ଆଜି ଏକାଠି ହେବେ ବିରୋଧୀ, ସରକାରଙ୍କ କୋରୋନା ନୀତି ଉପରେ ହେବ ଆଲୋଚନା

ନୂଆଦିଲ୍ଲୀ : ସାରା ମାନବ ଜାତିକୁ ଏବେ ମହାମାରୀ କୋରୋନା ଆତଙ୍କ । ଯାହାକୁ ନେଇ ଶକ୍ତିଶାଳି ମାନବ ଜାତି ବର୍ତ୍ତମାନ ଶକ୍ତିହୀନ । ଦୀର୍ଘ ୩ ମାସ ହେବ ଦେଶ ଅତି ଭୟଙ୍କର ସ୍ଥିତି ଦେଇ ଗତିକରୁଛି l ମହାମାରୀରୁ ମୁକ୍ତି ପାଇବା ପାଇଁ କେଉଁଠି ଲକଡାଉନ ତ କେଉଁଠି ସଟଡାଉନ । ଦେଶକୁ ସଙ୍କଟରୁ ଉଦ୍ଧାର କରି ସ୍ୱାଭାବିକ ସ୍ଥିତିକୁ ଫେରାଇ ଆଣିବା ପାଇଁ ସରକାର ଯଥାସାଧ୍ୟ ଉଦ୍ୟମ ଜାରି ରଖିଛନ୍ତି । ଏହା ସହ ସରକାରଙ୍କ ଦାବି ଅନୁସାରେ ଦେଶର ସବୁ ବର୍ଗର ଲୋକଙ୍କ ପାଇଁ ୨୦ ଲକ୍ଷ କୋଟିର ଆର୍ଥିକ ପ୍ୟାକେଜ ବଣ୍ଟନ ହୋଇସାରିଛି । ତେବେ ଏସବୁ ଭିତରେ କୋରୋନା ମୁକାବିଲା ଦିଗରେ ସରକାରଙ୍କ ଦୋଷ ଦୁର୍ବଳାତାକୁ ଆଜି ଖୋଜିବେ ବିରୋଧୀ !

ମହାମାରୀ କରୋନା ମୁକାବିଲାରେ କେନ୍ଦ୍ର ସରକାରଙ୍କ ବିଫଳତା ଲୋକଙ୍କ ସମ୍ମୁଖକୁ ଆଣିବା ପାଇଁ ଆଜି କଂଗ୍ରେସ ନେତୃତ୍ୱରେ  ଦେଶର ୧୮ରୁ ଉର୍ଦ୍ଧ୍ୱ ରାଜନୈତିକ ଦଳ ଏକାଠି ହୋଇ କେନ୍ଦ୍ର ସରକାରଙ୍କ ବିରୋଧରେ ଗର୍ଜିବା ପାଇଁ ପ୍ରସ୍ତୁତ ହେବେ ।  ବିଶେଷକରି ମହାରାଷ୍ଟ୍ର, କେରଳ, ପଞ୍ଜାବ, ଛତିଶଗଡ଼, ରାଜସ୍ଥାନ ମୁଖ୍ୟମନ୍ତ୍ରୀ କେନ୍ଦ୍ର ସରକାରଙ୍କ ପଦକ୍ଷେପରେ ଅସନ୍ତୁଷ୍ଟ ।  ସେହିପରି  କୋରୋନା ମୁକାବିଲା ନିମନ୍ତେ କେନ୍ଦ୍ର ସରକାରଙ୍କ ଘୋଷିତ ୨୦ ଲକ୍ଷ କୋଟି ଟଙ୍କାର ପ୍ୟାକେଜ ଉପରେ ମଧ୍ୟ କଂଗ୍ରେସ ପ୍ରଶ୍ନ ଉଠାଇଛି । ଦଳର ତୁଙ୍ଗନେତା  କେନ୍ଦ୍ର ସରକାରଙ୍କୁ ଘେରିବାରେ ଲାଗିଛନ୍ତି । ଏହି ସ୍ଥିତିରେ ଆଜି ଭିଡିଓ କନଫରେନ୍ସ ଜରିଆରେ ଦେଶର ବିରୋଧୀ  ରାଜନୈତିକ ଦଳ କେନ୍ଦ୍ର ସରକାରଙ୍କ କୋରୋନା ନୀତି ନେଇ ଆଲୋଚନା କରିବେ ।  

ବିରୋଧୀଙ୍କ ଏହି କାର୍ଯ୍ୟକ୍ରମରେ କଂଗ୍ରେସର ଅନ୍ତରୀଣ  ଅଧ୍ୟକ୍ଷା ସୋନିଆ ଗାନ୍ଧୀ  ଅଧ୍ୟକ୍ଷତା କରିବେ ବୋଲି  ଜଣାପଡିଛି । ଏଥିରେ ସମସ୍ତ ବିରୋଧୀ ଦଳ ସାମିଲ ହେବାକୁ କୁହାଯାଇଛି । ହେବାକୁ ଥିବା ବୈଠକରେ କଂଗ୍ରେସ,  ସିପିଆଇ, ଶିବସେନା, ଏସପି, ବିଏସପି, ନ୍ୟାସନାଲ କନଫରେନ୍ସ, ଟିଏମସି, ଏନସିପି, ଡିଏମକେ, ଆରଜେଡି, ଆରଏଲଡି, ଆରଏଲଏସପି ଭଳି ଦଳ ଯୋଗଦେବେ ।