ଓଡ଼ିଶା ପରେ ଏହି ରାଜ୍ୟରେ ଏପ୍ରିଲ ୩୦ ଯାଏ ବୃଦ୍ଧି କରାଗଲା ଲକ୍ ଡାଉନ୍

ନୂଆଦିଲ୍ଲୀ: ସାରା ବିଶ୍ୱରେ କୋରୋନା ଭାଇରସ୍ ସଂକ୍ରମିତ ରୋଗୀଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି । ଅନ୍ୟ ଦେଶମାନଙ୍କ ପରି ଭାରତ ମଧ୍ୟ ଏହି ମହାମାରୀ ଦ୍ୱାରା ବହୁତ ପ୍ରଭାବିତ ହୋଇଛି । ଦେଶରେ ରୋଗୀଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି । ଏପର୍ଯ୍ୟନ୍ତ ୬୪୧୨  ଜଣ ଏହି ମହାମାରୀ ଭୂତାଣୁର ଶିକାର ହୋଇଛନ୍ତି । ଏଥିମଧ୍ୟରୁ ୫,୭୦୯ ଆକ୍ରାନ୍ତଙ୍କ ବର୍ତ୍ତମାନ ଚିକିତ୍ସା ଜାରି ରହିଛି । ଅନ୍ୟପକ୍ଷେ କୋରୋନା ମୁକାବିଲା ପାଇଁ ଦେଶରେ ମାର୍ଚ୍ଚ ୨୫ ତାରିଖରୁ ଲକ୍ ଡାଉନ୍ ଜାରି ରହିଛି । ଯାହା  ଏପ୍ରିଲ ୧୪ରେ ଶେଷ ହେବ । କିନ୍ତୁ ଏହା ପୂର୍ବରୁ ଓଡ଼ିଶାରେ ଲକ୍ ଡାଉନ୍ ଅବଧି ବୃଦ୍ଧି କରାଯାଇଥିଲା । ଏବେ ପଞ୍ଜାବ ସରକାର ମଧ୍ୟ ଏପ୍ରିଲ ୩୦ ପର୍ଯ୍ୟନ୍ତ ରାଜ୍ୟରେ ଲକ୍ ଡାଉନ୍ ଅବଧିକୁ ବୃଦ୍ଧି କରିଛି ।

ଉଲ୍ଲେଖନୀୟ କଥା ହେଉଛି, ମୁଖ୍ୟମନ୍ତ୍ରୀ ଅମରିନ୍ଦର ସିଂ ରାଜ୍ୟରେ ଲକ୍ ଡାଉନ୍ ଅବଧି ବୃଦ୍ଧିର ସଙ୍କେତ ଦେଇ ଶୁକ୍ରବାର କହିଥିଲେ ଯେ ଏହା ହଟାଇବାର ଠିକ୍ ସମୟ ନୁହେଁ ।  ସେ ଏହା ମଧ୍ୟ କହିଥିଲେ ଯେ ୧୫ ହଜାର କୋଟି ଟଙ୍କାର ପ୍ୟାକେଜ୍ ପର୍ଯ୍ୟାପ୍ତ ନୁହେଁ  ଏବଂ ଏଭଳି ପରିସ୍ଥିତିରେ ମୋଦି ସରକାର ରାଜ୍ୟ ସରକାରଙ୍କୁ ପର୍ଯ୍ୟାପ୍ତ ଆର୍ଥିକ ସହାୟତା ପ୍ରଦାନ କରିବା ଉଚିତ୍ ।

ଗତ ମାସରେ କେରଳ ପରେ ପଞ୍ଜାବ ସମଗ୍ର ରାଜ୍ୟରେ ଲକ୍ ଡାଉନ୍ କରିବାର ଘୋଷଣା କରିଥିଲା । ମୁଖ୍ୟମନ୍ତ୍ରୀ କହିଛନ୍ତି ଯେ, ଏପର୍ଯ୍ୟନ୍ତ ପଞ୍ଜାବରେ ୧୩୨ଟି ପଜିଟିଭ ମାମଲା ସାମ୍ନାକୁ ଆସିଛି । ଏଥିରୁ ଏପର୍ଯ୍ୟନ୍ତ ୧୧ ଜଣ ଆକ୍ରାନ୍ତଙ୍କ ମୃତ୍ୟୁ ହୋଇସାରିଛି । ସେ କହିଛନ୍ତି, 'ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ଆମେ କିଛି ସମୟ ନେଇଥିଲୁ କିନ୍ତୁ ବର୍ତ୍ତମାନ ପରିସ୍ଥିତି ସଂପୂର୍ଣ୍ଣ ନିୟନ୍ତ୍ରଣରେ ଅଛି । ଆମେ ଶୀଘ୍ର ଲୋକଙ୍କୁ ଟେଷ୍ଟ କରୁଛୁ । ଏପର୍ଯ୍ୟନ୍ତ ଆମେ ୨୮୭୭ ନମୁନା ସଂଗ୍ରହ କରିଛୁ । 

Add Zee News as a Preferred Source