ଲକ୍ ଡାଉନ୍ ବୃଦ୍ଧି ସପକ୍ଷରେ ପ୍ରାୟ ସମସ୍ତ ରାଜ୍ୟ, ପିଏମ ମୋଦି ଆଜି କରିପାରନ୍ତି ଦେଶକୁ ସମ୍ୱୋଧନ

ନୂଆଦିଲ୍ଲୀ: କୋରୋନା ଭୂତାଣୁ ରୋକିବା ପାଇଁ ସାରା ଦେଶରେ ଜାରି ରହିଛି ଲକ୍ ଡାଉନ୍ । ଏହି ଲକଡାଉନ୍ ଅବଧି ୨୧ ଦିନ ପରେ ଏପ୍ରିଲ ୧୪ରେ ସମାପ୍ତ ହେବାର ଅଛି । ଏହା ପୂର୍ବରୁ ଏ ସମ୍ପର୍କରେ କେନ୍ଦ୍ର ସରକାର ସମସ୍ତ ରାଜ୍ୟଙ୍କ ସହ ପରାମର୍ଶ କରୁଛନ୍ତି ଯେ ଏହାକୁ ଆଗକୁ ନିଆଯିବା ଉଚିତ କି ନୁହେଁ । ଏହି ପ୍ରସଙ୍ଗରେ ଆଜି ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ପ୍ରଧାନମନ୍ତ୍ରୀ ମୋଦୀଙ୍କ ବୈଠକ ଜାରି ରହିଛି । ଏହି ବୈଠକ ପରେ ପ୍ରଧାନମନ୍ତ୍ରୀ ମୋଦୀ ଦେଶକୁ ସମ୍ବୋଧିତ କରିପାରିବେ ବୋଲି ଅନୁମାନ କରାଯାଉଛି । ବର୍ତ୍ତମାନ ପର୍ଯ୍ୟନ୍ତ ଉପଲବ୍ଧ ସୂଚନା ଅନୁଯାୟୀ, ୧୧ ଜଣ ମୁଖ୍ୟମନ୍ତ୍ରୀଙ୍କ ମଧ୍ୟରୁ 10 ଜଣ ଲକ୍ ଡାଉନ୍ ବୃଦ୍ଧି କରିବାକୁ ପରାମର୍ଶ ଦେଇଛନ୍ତି । ଯେଉଁଥିରେ ରାଜସ୍ଥାନ, ପଞ୍ଜାବ, ଛତିଶଗଡ, ଦିଲ୍ଲୀ ଏବଂ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ସାମିଲ ରହିଛନ୍ତି । 

ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ ଲକ୍ ଡାଉନ୍ ଅବଧି ବୃଦ୍ଧି କରିବାକୁ ପରାମର୍ଶ ଦେଇଛନ୍ତି । ପ୍ରଧାନମନ୍ତ୍ରୀଙ୍କ ଲକ୍ ଡାଉନ୍ ନିଷ୍ପତ୍ତିକୁ ସେ ପ୍ରଶଂସା କରିଛନ୍ତି । ରବି ଫସଲ ସମ୍ପର୍କରେ କୃଷକଙ୍କ ସହାୟତା ନେଇ ସମସ୍ତ ରାଜ୍ୟ ସହ ଆଲୋଚନା କରି ଏକ ସାଧାରଣ ନୀତି ଗଠନ କରିବାକୁ ପରାମର୍ଶ ଦେଇଛନ୍ତି ।

ସେହିପରି ୟୁପି ସିଏମ୍ ଯୋଗୀ ଆଦିତ୍ୟନାଥ କୋରୋନା ସହିତ ଲଢ଼ିବା ପାଇଁ ଡିଜାଇନ୍ ହୋଇଥିବା ଆରୋଗ୍ୟ  ସେତୁ ଆପର ପ୍ରଶଂସା କରିଥିଲେ । ଉତ୍ତରପ୍ରଦେଶର ସିଏମ ଯୋଗୀ ଆଦିତ୍ୟନାଥ ମଧ୍ୟ ଲକଡାଉନ୍ ବୃଦ୍ଧି କରିବାକୁ କହିଛନ୍ତି ।

Add Zee News as a Preferred Source

ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ଯେ, ଆମ ରାଜ୍ୟ ଆର୍ଥିକ କ୍ଷତି ସହିଛି । କୋଭିଡ୍ 19 ସହିତ ଲଢ଼ିବା ପାଇଁ କେନ୍ଦ୍ରରୁ ଏକ ପ୍ୟାକେଜ୍ ଆବଶ୍ୟକ । ଲକ୍ ଡାଉନ୍ ବୃଦ୍ଧି କରାଯିବା ଉଚିତ କିନ୍ତୁ ମାନବ ଏବଂ ବ୍ୟବହାରିକ ଦୃଷ୍ଟିକୋଣରୁ ନିଷ୍ପତ୍ତି ନିଆଯାଉ । ହଟସ୍ପଟ୍ ଏବଂ କ୍ଲଷ୍ଟରଗୁଡିକର ସିଲ୍ କରାଯାଉ ।