ଏହି ତଥ୍ୟ ସଂଗ୍ରହ ଦାୟିତ୍ୱରେ ରହିଛି। ଖବରକାଗଜର ଅନୁସନ୍ଧାନ ଅନୁଯାୟୀ ଉକ୍ତ ସଂସ୍ଥା ଓଭରସିଜ କି ଇନଫରମେସନ ଡାଟା ବେସ(OKIDB) ଏକ ତଥ୍ୟବ୍ୟାଙ୍କ ସୃଷ୍ଟି କରିଛି। ଏହି ତଥ୍ୟ ବ୍ୟାଙ୍କରେ ଭାରତର ବିଶିଷ୍ଟ ବ୍ୟକ୍ତିବିଶେଷ ମାନଙ୍କର ତଥ୍ୟ ସଂଗୃହିତ ହୋଇଥିବା ଜଣାପଡ଼ିଛି। ଏହି ବ୍ୟକ୍ତିବିଶେଷଙ୍କ ମଧ୍ୟରେ ରାଜନେତା, ବିଚାରପତି, ମୁଖ୍ୟମନ୍ତ୍ରୀ, ସାଂସଦ, ସାମ୍ବାଦିକ, ବୈଜ୍ଞାନିକ, ଅମଲାଙ୍କ ନାମ ପ୍ରମୁଖ ରହିଛି।  

ତେବେ ସବୁଠାରୁ ବଡ଼ ଓ ଗୁରୁତ୍ତ୍ୱପୂର୍ଣ୍ଣ କଥା ହେଉଛି ଯେ, ଏହି ତାଲିକା ମଧ୍ୟରେ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବିଶିଷ୍ଟ ଶିଳ୍ପପତି ତଥା ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ଟାର୍ଗେଟରେ ରହିଛନ୍ତି। ଏମାନଙ୍କ ସହିତ ନୂତନ ଭାବେ ଦାୟିତ୍ୱ ନେଇଥିବା କମ୍ପଟ୍ରୋଲର ଓ ଅଡ଼ିଟର ଜେନେରାଲ ଗିରୀଶ ଚନ୍ଦ୍ର ମୁର୍ମୁଙ୍କ ନାମ ରହିଛି। ଏମାନଙ୍କ ବ୍ୟତୀତ ରାଷ୍ଟ୍ରପତି ରାମନାଥ କୋବିନ୍ଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି,  କଂଗ୍ରେସର ଅନ୍ତରୀଣ ସଭାପତୀ ସୋନିଆ ଗାନ୍ଧୀ, ଅନ୍ୟ ବିଶିଷ୍ଟ ରାଜନେତାଙ୍କ ପ୍ରମୁଖ ମଧ୍ୟ ଟାର୍ଗେଟରେ ରହିଥିବା ଜଣାପଡ଼ିଛି।  

ଅନ୍ୟ ରାଜନେତାଙ୍କ ମଧ୍ୟରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ରାଜସ୍ଥାନର ମୁଖ୍ୟମନ୍ତ୍ରୀ ଅଶୋକ ଗେହଲୋଟ, ପଞ୍ଜାବର ମୁଖ୍ୟମନ୍ତ୍ରୀ ଅମରିନ୍ଦର ସିଂ, ମହାରାଷ୍ଟ୍ରର ମୁଖ୍ୟମନ୍ତ୍ରୀ ଉଦ୍ଧବ ଠାକରେ, ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ, ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂହ, କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ସିଦ୍ଦରମେୟା, ଆରଜେଡ଼ି ନେତା ଲାଲୁ ଯାଦବ, ବୈଦେଶିକ ସଚିବ ହର୍ଷବର୍ଦ୍ଧନ ସିଙ୍ଗଲା ପ୍ରମୁଖଙ୍କ ତଥ୍ୟ ହାସଲ କରିଛି ଉକ୍ତ ସଂସ୍ଥା। ସେହିପରି ସିଡ଼ିଏସ ମୁଖ୍ୟ ଷ୍ଟାଫ ବିପିନ ସିଂହ ରାଓ୍ୱତଙ୍କ ସହିତ ୧୫ ସେନା ମୁଖ୍ୟଙ୍କ ନାମ ମଧ୍ୟ ରହିଛି। ଏହି ସେନାମୁଖ୍ୟଙ୍କ ମଧ୍ୟରେ ସ୍ଥଳସେନା, ନୌସେନା ଓ ବାୟୁସେନାର ମୁଖ୍ୟଙ୍କ ନାଁ ସବୁ ରହିଛି।  

ସେହିପରି ସିଜେଆଇ ଶରଦ ବୋବଡ଼େ ଓ ବିଚାରପତି ଏ ଏମ ଖାନଓ୍ୱିଲକର, ଲୋକପାଳ ବିଚାରପତି ପିସି ଘୋଷ, ଷ୍ଟାର୍ଟ ଅପ ଗୁଡ଼ିକର ମାଲିକ ଯଥା ଭାରତ ପେର ଫାଉଣ୍ଡର ନିପୁନ ମେହେର, ଅଥରାଇଜମ ବ୍ରିଜର ପ୍ରତିଷ୍ଠାତା ଅଜୟ ତ୍ରିହାନ, ଶିଳ୍ପପତି ରତନ ଟାଟା, ଗୌତମ ଅଦାନୀଙ୍କ ନାଁ ପ୍ରମୁଖଙ୍କ ନାଁ ରହିଛି। ସେହିପରି ଦେଶର କିଛି ପ୍ରମୁଖ ସାମ୍ବାଦିକଙ୍କ ତଥ୍ୟକୁ ହାସଲ କରିଛି ଏହି ସଂସ୍ଥା। ପ୍ରମୁଖ ସାମ୍ବାଦିକଙ୍କ ମଧ୍ୟରେ ଜୀ ନ୍ୟୁଜର ସମ୍ପାଦକ ସୁଧୀର ଚୌଧୂରୀ, ଇଣ୍ଡିଆ ଟୁଡ଼େ ଗ୍ରୁପର ସମ୍ପାଦକ ରାଜଦୀପ ସରଦେସାଇ, ଇଣ୍ଡିଆନ ଏକ୍ସପ୍ରେସର ମୁଖ୍ୟ ରାଜ କମଲ ଝା, ପ୍ରଧାନମନ୍ତ୍ରୀଙ୍କ ପୂର୍ବତନ ଗଣମାଧ୍ୟମ ଉପଦେଷ୍ଟା ସଞ୍ଜୟ ବାରୁ, ପୂର୍ବତନ କ୍ରିକେଟର ସଚିନ ତେନ୍ଦୁଲକର, ଚଳଚ୍ଚିତ୍ର ନିର୍ଦ୍ଦେଶକ ଶ୍ୟାମ ବେନେଗାଲଙ୍କ ତଥ୍ୟ ମଧ୍ୟ ହାସଲ କରିଥିବା ନେଇ ଉକ୍ତ ଖବରକାଗଜରେ ପ୍ରକାଶ ପାଇଥିବା ରିପୋର୍ଟରୁ ସୂଚନା ରହିଛି।