ଏହି ୨ ରାଜ୍ୟରେ ୧ ଲକ୍ଷ ପାର କଲା କୋରୋନା ଆକ୍ରାନ୍ତଙ୍କ ସଂଖ୍ୟା

ନୂଆଦିଲ୍ଲୀ: ଦେଶରେ କୋରୋନା ଭୂତାଣୁର ପ୍ରକୋପ ଜାରି ରହିଛି । ଦେଶରେ ପ୍ରତିଦିନ ପ୍ରାୟ ୫୦ ହଜାର ସଂକ୍ରମିତ ମାମଲା ସାମ୍ନାକୁ ଆସୁଛି । ଏହା ବ୍ୟତୀତ କ୍ରମାଗତ ଏହି ମହାମାରୀ ଭୂତାଣୁ ଯୋଗୁଁ ମୃତ୍ୟୁ ସଂଖ୍ୟାରେ ମଧ୍ୟ ବୃଦ୍ଧି ଘଟୁଛି । ଭାରତରେ ବର୍ତ୍ତମାନ ପର୍ଯ୍ୟନ୍ତ ୧୪,୩୫,୪୫୩ ପଜିଟିଭ ମାମଲା ରିପୋର୍ଟ ହୋଇଛି । ଏହା ବ୍ୟତୀତ ଏପର୍ଯ୍ୟନ୍ତ  ୩୨,୭୭୧ ସଂକ୍ରମିତ ମୃତ୍ୟୁ ବରଣ କରିଛନ୍ତି । ଏହି ସମୟରେ ମହାରାଷ୍ଟ୍ର, ତାମିଲନାଡୁ ଓ ଦିଲ୍ଲୀ ପରେ କର୍ଣ୍ଣାଟକ ଏବଂ ଆନ୍ଧ୍ରପ୍ରଦେଶରେ କେରୋନା ସଂକ୍ରମିତଙ୍କ ସଂଖ୍ୟା ୧ ଲକ୍ଷ ଅତିକ୍ରମ କରିଛି ।

ଉଭୟ ରାଜ୍ୟରେ ପ୍ରତିଦିନ ୫,୦୦୦ ହଜାରରୁ ଅଧିକ ମାମଲା ସାମ୍ନାକୁ ଆସୁଛି । ସୋମବାର କର୍ଣ୍ଣାଟକରେ ରେକର୍ଡ ସଂଖ୍ୟକ ୫,୩୨୪ ସଂକ୍ରମିତ ମାମଲା ରିପୋର୍ଟ ହୋଇଥିବା ବେଳେ ମୋଟ ସଂକ୍ରମିତ ସଂଖ୍ୟା ୧,୦୧,୪୬୫ରେ ପହଞ୍ଚିଛି । ଏଥି ସହିତ ଗୋଟିଏ ଦିନରେ ରାଜ୍ୟର ରାଜଧାନୀ ବେଙ୍ଗାଲୁରୁରେ ୧,୪୭୦ ନୂଆ ସଂକ୍ରମିତ ମାମଲା  ଚିହ୍ନଟ ହୋଇଛି । କେବଳ ବେଙ୍ଗାଲୁରୁରେ ସମୁଦାୟ ୪୬,୯୪୩ ସଂକ୍ରମିତ ମାମଲା ରହିଛି । କର୍ଣ୍ଣାଟକରେ ଗତ ୨୪ ଘଣ୍ଟା ମଧ୍ୟରେ କୋରୋନା ଭାଇରସ କାରଣରୁ ୭୫ ଜଣ ପ୍ରାଣ ହରାଇଛନ୍ତି । ଏହା ସହିତ ମୃତ୍ୟୁ ସଂଖ୍ୟା ୧,୯୫୩କୁ ବୃଦ୍ଧି ପାଇଛି । ରାଜ୍ୟ ସରକାର ଦେଇଥିବା ତଥା ଅନୁସାରେ, ରାଜ୍ୟରେ ୬୧,୮୧୯ ସକ୍ରିୟ କୋରୋନା ମାମଲା ରହିଛି ।

ଅନ୍ୟପକ୍ଷରେ ରବିବାର ଦିନ ଆନ୍ଧ୍ରପ୍ରଦେଶରେ ୭,୬୨୭ ନୂଆ ସଂକ୍ରମିତ ମାମଲା ସାମ୍ନାକୁ ଆସିଥିଲା । ଫଳରେ ରାଜ୍ୟରେ ସଂକ୍ରମିତଙ୍କ ସଂଖ୍ୟା ୯୬,୨୯୮ରୁ ବୃଦ୍ଧି ଘଟି ୧,୦୨,୩୪୯ରେ ପହଞ୍ଚି ଯାଇଥିଲା । ରାଜ୍ୟରେ ଗତ ୨୪ ଘଣ୍ଟା ମଧ୍ୟରେ ୪୯ ଜଣ ସଂକ୍ରମିତଙ୍କର ମୃତ୍ୟୁ ଘଟିଛି । ଫଳରେ ପ୍ରାଣ ହରାଇଥିବା ସଂକ୍ରମିକଙ୍କ ସଂଖ୍ୟା ୧,୦୯୦କୁ ବୃଦ୍ଧି ପାଇଛି । ରାଜ୍ୟରେ ଗତ ୨୪ ଘଣ୍ଟା ମଧ୍ୟରେ ୩,୨୩୪ ରୋଗୀଙ୍କୁ ଚିକିତ୍ସା ପରେ ଡାକ୍ତରଖାନାରୁ ଡିସଚାର୍ଜ କରାଯାଇଛି । ହେଲଥ ବୁଲେଟିନ୍ ଅନୁଯାୟୀ, ବର୍ତ୍ତମାନ ରାଜ୍ୟରେ ୫୧,୭୦୧ ସକ୍ରିୟ ମାମଲା ରହିଛି । ଚିକିତ୍ସା ପରେ ୪୯,୫୫୮  ରୋଗୀ ସୁସ୍ଥ ହୋଇଛନ୍ତି ।