ନରମିଲା ଚୀନ

ନୂଆଦିଲ୍ଲୀ: କିଛି ଦିନ ପୂର୍ବରୁ ଭାରତ ଓ ଚୀନ ସୈନିକ ପରସ୍ପର ମଧ୍ୟରେ ହାତାହାତି(Sino-India Border Clashes) ହୋଇଥିଲେ । ଥରେ ନୁହେଁ, ନିକଟ ଅତୀତରେ ୨ ଥର ଏପରି ଘଟଣା ଦେଖିବାକୁ ମିଳିଥିଲା । ଆଉ ପରେ ନରମିଛି ଚୀନ । ଆମ ସୈନିକ ସୀମାରେ ଶାନ୍ତି ଏବଂ ଧୋର୍ଯ୍ୟ ବଜାୟ ରଖିବାରେ ପ୍ରତିବଦ୍ଧ ବୋଲି ଚୀନରୁ ପ୍ରତିକ୍ରିୟା ଆସିଛି । ଚାଇନା ବୈଦେଶିକ ମନ୍ତ୍ରାଳୟର ପ୍ରବକ୍ତା ଝାଓ ଲିଜିୟାନ ଏଭଳି ବୟାନ ରଖିଛନ୍ତି । ଉଭୟ ଦେଶ ପରସ୍ପର ମଧ୍ୟରେ ଥିବା ମତଭେଦକୁ ଉଚିତ ଢଙ୍ଗରେ ସମାଧାନ କରିବା ଦରକାର ବୋଲି ସେ କହିଛନ୍ତି । 

ଚାଇନା ବୈଦେଶିକ ମନ୍ତ୍ରାଳୟର ପ୍ରବକ୍ତା ଆହୁରି ମଧ୍ୟ କହିଛନ୍ତି, ସୀମାରେ ନିୟୋଜିତ ଆମ ସୈନିକ ଶାନ୍ତି ଏବଂ ଧୋର୍ଯ୍ୟ ବଜାୟ ରଖିବା ପାଇଁ ପ୍ରତିବଦ୍ଧ ଅଟନ୍ତି । ସୀମା ମାମଲାକୁ ନେଇ ଉଭୟ ଭାରତ ଓ ଚୀନ ପରସ୍ପର ମଧ୍ୟରେ ସମନ୍ୱୟ ରକ୍ଷା କରିଆସିଛନ୍ତି ।  

ଆପଣଙ୍କୁ କହିରଖୁଛୁ, କିଛି ଦିନ ପୂର୍ବରୁ ପୂର୍ବ ଲଦାଖ ଏବଂ ଉତ୍ତର ସିକିମର ନାକୁ ଲା ସୀମାରେ ଭାରତ ଓ ଚାଇନା ସୈନ୍ୟ ମୁହାଁମୁହିଁ ହୋଇଥିଲେ । ଉଭୟ ପକ୍ଷ ମଧ୍ୟରେ ପଥର ମାଡ଼ ମଧ୍ୟ ହୋଇଥିଲା । ପାଖାପାଖି ୨ଶହ ସୈନିକ ଏହି ଘଟଣାରେ ସାମିଲ ଥିଲେ । ଯେଉଁଥିରେ ଉଭୟ ପକ୍ଷରୁ ଅନେକ ସୈନିକ ଆହତ ମଧ୍ୟ ହୋଇଥିଲେ । ତେବେ ପରବର୍ତ୍ତୀ ସମୟରେ ଆଲୋଚନା ମାଧ୍ୟମରେ ଏହାର ସମାଧାନ ହୋଇଥିଲା ।