'ଉମ୍ଫୁନ'କୁ ନେଇ ଆଜି ଗୃହ ମନ୍ତ୍ରଣାଳୟ ଓ ଏନଡିଏମଏ ସହ ବୈଠକ କରିବେ ପିଏମ ମୋଦି

ନୂଆଦିଲ୍ଲୀ: କୋରୋନା ଭୂତାଣୁ ସଙ୍କଟ ମଧ୍ୟରେ ଦେଶରେ ଦେଖାଦେଇଛି ଆଉ ଏକ ବଡ଼ ସଙ୍କଟ । ସାମୁଦ୍ରିକ ଝଡ଼ ଉମ୍ଫୁନ ଦ୍ରୁତଗତିରେ ମାଡ଼ି ଆସୁଛି । ଏହା ଓଡ଼ିଶା-ପଶ୍ଚିମବଙ୍ଗ ପରି ରାଜ୍ୟରେ ବହୁତ ଧ୍ୱଂସଲୀଳା କରିପାରେ ବୋଲି ଆଶଙ୍କା କରାଯାଉଛି । ଯାହାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ସନ୍ଧ୍ୟାରେ ଏକ ଉଚ୍ଚ ସ୍ତରୀୟ ବୈଠକ ଡାକିଛନ୍ତି । ଏହି ବୈଠକରେ ଉମ୍ଫୁନ ଯୋଗୁଁ ସୃଷ୍ଟି ହେବାକୁ ଥିବା ପରିସ୍ଥିତିର ସମୀକ୍ଷା କରିବେ । କେନ୍ଦ୍ର ଗୃହମନ୍ତ୍ରୀ ଅମିତ ଶାହା କହିଛନ୍ତି ଯେ, ପ୍ରଧାନମନ୍ତ୍ରୀ ଅପରାହ୍ନ ୪ଟାରେ ଗୃହ ମନ୍ତ୍ରଣାଳୟ (ଏମଏଚଏ) ଓ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନଡିଏମଏ) ସହିତ ଏକ ବୈଠକ କରିବେ । ବାତ୍ୟା ଯୋଗୁଁ ଦେଶର ବିଭିନ୍ନ ସ୍ଥାନରେ ଦେଖାଦେଇଥିବା ପରିସ୍ଥିତିର ସମୀକ୍ଷା କରାଯିବ । ପ୍ରଧାନମନ୍ତ୍ରୀ ହେଉଛନ୍ତି ଏନଡିଏମଏର ଅଧ୍ୟକ୍ଷ ।

ଗୃହ ମନ୍ତ୍ରଣାଳୟ ଏହା ପୂର୍ବରୁ ସୂଚନା ଦେଇଥିଲା ଯେ ବାତ୍ୟା 'ଉମ୍ଫୁନ୍' ସୋମବାର ସନ୍ଧ୍ୟା ପର୍ଯ୍ୟନ୍ତ ଏକ ଭୟଙ୍କର ରୂପରେ ପରିଣତ ହୋଇପାରେ । ବୁଧବାର ୧୮୫ କିଲୋମିଟର ବେଗରେ ପବନ ବହିବା ସହିତ ପଶ୍ଚିମବଙ୍ଗ ଓ ବାଂଲାଦେଶ ଉପକୂଳରେ ଲ୍ୟାଣ୍ଡଫୋଲ ହେବ । ମନ୍ତ୍ରଣାଳୟ ପଶ୍ଚିମବଙ୍ଗ ଓ ଓଡିଶା ସରକାରଙ୍କୁ ଦିଆଯାଇଥିବା ଏକ ପରାମର୍ଶରେ କହିଛି ଯେ, 'ଉମ୍ଫୁନ୍' ବର୍ତ୍ତମାନ ଦକ୍ଷିଣ ବଙ୍ଗୋପସାଗରର ମଧ୍ୟ ଭାଗରେ ଏବଂ ବଙ୍ଗଳାର ମଧ୍ୟଭାଗରେ ଅବସ୍ଥିତ । ଗତ ୬ ଘଣ୍ଟାରେ ଧରି ଏହା ଘଣ୍ଟା ପ୍ରତି ୧୩ କିଲୋମିଟର ବେଗରେ ଉତ୍ତର ଦିଗକୁ ଗତି କରୁଛି ।

ଅଧିକାରୀ କହିଛନ୍ତି ଯେ, ସୋମବାର ସନ୍ଧ୍ୟା ସୁଦ୍ଧା  ଏହି ବାତ୍ୟା ମହାବାତ୍ୟାର ରୂପ ନେଇପାରେ । ଏହା ବୋଧହୁଏ ଉତ୍ତର-ପଶ୍ଚିମ ବଙ୍ଗୋପସାଗର ନିକଟରେ ଉତ୍ତର-ଉତ୍ତରପୂର୍ବ ଦିଗକୁ ବଢ଼ିବ ଓ ମେ ୨୦ ଅପରାହ୍ନରେ କିମ୍ବା ସନ୍ଧ୍ୟାରେ ବାଂଲାଦେଶର ହାତିଆ ଦ୍ୱୀପ ଓ ପଶ୍ଚିମବଙ୍ଗର ଦୀଘା ଲ୍ୟାଣ୍ଡଫୋଲ କରିବ । ବାଂଲାଦେଶ ଉପକୂଳ ଦେଇ ଯିବାର ସମ୍ଭାବନା ରହିଛି । ଏହି ସମୟ ମଧ୍ୟରେ ପବନ ୧୫୫-୧୬୫ କିଲୋମିଟର ବେଗରେ ଗତି କରିବ । ଯାହା ଯେକୌଣସି ସମୟରେ ୧୮୫ କିଲୋମିଟର ବେଗ ଧରିପାରେ ।