ବ୍ରିଟେନରେ କୋରୋନା ସୁନାମୀ, ମୃତ୍ୟୁ ସଂଖ୍ୟା ଛୁଇଁଲା ୧୫,୪୬୪

ଲଣ୍ଡନ: ବ୍ରିଟେନରେ କୋରୋନା ଭାଇରସ୍ ସଂକ୍ରମଣ ଯୋଗୁଁ ଗତ ୨୪ ଘଣ୍ଟାରେ ୮୮୮ ଜଣଙ୍କ ମୃତ୍ୟୁ ଘଟିଛି । ଫଳରେ ଏହା ସହିତ ଦେଶରେ କୋଭିଡ -19 ଯୋଗୁଁ ମୃତ୍ୟୁ ସଂଖ୍ୟା ୧୫,୪୬୪କୁ ବୃଦ୍ଧି ପାଇଛି । ବ୍ରିଟେନର ସ୍ୱାସ୍ଥ୍ୟ ମନ୍ତ୍ରଣାଳୟ ଏହାର ୱେବସାଇଟରେ ଲେଖିଛି ଯେ, ଏପ୍ରିଲ ୧୭ ତାରିଖ ଅପରାହ୍ନ ୫ଟା ସୁଦ୍ଧା କୋରୋନା ଭାଇରସ ସଂକ୍ରମଣ ଯୋଗୁଁ  ୧୫,୪୬୪ ଜଣଙ୍କ ମୃତ୍ୟୁ ଘଟିଛି ।

ଏଠାରେ କହି ରଖୁଛୁ ଯେ ବିଶ୍ୱରେ କୋରୋନା ଭାଇରସ ଯୋଗୁଁ ୨୨.୫ ଲକ୍ଷରୁ  ଅଧିକ ଲୋକ ସଂକ୍ରମିତ ହୋଇଛନ୍ତି । ଯେଉଁମାନଙ୍କ ମଧ୍ୟରୁ ପ୍ରାୟ ଅଧା ୟୁରୋପରେ ଅଛନ୍ତି । ସରକାରୀ ସୂତ୍ରରୁ AFP ଦ୍ୱାରା ସଂଗୃହିତ ତଥ୍ୟ ପ୍ରକାଶ ପାଇଛି । ସମଗ୍ର ବିଶ୍ୱରେ ବର୍ତ୍ତମାନ ଯାଏ ୨୨ ଲକ୍ଷ ୫୧ ହଜାର ୬୯୫ କୋରୋନା ପଜିଟିଭ ମାମଲା ଚିହ୍ନଟ କରାଯାଇଛି । ଏଥିରୁ ୧ ଲକ୍ଷ ୫୪ ହଜାର ୧୮୮ କୋରୋନା ଆକ୍ରାନ୍ତଙ୍କ ମୃତ୍ୟୁ ଘଟିଛି । ସବୁଠାରୁ ଅଧିକ ପ୍ରଭାବିତ ୟୁରୋପରେ ୧୧ ଲକ୍ଷ ୧୫ ହଜାର ୫୫୫ ଲୋକ କୋରୋନା ଆକ୍ରାନ୍ତ ଅଛନ୍ତି । ଏଥିରୁ ୯୭ ହଜାର ୯୮୫ ଜଣ କୋରୋନା ପଜିଟିଭଙ୍କ ମୃତ୍ୟୁ ଘଟିଛି । 

ଅନ୍ୟପକ୍ଷେ ଏହି ଭୂତାଣୁ ଆମେରିକାରେ ଦ୍ରୁତ ଗତିରେ ବ୍ୟାପିବାରେ ଲାଗିଛି ।ଏଠାରେ ଏପର୍ଯ୍ୟନ୍ତ ୭ ଲକ୍ଷ ୬ ହଜାର ୭୭୯ ଜଣ କୋରୋନା ପଜିଟିଭ ରିପୋର୍ଟ ହୋଇଛି । ଯେଉଁଥିରୁ ୩୭ ହଜାର ୭୯ ଜଣ କୋରୋନା ଆକ୍ରାନ୍ତଙ୍କ ମୃତ୍ୟୁ ଘଟିଛି । ଜାତୀୟ କର୍ତ୍ତୃପକ୍ଷ ଏବଂ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଦ୍ୱାରା ପ୍ରାପ୍ତ ସୂଚନା ଉପରେ ଆଧାର କରି AFP ଦ୍ୱାରା ଏକତ୍ରିତ କରାଯାଇଥିବା ସଂକ୍ରମଣ ସଂଖ୍ୟା ତୁଳନାରେ ପ୍ରକୃତ ସଂଖ୍ୟା ବହୁତ ଅଧିକ ହୋଇପାରେ । ଅନେକ ଦେଶ କେବଳ ଗମ୍ଭୀର ମାମଲାର ଯାଞ୍ଚ କରୁଛନ୍ତି ।