ଲଞ୍ଚ ହେଲା ସୁପ୍ରିମକୋର୍ଟ ଆପ୍, ଗୋଟିଏ କ୍ଲିକରେ ମିଳିଯିବ ସମସ୍ତ ସୂଚନା

ନୂଆଦିଲ୍ଲୀ: ଏବେ ଗୋଟିଏ କ୍ଲିକରେ ଜାଣିପାରିବେ ସୁପ୍ରିମକୋର୍ଟ (Supreme Court)ର ଜଜମେଣ୍ଟ ବିଷୟରେ । ଆଜି କେଉଁ ଶୁଣାଣି ହେଲା, କ'ଣ ଶୁଣାଣି ଥିଲା ଇତ୍ୟାଦି ଆପଣ ଖୁବଶୀଘ୍ର ପାଇପାରିବେ । ସର୍ବୋଚ୍ଚ ଅଦାଲତର ପ୍ରଧାନ ବିଚାରପତି ଏସଏ ବୋବଡ଼େ(CJI Sharad Arvind Bobde) ଶନିବାର  iOS ୟୁଜର୍ସଙ୍କ ପାଇଁ ସୁପ୍ରିମ କୋର୍ଟ ଆପ୍ (Supreme Court App) ଲଞ୍ଚ କରିଛନ୍ତି । ପ୍ରତ୍ୟେକ ଦିନର ଅଡର୍ସ, ମାମଲା ଗୁଡ଼ିକ ବିଷୟରେ ଆପଣ ଏହି ଆପ୍ ମାଧ୍ୟମରେ ଜାଣିପାରିବେ । 

ତେବେ ପ୍ରାରମ୍ଭିକ ଭାବେ ଏହି ସୁବିଧାର ଲାଭ କେବଳ ଆଇଫୋନ(iPhone) ଏବଂ ଆଇପେଡ(iPad)  ୟୁଜର୍ସ ପାଇପାରିବେ । ଯାହା ଜଣାପଡ଼ିଛି, ଉପଭୋକ୍ତାଙ୍କ ସୁବିଧାକୁ ଆଖିଆଗରେ ରଖି, ଏହି ଆପରେ ଇଂରାଜୀ ବ୍ୟତୀତ ୫ ଆଞ୍ଚଳିକ ଭାଷା ମଧ୍ୟ ରହିବ । ହିନ୍ଦି, ତାମିଲ, ତେଲଗୁ, ମରାଠୀ ଓ କନ୍ନଡ ଭାଷାରେ ସୁପ୍ରିମକୋର୍ଟର ଶୁଣାଣି ସମ୍ପର୍କୀତ ସମସ୍ତ ସୂଚନା ଆପ୍ ମାଧ୍ୟମରେ ଆପଣ ଜାଣିପାରିବେ । 

କୋର୍ଟ ପକ୍ଷରୁ କୁହାଯାଇଛି, ଏହି ଆପ୍ ସୁପ୍ରିମକୋର୍ଟର ଅଫିସିଆଲ ୱେବସାଇଟ ଓ ଆପଲ ଷ୍ଟୋରରେ ଉବଲବ୍ଧ ରହିଛି । ୟୁଜର୍ସ ଏହାକୁ ଅତି ସହଜରେ ଡାଉନଲୋଡ କରିପାରିବେ । ଆପଣଙ୍କୁ କହିରଖୁଛୁ, ଏହି ଆପ୍ ଡାଉନଲଡ ପାଇଁ ଆପଣଙ୍କୁ କୌଣସି ପ୍ରକାର ଦେୟ ଦେବାକୁ ପଡ଼ିବ ନାହିଁ । ସେହିପରି ଆପର ରେଗୁଲାର ଅପଡେଟ ଓ କେସ ଅଲର୍ଟ ନେଇ ଆପଣ ନୋଟିଫିକେସନ ମଧ୍ୟ ପାଇପାରିବେ ।