ଦେଶରେ ରେକର୍ଡ ଭାଙ୍ଗୁଛି କୋରୋନା

ନୂଆଦିଲ୍ଲୀ: ଦେଶରେ ଦିନକୁ ଦିନ କୋରୋନା (Corona) ସଂକ୍ରମଣର ମାତ୍ରା କ୍ରମାଗତ ଭାବେ ବୃଦ୍ଧି ପାଇବାରେ ଲାଗିଛି। ପୂର୍ବ ସମସ୍ତ ରେକର୍ଡ (Record) ଭାଙ୍ଗିଛି କୋରୋନା। ବିଗତ ୨୪ ଘଣ୍ଟା ମଧ୍ୟରେ ଦେଶରେ ସର୍ବାଧିକ କୋରୋନା ସଂକ୍ରମିତଙ୍କ ସଂଖ୍ୟା ସାମ୍ନାକୁ ଆସିଛି। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ବୁଧବାର ସକାଳ ୮ଟାରୁ ଗୁରୁବାର ସକାଳ ୮ଟା ପର୍ଯ୍ୟନ୍ତ ସାରା ଦେଶରେ ୮୩,୮୮୩ଟି ନୂଆ ସଂକ୍ରମିତଙ୍କ ମାମଲା ସାମ୍ନାକୁ ଆସିଛି। ସମଗ୍ର ଦେଶରେ ଗୋଟିଏ ଦିନରେ କୋରୋନା ଭୁତାଣୁ କେବେ ବି ହୋଇନଥିଲେ। ଏହା ସହିତ ଦେଶରେ କୋରୋନା ସଂକ୍ରମିତଙ୍କ ସଂଖ୍ୟା ୩୮,୫୩,୪୦୬କୁ ବୃଦ୍ଧି ପାଇଛି।

ସମାନ୍ତରାଳ ଭାବେ ଦେଶରେ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଇବାରେ ଲାଗିଛି। ବିଗତ ୨୪ ଘଣ୍ଟା ମଧ୍ୟରେ ଦେଶରେ ମୋଟ ୧୦୪୩ ଜଣ କୋରୋନା ସଂକ୍ରମିତଙ୍କ ମୃତ୍ୟୁ ହୋଇଛି। ବର୍ତ୍ତମାନ ପର୍ଯ୍ୟନ୍ତ ଦେଶରେ ୬୭,୩୭୬ ଜଣଙ୍କ ମୃତ୍ୟୁ ହୋଇ ସାରିଲାଣି। ତେବେ ମୃତ୍ୟୁ ହାରରେ ହ୍ରାସ ପାଇଛି। ସରକାରୀ ରିପୋର୍ଟ ମୁତାବକ ମୃତ୍ୟୁ ହାର ବର୍ତ୍ତମାନ ଦେଶରେ ମାତ୍ର ୧.୭୪ ରହିଛି। ସେପଟେ କୋରୋନା ସଂକ୍ରମିତ ସୁସ୍ଥ ହେବାରେ ଲାଗିଛି। ଫଳରେ ସୁସ୍ଥ ହାର ମଧ୍ୟ ବେଶ ଦ୍ରୁତ ବେଗରେ ବୃଦ୍ଧି ପାଉଛି। ଯାହା ସମସ୍ତଙ୍କୁ ଆଶ୍ୱସ୍ତିକର ଖବର ଦେଇଛି। ବିଗତ ୨୪ ଘଣ୍ଟା ମଧ୍ୟରେ କୋରୋନା ସଂକ୍ରମିତଙ୍କ ମଧ୍ୟରୁ ୬୮,୫୮୪ ଜଣ ସୁସ୍ଥ ହୋଇଛନ୍ତି। ଫଳରେ ଦେଶରେ ୨୯,୭୦,୪୯୨ ଜଣ ସୁସ୍ଥ ହୋଇ ସାରିଲେଣି।

ସେହିପରି ଦେଶରେ ମୋଟ ୮.୧୫ ଲକ୍ଷ ଲୋକ ସକ୍ରିୟ ମାମଲା ରହିଛି। ମୋଟ ସଂକ୍ରମିତଙ୍କ ମଧ୍ୟରୁ ୭୭.୦୮ ହାରରେ ସୁସ୍ଥ ହୋଇଛନ୍ତି। ସୂଚନାଯୋଗ୍ୟ ବୁଧବାର କୋରୋନା ଟେଷ୍ଟିଂ ମଧ୍ୟ ରେକର୍ଡ ସଂଖ୍ୟା ଛୁଇଁଛି। ବିଗତ ୨୪ ଘଣ୍ଟା ମଧ୍ୟରେ ୧୧.୭୨ ଲକ୍ଷରୁ ଊର୍ଦ୍ଧ୍ୱ ତମାମ ଦେଶରେ ଟେଷ୍ଟ କରାଯାଇଛି। ସମଗ୍ର ଦେଶରେ ବର୍ତ୍ତମାନ ସୁଦ୍ଧା ୪.୫ କୋଟିରୁ ଊର୍ଦ୍ଧ୍ୱ ଟେଷ୍ଟ କରାଯାଇଛି।