କୋରୋନା ମାମଲାରେ ଆଉ ଏକ ରେକର୍ଡ କଲା ଭାରତ

ନୂଆଦିଲ୍ଲୀ: ଭାରତରେ କୋରୋନା ଭୂତାଣୁ (Coronavirus) ର ତାଣ୍ଡବଲୀଳା ଜାରି ରହିଛି । ପ୍ରତିଦିନ ରେକର୍ଡ ସଂଖ୍ୟକ କୋରୋନା ସଂକ୍ରମିତ (Coronavirus Positive) ମାମଲା ସାମ୍ନାକୁ ଆସୁଛି । ଏହାସହ ମୃତ୍ୟୁ ସଂଖ୍ୟାରେ ମଧ୍ୟ ରେକର୍ଡ ବୃଦ୍ଧି ଘଟୁଛି । ଯାହା ସମସ୍ତଙ୍କ ପାଇଁ ଚିନ୍ତାର କାରଣ ପାଲଟିଛି । ବିଗତ କିଛି ଦିନ ଧରି ଦେଶରେ ପ୍ରତିଦିନ ୯୦ ହଜାରରୁ ଅଧିକ ସଂକ୍ରମିତ ଚିହ୍ନଟ ହେଉଛନ୍ତି ।ଏହାସହ ମୃତ୍ୟୁ ସଂଖ୍ୟାରେ ମଧ୍ୟ ବୃଦ୍ଧି ରେକର୍ଡ କରାଯାଇଛି । କୋରୋନା ମାମଲାରେ ଭାରତ ପ୍ରତିଦିନ ବିଶ୍ୱ ରେକର୍ଡ କରି ଚାଲିଛି । ଅନ୍ୟପକ୍ଷେ ପୁଣିଥରେ ରାଜଧାନୀ ଦିଲ୍ଲୀରେ ବଢୁଥିବା କୋରୋନା ମାମଲା ଚିନ୍ତା ବଢ଼ାଇ ଦେଇଛି । ଏହା ବ୍ୟତୀତ ପ୍ରତିଦିନ ମହାରାଷ୍ଟ୍ରରେ ରେକର୍ଡ କୋଭିଡ-19 ସଂକ୍ରମିତ (COVID-19 Positive) ମାମଲା ସାମ୍ନାକୁ ଆସୁଛି । ଏହାସହ କର୍ଣ୍ଣାଟକ, ଆନ୍ଧ୍ରପ୍ରଦେଶ, ତାମିଲନାଡୁ ଏବଂ ଉତ୍ତରପ୍ରଦେଶରେ ମଧ୍ୟ କୋରୋନା ସଂକ୍ରମଣ ଦ୍ରୁତ ଗତିରେ ବଢ଼ିବାରେ ଲାଗିଛି । 

ଅଧିକ ପଢ଼ନ୍ତୁ:-ହରଭଜନ ସିଂଙ୍କୁ ୪ କୋଟି ଟଙ୍କାର ଚୂନା ଲଗାଇଲେ ଜଣେ ବ୍ୟବସାୟୀ !

ଅନ୍ୟପଟେ ଆଜି(ଶୁକ୍ରବାର) ସକାଳେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ଆକଳନ ଅନୁଯାୟୀ, ଦେଶରେ ବର୍ତ୍ତମାନ ଯାଏ କୋରୋନା ସଂକ୍ରମିତଙ୍କ ସଂଖ୍ୟା ୪୫,୬୨,୪୧୫କୁ ବୃଦ୍ଧି ପାଇଛି । ଏହାସହ ଏପର୍ଯ୍ୟନ୍ତ ୩୫,୪୨,୬୬୪ ରୋଗୀ ଆରୋଗ୍ୟ ଲାଭ କରିଛନ୍ତି । ଏହା ବ୍ୟତୀତ ଦେଶରେ ବର୍ତ୍ତମାନ ଯାଏ ୭୬,୨୭୧  ଜଣ ସଂକ୍ରମିତଙ୍କର ମୃତ୍ୟୁ ଘଟିଛି । ଦେଶରେ ବର୍ତ୍ତମାନ ୯,୪୩,୪୮୦ ସକ୍ରିୟ କୋରୋନା ମାମଲା ରହିଛି । ଗତ ୨୪ ଘଣ୍ଟା ମଧ୍ୟରେ ଦେଶରେ କୋରୋନା ମାମଲାର ରେକର୍ଡ ଭାଙ୍ଗିଛି । ଏହି ଅବଧିରେ ସମଗ୍ର ଦେଶରେ କୋଭିଡ-19ର ୯୬,୫୫୧ ନୂତନ ସଂକ୍ରମିତ ଚିହ୍ନଟ ହୋଇଛନ୍ତି । ଏହାସହ ୧,୨୦୯ ଜଣ ସଂକ୍ରମିତ ମୃତ୍ୟୁ ବରଣ କରିଛନ୍ତି ।