ମହାରାଷ୍ଟ୍ରରେ କୋରୋନା ଭାଙ୍ଗିଲା ମୃତ୍ୟୁର ରେକର୍ଡ

ମୁମ୍ୱାଇ: ମହାରାଷ୍ଟ୍ରରେ କୋରୋନା ଭୂତାଣୁ ସଂକ୍ରମଣ ଥମିବାର ନାଁ ନେଉନାହିଁ । ଗତ ୨୪ ଘଣ୍ଟା ମଧ୍ୟରେ କୋରୋନା ଭୂତାଣୁର ୨୦୧୯ଟି ନୂଆ ମାମଲା ଚିହ୍ନଟ ହୋଇଥିବାର ଜଣାଯାଇଛି । ଏହାସହ ୯୭ ଜଣ କୋରୋନା ଆକ୍ରାନ୍ତଙ୍କ ମୃତ୍ୟୁ ଘଟିଛି । ଯାହା ଏପର୍ଯ୍ୟନ୍ତ ଗୋଟିଏ ଦିନରେ ସର୍ବାଧିକ । ରାଜ୍ୟରେ ସମୁଦାୟ  ୫୪ ହଜାର ୭୫୮ କୋରୋନା ପଜିଟିଭ ମାମଲା ରହିଛି । ଏହାସହ ଏପର୍ଯ୍ୟନ୍ତ ରାଜ୍ୟରେ ୧୭୯୨ ଜଣ କୋରୋନା ଆକ୍ରାନ୍ତଙ୍କର ମୃତ୍ୟୁ ହୋଇଛି । 

ଅନ୍ୟପକ୍ଷେ ଗତ ୨୪ ଘଣ୍ଟା ମଧ୍ୟରେ ମାୟା ନଗରୀ ମୁମ୍ବାଇରେ ୧୦୦୨ଟି ନୂଆ କୋରୋନା ମାମଲା ଚିହ୍ନଟ ହୋଇଛି । ଏହାସହିତ ୩୯ ଜଣ କୋରୋନା ସଂକ୍ରମିତଙ୍କର ମୃତ୍ୟୁ ଘଟିଛି । ମୁମ୍ବାଇରେ ବର୍ତ୍ତମାନ ଯାଏ ମୋଟ ୩୨ ହଜାର ୯୭୪ ଜଣ କୋରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଏହାସହିତ ୧୦୬୫ ଜଣ କୋରୋନା ସଂକ୍ରମିତଙ୍କର ମୃତ୍ୟୁ ହୋଇଛି ।

ମହାରାଷ୍ଟ୍ରରେ ବର୍ତ୍ତମାନ ୩୬,୦୦୦ରୁ ଅଧିକ ସକ୍ରିୟ କୋରୋନା ମାମଲା ରହିଛି । ବର୍ତ୍ତମାନ ୧୬ ହଜାର ୯୫୪ କୋରୋନା ସଂକ୍ରମିତ ଚିକିତ୍ସା ପରେ ଆରୋଗ୍ୟ ଲାଭ କରିଛନ୍ତି । ଗତ 24 ଘଣ୍ଟା ମଧ୍ୟରେ ୧୧୬୮ କୋରୋନା ସଂକ୍ରମିତ ଆରୋଗ୍ୟ ଲାଭ କରିଛନ୍ତି । ଏପର୍ଯ୍ୟନ୍ତ ମହାରାଷ୍ଟ୍ରରେ ୩ ଲକ୍ଷ ୯୦ ହଜାର ୧୭୦ କୋରରୋନା ପରୀକ୍ଷା କରାଯାଇଛି । ଏଥିମଧ୍ୟରୁ ୫୪ ହଜାର ୭୫୮ ପଜିଟିଭ ମିଳିଛି । ଏହାପୂର୍ବରୁ ସୋମବାର ମହାରାଷ୍ଟ୍ରରେ ୨୪୩୬ ନୂଆ କୋରୋନା ସଂକ୍ରମିତ ଚିହ୍ନଟ ହୋଇଥିଲେ । ଏହାସହ ୬୦ ଜଣ ସଂକ୍ରମିତ ଲୋକଙ୍କର ମୃତ୍ୟୁ ଘଟିଥିଲା । ଏଥିମଧ୍ୟରୁ ମୁମ୍ବାଇର ୩୮ ସଂକ୍ରମିତଙ୍କ ମୃତ୍ୟୁ ସାମିଲ ରହିଛି ।