ଅଶ୍ୱିନ ସମେତ ଅନ୍ୟ ୨ କ୍ରିକେଟରଙ୍କ କାଉଣ୍ଟି ଚୁକ୍ତି ହେଲା ରଦ୍ଦ

ଲଣ୍ଡନ: ଭାରତର ସିନିୟର ଅଫ୍ ସ୍ପିନର ରବିଚନ୍ଦ୍ରନ୍ ଅଶ୍ୱିନ୍ ଏବଂ ଇଂଲଣ୍ଡର କାଉଣ୍ଟି ଦଳ ୟର୍କଶର୍ କ୍ରିକେଟ୍ କ୍ଲବ୍ ମଧ୍ୟରେ କୋରୋନା ଭୂତାଣୁ ମହାମାରୀ ଯୋଗୁଁ ସୋମବାର ଦିନ ଚୁକ୍ତିନାମାକୁ ବାତିଲ କରିଦିଆଯାଇଛି । କୋରୋନା ମହାମାରୀ ଯୋଗୁଁ ଇଂଲଣ୍ଡ ଏବଂ ୱେଲ୍ସ କ୍ରିକେଟ୍ ବୋର୍ଡ (ECB) ଜୁଲାଇ ୧ ସୁଦ୍ଧା ସମସ୍ତ ପ୍ରକାର ବୃତ୍ତିଗତ କ୍ରିକେଟ୍ ବାତିଲ କରିଦେଇଛି ।

ଜାନୁଆରୀରେ କ୍ଲବ ସହିତ ଚୁକ୍ତି କରିଥିବା ଅଶ୍ୱିନ୍ ଦଳ ପାଇଁ ଅବଶିଷ୍ଟ କାଉଣ୍ଟି ଚାମ୍ପିଅନସିପ୍ ମ୍ୟାଚ୍ ଖେଳିବେ ବୋଲି ଆଶା କରାଯାଉଥିଲା । ଅଶ୍ୱିନ୍ ତୃତୀୟ ଥର ପାଇଁ କାଉଣ୍ଟି କ୍ରିକେଟ୍ ର ଏକ ଅଂଶ ହୋଇଥାଆନ୍ତେ । ଏହାପୂର୍ବରୁ ସେ ୱର୍କେଷ୍ଟେରେଶର୍ ଏବଂ ନଟିଂଘମଶର ପାଇଁ ଖେଳିଛନ୍ତି । ଅନ୍ୟ ଦୁଇ ବିଦେଶୀ ଖେଳାଳି ଦକ୍ଷିଣ ଆଫ୍ରିକାର ସ୍ପିନର କେଶବ ମହାରାଜ ଏବଂ ୱେଷ୍ଟଇଣ୍ଡିଜ୍ ବ୍ୟାଟ୍ସମ୍ୟାନ୍ ନିକୋଲାସ ପୁରାନଙ୍କ ଚୁକ୍ତିନାମା ବାତିଲ କରିବାକୁ ମଧ୍ୟ କ୍ଲବ ଘୋଷଣା କରିଛି ।

ୟର୍କସରର କ୍ରିକେଟ୍ ନିର୍ଦ୍ଦେଶକ ମାର୍ଟିନ ମୋକ୍ସନ୍ କହିଛନ୍ତି ଯେ, ସର୍ବପ୍ରଥମେ ମୁଁ ଏହି ପ୍ରସଙ୍ଗରେ ଖେଳାଳିଙ୍କ ବୁଝାମଣାକୁ ପ୍ରଶଂସା କରୁଛି । କୋଭିଡ-19 ମହାମାରୀ ଆରମ୍ଭ ସମୟରେ ଆମେ ଖେଳାଳି ଏବଂ ସେମାନଙ୍କ ଏଜେଣ୍ଟମାନଙ୍କ ସହିତ ନିରନ୍ତର ଯୋଗାଯୋଗରେ ରହିଥିଲୁ ।