ରେଲୱେ ଅଧିକାରୀଙ୍କ ସହ ପିୟୁଷ ଗୋୟଲଙ୍କ ବୈଠକ, ଫସିଥିବା ଲୋକଙ୍କ ପାଇଁ ଟ୍ରେନ ଚଳାଇବା ଉପରେ ଚର୍ଚ୍ଚା

ନୂଆଦିଲ୍ଲୀ: କୋରୋନା ଭାଇରସ୍ ରୋକିବା ପାଇଁ ସାରା ଦେଶରେ ଜାରି ରହିଛି ଲକଡାଉନ୍ । ଏହା ମେ ୩ ତାରିଖ ପର୍ଯ୍ୟନ୍ତ ବଳବତ୍ତର ରହିବ । ଅନ୍ୟପକ୍ଷେ ରେଳ ମନ୍ତ୍ରୀ ପୀୟୁଷ ଗୋୟଲ ସ୍ୱତନ୍ତ୍ର ରେଳ ଚଳାଚଳ ସମ୍ପର୍କରେ ଭିଡିଓ କନଫରେନ୍ସିଂ ମାଧ୍ୟମରେ ରେଳ ବୋର୍ଡର ଚେୟାରମ୍ୟାନ୍ ତଥା ଗୁରୁତ୍ୱପୂର୍ଣ୍ଣ ଅଧିକାରୀଙ୍କ ସହ ଆଲୋଚନା କରିଛନ୍ତି । ରେଳ ଅଧିକାରୀମାନେ ସୂଚନା ଦେଇଛନ୍ତି ଯେ, ରାଜ୍ୟ ସରକାରଙ୍କ ତରଫରୁ କିଛି ରେଲୱେ ଜୋନାଲକୁ ସ୍ୱତନ୍ତ୍ର ଟ୍ରେନ୍ ଚଳାଇବାକୁ ଅନୁରୋଧ କରାଯାଇଛି । ଏ ବାବଦରେ ନିଷ୍ପତ୍ତି ନିଆଯିବା ମାତ୍ରେ ଗଣମାଧ୍ୟମକୁ ସୂଚନା ଦିଆଯିବ ।

ଏଠାରେ କହି ରଖୁଛୁ ଯେ, ଦେଶରେ ପ୍ରବାସୀ ଶ୍ରମିକଙ୍କୁ ସେମାନଙ୍କ ଘରକୁ ପଠାଇବା ପ୍ରକ୍ରିୟା ଆରମ୍ଭ ହୋଇଛି । ଲକଡାଉନ ମଧ୍ୟରେ ରେଲୱେ ଆଜି ପ୍ରଥମ ଟ୍ରେନ୍ ଚଲାଇଛି । ଟ୍ରେନ୍ ସକାଳ ୪.୫୦ରେ ତେଲେଙ୍ଗାନାରୁ ୧୨୦୦ ପ୍ରବାସୀ ଶ୍ରମିକଙ୍କୁ ନେଇ ଝାଡଖଣ୍ଡର ହାତିଆ ଅଭିମୁଖେ ଯାତ୍ରା କରିଛି । ସାମାଜିକ ଦୂରତା ପ୍ରତି ଧ୍ୟାନ ଦେଇ ପ୍ରତ୍ୟେକ ବଗିରେ ୭୨ ପରିବର୍ତ୍ତେ ୫୪ ଜଣ ଲୋକଙ୍କୁ ବସାଯାଇଛି । ଅର୍ଥାତ ମିଡିଲ ବର୍ଥକୁ ହଟାଇ ଦିଆଯାଇଛି । ଏହି ସମୟରେ ରେଳବାଇ ସ୍ୱତନ୍ତ୍ର ଟ୍ରେନ୍ ଚଳାଇବାକୁ ପ୍ରସ୍ତୁତ ହେଉଛି । ଏ ସମ୍ପର୍କରେ ରେଳ ମନ୍ତ୍ରୀ ଏବଂ ରେଳ ବୋର୍ଡର ଚେୟାରମ୍ୟାନ୍ ଏବଂ ଅନ୍ୟ ଅଧିକାରୀଙ୍କ ମଧ୍ୟରେ ଆଲୋଚନା ମଧ୍ୟ ହୋଇଛି ।