ଲକଡାଉନ କଠୋର ହେବା ପୂର୍ବରୁ ଏହି ରାଜ୍ୟର ଦୋକାନଗୁଡ଼ିକରେ ଭିଡ଼, ସାମାଜିକ ଦୂରତା ମାନିଲେନି ଲୋକ

ଚେନ୍ନାଇ: ତାମିଲନାଡୁର ପ୍ରମୁଖ ସହରରେ ବହୁ ସଂଖ୍ୟାରେ ଲୋକମାନେ ଖାଦ୍ୟ ଏବଂ ପନିପରିବା ଦୋକାନରେ ଏକାଠି ହୋଇଛନ୍ତି । ଶନିବାର ଏହି ସମୟ ମଧ୍ୟରେ ସାମାଜିକ ଦୂରତ୍ୱର ନିୟମକୁ ମଧ୍ୟ ଅନଦେଖା କରାଯାଇଛି । ଏହା ପରେ ରାଜ୍ୟ ମୁଖ୍ୟମନ୍ତ୍ରୀ କେ ପଲାନିସ୍ୱାମୀ କହିଛନ୍ତି ଯେ, ତାମିଲନାଡୁରେ ପନିପରିବା ଏବଂ କିରାନା ଦୋକାନ ଅପରାହ୍ନ ୩ଟା ପର୍ଯ୍ୟନ୍ତ ଖୋଲା ରହିବ । ରାଜଧାନୀ ଚେନ୍ନାଇ ସମେତ ଅନ୍ୟାନ୍ୟ ସ୍ଥାନରେ ଲକଡାଉନକୁ ଆହୁରି କଡାକଡି କରିବାକୁ ସରକାର ଘୋଷଣା କରିଥିଲେ । ଯାହା ପରେ ଲୋକଙ୍କ ମଧ୍ୟରେ ବିଶୃଙ୍ଖଳା ଦେଖାଦେଇଥିଲା ।

ଖାଦ୍ୟ ସାମଗ୍ରୀ, ପନିପରିବା ଏବଂ ଅନ୍ୟାନ୍ୟ ଅତ୍ୟାବଶ୍ୟକୀୟ ଜିନିଷ ସଂଗ୍ରହ କରିବା ପାଇଁ ଶନିବାର ସକାଳେ ହଜାର ହଜାର ଲୋକ ଖାଦ୍ୟ ଏବଂ ପନିପରିବା ଦୋକାନରେ ପହଞ୍ଚିଥିଲେ । ଏହି ଅବଧି ମଧ୍ୟରେ କୋରୋନା ଭାଇରସ୍ ନିୟନ୍ତ୍ରଣ କରିବା ପାଇଁ ଲାଗୁ ହୋଇଥିବା ସାମାଜିକ ଦୂରତା ନିୟମ ମଧ୍ୟ ଗୁରୁତର ଭାବରେ ଉଲ୍ଲଂଘନ କରାଯାଇଥିଲା ।

ତାମିଲନାଡୁ ସରକାର ଶୁକ୍ରବାର ଚେନ୍ନାଇ ସମେତ ମଦୁରାଇ, କୋଏମ୍ବାଟୁର, ସଲେମ ଏବଂ ତିରୁପୁରରେ ୪ ଦିନ ପାଇଁ ଲକଡାଉନକୁ ଆହୁରି କଡାକଡି କରିବାକୁ ଘୋଷଣା କରିଥିଲେ । ଏହି ସମୟରେ ସମସ୍ତ କିରାନା ଦୋକାନ ଏବଂ ବେସରକାରୀ ୟୁନିଟ୍ ବନ୍ଦ ରହିବ । ସରକାର ନିର୍ଦ୍ଦେଶ ଦେଇଛନ୍ତି ଯେ, ଏହି ସମୟ ମଧ୍ୟରେ କେବଳ ମୋବାଇଲ୍ ଭେଜିଟେବଲ  ଆଉଟଲେଟ୍ ଏବଂ ରେଷ୍ଟୁରାଣ୍ଟରୁ ଖାଦ୍ୟ ଅନଲାଇନ ବିତରଣକୁ ଅନୁମତି ଦିଆଯିବ । ତେବେ ଡାକ୍ତରଖାନାର ଔଷଧ ଦୋକାନ ଏବଂ ମେଡିକାଲ ଷ୍ଟୋର୍‌ଗୁଡ଼ିକ ଖୋଲା ରହିବ।

ତାମିଲନାଡୁ ହେଉଛି ଭାରତର ସର୍ବାଧିକ କୋରୋନା ଭାଇରସର ପ୍ରଭାବିତ ରାଜ୍ୟଗୁଡ଼ିକ ମଧ୍ୟରୁ ଅନ୍ୟତମ । ବର୍ତ୍ତମାନ ସୁଦ୍ଧା ରାଜ୍ୟରେ ୧,୭୭୫୫ରୁ ଅଧିକ କୋରୋନା ସଂକ୍ରମଣ  ମାମଲା ସାମ୍ନାକୁ ଆସିଛି । ଯେଉଁଥିରୁ ୨୨ ଜଣ ପ୍ରାଣ ହରାଇଛନ୍ତି । ଚେନ୍ନାଇ କୋରୋନା ଦ୍ୱାରା ସର୍ବାଧିକ ପ୍ରଭାବିତ ହୋଇଛି । ଏଠାରେ କୋରୋନା ସଂକ୍ରମଣର ୪୫୨ଟି ମାମଲା ଅଛି । ଏଥି ସହିତ କୋଏମ୍ବାଟୁରରେ ୧୪୧, ତିରୁପୁରରେ ୧୧୦, ମଦୁରାଇରେ ୫୬ ଏବଂ ସଲେମରେ ୩୦ଟି ମାମଲା ସାମ୍ନାକୁ ଆସିଛି ।