ଦେଶରେ ୮୦ ହଜାର ଟପିଲା କୋରୋନା ସଂକ୍ରମିତଙ୍କ ସଂଖ୍ୟା

ନୂଆଦିଲ୍ଲୀ: ଭାରତରେ ଜାରି ରହିଥିବା ଲକଡାଉନ୍ ସତ୍ତ୍ୱେ କୋରୋନା ସଙ୍କଟ ଜାରି ରଖିଛି । ଦେଶରେ କୋରୋନା ସଂକ୍ରମିତ ସଂଖ୍ୟା ୮୦ ହଜାରରୁ ଅଧିକ ପହଞ୍ଚିଛି । ଏଥିସହିତ ଏପର୍ଯ୍ୟନ୍ତ ୨୦ ଲକ୍ଷରୁ ଅଧିକ ଲୋକଙ୍କ କୋରୋନା ପରୀକ୍ଷା କରାଯାଇଛି । ଗୁରୁବାର ସନ୍ଧ୍ୟାରେ ୧୧ଟି ରାଜ୍ୟରୁ ମିଳିଥିବା ତଥ୍ୟ ପରେ ଦେଶରେ ସଂକ୍ରମିତଙ୍କ ସଂଖ୍ୟା ୮୦,୭୫୯ କୁ ବୃଦ୍ଧି ପାଇଛି । ଗତ ଦୁଇ ଦିନ ମଧ୍ୟରେ ୧୦ ହଜାରରୁ ଅଧିକ ଲୋକ ସଂକ୍ରମିତ ହୋଇଛନ୍ତି । ଏହାପୂର୍ବରୁ ଆଜି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ କହିଛନ୍ତି ଯେ, କୋରୋନା ଭାଇରସ ସଂକ୍ରମଣ ମାମଲା ଦ୍ୱିଗୁଣିତ ହେବା ହାର ବିଗତ ୩ ଦିନରେ ସୁଧାର ହୋଇ ୧୩.୯ ଦିନକୁ ହୋଇଯାଇଛି ।

ଦେଶର ସର୍ବାଧିକ ପ୍ରଭାବିତ ରାଜ୍ୟ ହେଉଛି ମହାରାଷ୍ଟ୍ର । ଏଠାରେ ସଂକ୍ରମିତଙ୍କ ସଂଖ୍ୟା ୨୭,୫୩୪କୁ ବୃଦ୍ଧି ପାଇଛି । ଆଜି ମହାରାଷ୍ଟ୍ରରେ ୧୬୦୨ ଜଣ କୋରୋନା ସଂକ୍ରମିତଙ୍କୁ ଚିହ୍ନଟ କରାଯାଇଛି । ଏଥି ସହିତ ଏସିଆର ମୁମ୍ବାଇର ସବୁଠୁ ବଡ ବସ୍ତି ଧରାବୀରେ ୧୦୦୦ ମାମଲା ସହିତ ମୁମ୍ବାଇର ହଟସ୍ପଟ୍ ହେବାକୁ ଯାଉଛନ୍ତି । ମହାରାଷ୍ଟ୍ର ପରେ ତାମିଲନାଡୁ ଦ୍ୱିତୀୟ ନମ୍ୱର ସ୍ଥାନରେ ରହିଛି । ଏଠାରେ ୯,୬୭୪ କୋରୋନା ସଂକ୍ରମିତ ଅଛନ୍ତି । ସେହିପରି ୯,୨୬୭ଟି କୋରୋନା ମାମଲା ସହିତ ଗୁଜୁରାଟ ତୃତୀୟ ସ୍ଥାନରେ ରହିଛି।

ଏଥି ସହିତ ଦେଶର ରାଜଧାନୀରେ ଗତ ୨୪ ଘଣ୍ଟା ମଧ୍ୟରେ ସର୍ବାଧିକ ସଂଖ୍ୟକ କୋରୋନା ସଂକ୍ରମଣ ରିପୋର୍ଟ ହୋଇଥିବା ଜଣାଯାଇଛି । ଗତ ୨୪ ଘଣ୍ଟା ମଧ୍ୟରେ ୪୭୨ କୋରୋନା ପଜିଟିଭ୍ ସାମ୍ନାକୁ ଆସିଛନ୍ତି । ତେବେ ଏହି ସମୟ ମଧ୍ୟରେ କୌଣସି କୋରୋନା ରୋଗୀଙ୍କ ମୃତ୍ୟୁ ହୋଇନାହିଁ । ଏଥି ସହିତ ଏହି ସମୟ ମଧ୍ୟରେ ୧୮୭ ରୋଗୀ ଆରୋଗ୍ୟ ହୋଇଥିଲେ । ଫଳରେ ଏପର୍ଯ୍ୟନ୍ତ ସମୁଦାୟ ୩,୦୪୫ ରୋଗୀ ଆରୋଗ୍ୟ ଲାଭ କରିଛନ୍ତି । ଦିଲ୍ଲୀରେ ମୋଟ ମୃତ୍ୟୁ ସଂଖ୍ୟା ୧୧୫କୁ ବୃଦ୍ଧି ପାଇଛି । ଏଠାରେ ସକ୍ରିୟ କୋରୋନା ରୋଗୀଙ୍କ ସଂଖ୍ୟା ହେଉଛି ୫୩୧୦ । ଦିଲ୍ଲୀରେ ସଂକ୍ରମିତ କୋରୋନା ଆକ୍ରାନ୍ତଙ୍କ ସଂଖ୍ୟା ହେଉଛି ୮,୪୭୦ ।