ଦିଲ୍ଲୀରେ କୋରୋନା ଆକ୍ରାନ୍ତଙ୍କ ସଂଖ୍ୟା ୧୦୦୦ରୁ ଉର୍ଦ୍ଧ୍ୱ, ମରକଜର ପ୍ରାୟ ୭୦ ପ୍ରତିଶତ ମାମଲା

ନୂଆଦିଲ୍ଲୀ: ଦେଶର ରାଜଧାନୀ ଦିଲ୍ଲୀରେ ଦ୍ରୁତଗତିରେ ବୃଦ୍ଧି ପାଉଛି କୋରୋନା ଭୂତାଣୁ ଆକ୍ରାନ୍ତଙ୍କ ସଂଖ୍ୟା । ଶନିବାର କୋରୋନା ଭାଇରସ୍ ସଂକ୍ରମିତଙ୍କ ସଂଖ୍ୟା ୧୦୦୦ ଅତିକ୍ରମ କରିଛି । ଶନିବାର ସନ୍ଧ୍ୟାରେ ପ୍ରକାଶିତ ତଥ୍ୟ ଅନୁଯାୟୀ, ଦିଲ୍ଲୀରେ ୧ ହଜାର ୬୯ ଜଣଙ୍କୁ କୋରୋନା ପଜିଟିଭ ଥିବାର ପୃଷ୍ଟି ହୋଇଛି । ମୋଟ ସଂକ୍ରମିତଙ୍କ ମଧ୍ୟରୁ ୭୧୨ ଅର୍ଥାତ୍ ପ୍ରାୟ ୭୦ ପ୍ରତିଶତ ଲୋକ ତବଲିଗି ଜାମାତର ବୋଲି ଜଣାପଡ଼ିଛି । ଯେଉଁମାନଙ୍କୁ ବିଗତ ଦିନରେ ନିଜାମୁଦ୍ଦିନ ସ୍ଥିତ ମରକଜରୁ ବାହାର କରାଯାଇଥିଲା ।

ଦିଲ୍ଲୀରେ ଗତ ୨୪ ଘଣ୍ଟା ମଧ୍ୟରେ ୧୬୬ଟି ନୂଆ କୋରୋନା ମାମଲା ଆସିଛି । ଯେଉଁଥିରୁ ୧୨୮ଟି ମାରକଜର ରହିଛି । ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀରେ କୋରୋନା ଭୂତାଣୁ ଯୋଗୁଁ ୫ ଜଣଙ୍କ ମୃତ୍ୟୁ ଘଟିଛି । ​​ଯେଉଁଥିପାଇଁ ଦିଲ୍ଲୀରେ ଏହି ଭୂତାଣୁ ସଂକ୍ରମଣ ଯୋଗୁଁ ମୃତ୍ୟୁବରଣ କରିଥିବା ଲୋକଙ୍କ ସଂଖ୍ୟା ୧୯କୁ ବୃଦ୍ଧି ପାଇଛି ।

ଦିଲ୍ଲୀ ସରକାର ନିଜ ସ୍ୱାସ୍ଥ୍ୟ ବୁଲେଟିନରେ ନିଜାମୁଦ୍ଦିନ ମରକଜଙ୍କ ବିଷୟରେ ଉଲ୍ଲେଖ କରିବା ବନ୍ଦ କରି ଦେଇଛନ୍ତି । ମରକଜ ମାମଲାକୁ ଦିଲ୍ଲୀ ସରକାର 'ସ୍ପେଶାଲ୍ ଅପରେସନ୍' ବୋଲି କହୁଛନ୍ତି । ନିଜାମୁଦ୍ଦିନ ମରକଜ ମାମଲା ସାମ୍ନାକୁ ଆସିବା ଦିନଠାରୁ ଦିଲ୍ଲୀ ସରକାର ନିଜ ସ୍ୱାସ୍ଥ୍ୟ ବୁଲେଟିନରେ ଦୈନିକ କହି ଆସୁଥିଲେ ଯେ ମରକଜର ମୋଟ କେତେ ମାମଲା ଏବଂ ଗତ ୨୪ ଘଣ୍ଟା ମଧ୍ୟରେ କେତେ ମାମଲା ସାମ୍ନାକୁ ଆସିଛି ।

ସାରା ବିଶ୍ୱରେ ଏକ ଲକ୍ଷରୁ ଅଧିକ ଲୋକଙ୍କ ଜୀବନ ନେଇଥିବା କୋରୋନା ଭାଇରସ ଭାରତରେ ଦ୍ରୁତ ଗତିରେ ବ୍ୟାପିବାରେ ଲାଗିଛି । ଏପର୍ଯ୍ୟନ୍ତ ଭାରତରେ COVID-19 ଯୋଗୁଁ ୨୪୨  ଜଣଙ୍କର ମୃତ୍ୟୁ ଘଟିଛି ଏବଂ ୭୫୩୯ଟି କୋରୋନା ସଂକ୍ରମଣ ରିପୋର୍ଟ ସାମ୍ନାକୁ ଆସିଛି । ଶନିବାର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ସର୍ବଶେଷ ତଥ୍ୟ ଅନୁଯାୟୀ ଗତ ୨୪ ଘଣ୍ଟା ମଧ୍ୟରେ ଦେଶରେ ମୋଟ ୭୬୮ ଟି କୋରୋନା ମାମଲା ଆସିଛି ଏବଂ ୩୬ ଜଣଙ୍କ ମୃତ୍ୟୁ ହୋଇଛି । ତେବେ କିଛି ଆଶ୍ୱସ୍ତି ମିଳିଛି ଯେ ଏପର୍ଯ୍ୟନ୍ତ ୬୫୩ ଜଣ ଲୋକ ଏହି ରୋଗରୁ ଆରୋଗ୍ୟ ହୋଇସାରିଛନ୍ତି ।