ଦିଲ୍ଲୀରେ ୨୭ ହଜାର ଟପିଲା କୋରୋନା ସଂକ୍ରମିତଙ୍କ ସଂଖ୍ୟା

ନୂଆଦିଲ୍ଲୀ: ଦିଲ୍ଲୀରେ କୋରୋନା ଭାଇରସ ସଂକ୍ରମଣ ମାମଲା ୨୭ ହଜାର ଅତିକ୍ରମ କରିଛି । ଶନିବାର ସନ୍ଧ୍ୟାରେ ପ୍ରକାଶିତ ତଥ୍ୟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଜାତୀୟ ରାଜଧାନୀରେ ୧୩୨୦ ନୂତନ କୋରୋନା ସଂକ୍ରିତ ଚିହ୍ନଟ ହୋଇଛନ୍ତି । ଯାହା ପରେ ସଂକ୍ରମିତ ଲୋକଙ୍କ ସଂଖ୍ୟା ୨୭,୬୫୪କୁ ବୃଦ୍ଧି ପାଇଛି । ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀରେ ୩୪୯ କୋରୋନା ସଂକ୍ରମିତ ଆରୋଗ୍ୟ ଲାଭ କରିଛନ୍ତି । ଯେଉଁଥିପାଇଁ ଦିଲ୍ଲୀରେ ସୁସ୍ଥ ହୋଇଥିବା ଲୋକଙ୍କ ସଂଖ୍ୟା ୧୦,୬୬୪କୁ ବୃଦ୍ଧି ପାଇଛି । ଗତ ୨୪ ଘଣ୍ଟା ମଧ୍ୟରେ ଏଠାରେ କୌଣସି ମୃତ୍ୟୁ ହୋଇନାହିଁ । କିନ୍ତୁ ମେ ୨୫ରୁ ଜୁନ ୫ ମଧ୍ୟରେ ୫୩ ଜଣ ସଂକ୍ରମିତଙ୍କର ମୃତ୍ୟୁ ଖବର ବିଳମ୍ବରେ ଆସିଥିଲା । ଯାହା ପରେ ଦିଲ୍ଲୀରେ ମୋଟ ମୃତ୍ୟୁ ସଂଖ୍ୟା ୭୦୮ରୁ ବୃଦ୍ଧି ପାଇଁ ୭୬୧କୁ ପହଞ୍ଚିଛି । 

ଅନ୍ୟପକ୍ଷେ ସ୍ପେନକୁ ପଛରେ ପକାଇ ଏହି ଭୂତାଣୁ ଦ୍ୱାରା ବିଶ୍ୱର ଅଧିକ ପ୍ରଭାବିତ ଦେଶ ତାଲିକାରେ ଭାରତ ପଞ୍ଚମ ସ୍ଥାନରେ ପହଞ୍ଚିଛି । ଶନିବାର ସକାଳେ କୋରୋନା ଭୂତାଣୁ ଦ୍ୱାରା ବିଶ୍ୱର ପ୍ରଭାବିତ ଦେଶଗୁଡ଼ିକ ତାଲିକାରେ ଭାରତ ଷଷ୍ଠ ସ୍ଥାନରେ ପହଞ୍ଚିଥିଲା । ପୂର୍ବରୁ ଇଟାଲୀ ଷଷ୍ଠ ସ୍ଥାନରେ ଥିଲା । ଶନିବାର ସକାଳେ ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ସର୍ବାଧିକ ସଂଖ୍ୟକ କୋରୋନା ସଂକ୍ରମିତ ଦେଶରେ ଚିହ୍ନଟ ହୋଇଛନ୍ତି । ଫଳରେ କୋଭିଡ-19 ସଂକ୍ରମିତଙ୍କ ସଂଖ୍ୟା  ୨,୩୬,୬୫୭କୁ ବୃଦ୍ଧି ପାଇଛି । ଭାରତରେ ଗତ ୨୪ ଘଣ୍ଟା ମଧ୍ୟରେ ଶନିବାର ସକାଳ ଆଠଟା ପର୍ଯ୍ୟନ୍ତ ୨୯୪ କୋରୋନା ଭାଇରସରେ ଆକ୍ରାନ୍ତଙ୍କ ମୃତ୍ୟୁ ଘଟିଥିଲା । ଏହା ପରେ ଦେଶରେ ମୃତ୍ୟୁ ସଂଖ୍ୟା ୬,୬୪୨କୁ ବୃଦ୍ଧି ପାଇଥିଲା ।

ଆମେରିକା, ବ୍ରାଜିଲ, ଋଷ ଏବଂ ବ୍ରିଟେନ ପରେ ଭାରତ ବର୍ତ୍ତମାନ କୋରୋନା ଭୂତାଣୁ ଦ୍ୱାରା ପ୍ରଭାବିତ ଦେଶ ତାଲିକାରେ ପଞ୍ଚମ ସ୍ଥାନରେ ରହିଛି ।

Add Zee News as a Preferred Source