କୋରୋନାର ପ୍ରଭାବ, ୭୫ ବର୍ଷ ପରେ ପୃଥିବୀର ବାୟୁ ସବୁଠାରୁ ଶୁଦ୍ଧ

ନୂଆଦିଲ୍ଲୀ: କୋରୋନା ଭୂତାଣୁ ଯୋଗୁଁ ଲକ୍ଷ ଲକ୍ଷ ଲୋକ ନିଶ୍ୱାସ ନେବାରେ ଅସୁବିଧାର ସମ୍ମୁଖୀନ ହେଉଛନ୍ତି । କିନ୍ତୁ କୋରୋନା ଭୂତାଣୁ ଦ୍ୱାରା ସୃଷ୍ଟି ହୋଇଥିବା ଲକ୍ ଡାଉନ୍ ଯୋଗୁଁ ପୃଥିବୀ ବହୁ ଉପକୃତ ହେଉଛି । ପୃଥିବୀ ବର୍ତ୍ତମାନ ଅଧିକ ନିର୍ମଳ ବାୟୁରେ ନିଶ୍ୱାସ ନେବାରେ ସକ୍ଷମ ହୋଇଛି । ୭୫ ବର୍ଷ ପରେ ପୃଥିବୀରେ ଏପରି ଶୁଦ୍ଧ ବାୟୁ ଦେଖାଯାଏ । ଏହାପୂର୍ବରୁ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଏତେ ସ୍ୱଚ୍ଛ ବାୟୁ ଥିଲା । 

ବର୍ତ୍ତମାନ ବୈଜ୍ଞାନିକମାନେ ଆଶା କରୁଛନ୍ତି ଯେ, ଦ୍ୱିତୀୟ ବିଶ୍ୱଯୁଦ୍ଧ ପରେ ଏହା ପ୍ରଥମ ଥର ହେବ ଯେ କାର୍ବନ ନିର୍ଗମନ ପୃଥିବୀରେ ସର୍ବନିମ୍ନ ହେବ । ଅର୍ଥାତ୍ କୋରୋନା କାରଣରୁ ଲକ୍ ଡାଉନ ଲାଗିଛି,  ଆଉ ଏହି ଲକଡାଉନ୍ ଯୋଗୁଁ ସମଗ୍ର ବିଶ୍ୱରେ କାର୍ବନ ନିର୍ଗମନକୁ ହ୍ରାସ କରିଛି ।

ଗ୍ଲୋବାଲ କାର୍ବନ ପ୍ରକଳ୍ପର ମୁଖ୍ୟ ରାବ ଜ୍ୟାକସନ କହିଛନ୍ତି ଯେ ଚଳିତ ବର୍ଷ କାର୍ବନ ନିର୍ଗମନ ୫ ପ୍ରତିଶତ ହ୍ରାସ ପାଇବ ବୋଲି ଆଶା କରାଯାଉଛି । ଏହାପୂର୍ବରୁ ୨୦୦୮ରେ  ଆର୍ଥିକ ମାନ୍ଦାବସ୍ଥା ସମୟରେ ଅଙ୍ଗାରକାମ୍ଳ ନିର୍ଗମନ ୧.୪ ପ୍ରତିଶତକୁ ଖସି ଆସିଥିଲା । ରାବ ଜ୍ୟାକସନ କାଲିଫର୍ଣ୍ଣିଆର ଷ୍ଟାନଫୋର୍ଡ ୟୁନିଭରସିଟିର ଜଣେ ପ୍ରଫେସର । ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଅନେକ ଦେଶ ବନ୍ଦ ହୋଇଯାଇଥିଲା । ମାର୍କେଟ, ଟ୍ରାଫିକ, ଶିଳ୍ପ ପ୍ରତିଷ୍ଠାନ ବନ୍ଦ ରହିଥିଲା ​​। ତେଣୁ ବାୟୁରେ ପ୍ରଦୂଷଣର ମାତ୍ରା ବହୁତ ହ୍ରାସ ପାଇଥିଲା । ତା’ପରେ ଏବେ  ସମାନ ଦୃଶ୍ୟ ଦେଖାଯାଉଛି ।

ରାବ କହିଛନ୍ତି ଯେ, ସୋଭିଏତ ସଂଘର ଭାଙ୍ଗିବା ସମୟରେ କିମ୍ବା ତେଲ ସମ୍ବନ୍ଧୀୟ ସଙ୍କଟ ସମୟରେ କାର୍ବନ ନିର୍ଗମନ ଏତେ ନିମ୍ନ ସ୍ତରରେ ଆସିନାହିଁ । କୋରୋନା ଭୂତାଣୁ ସଙ୍କଟ ସମୟରେ ଅଙ୍ଗାରକାମ୍ଳ ନିର୍ଗମନ ହ୍ରାସ ହେବା  ଏକ ଛୋଟ ଖୁସିର ଖବର ବୋଲି ସେ କହିଛନ୍ତି ।