ପ୍ଲାଜମା ଥେରାପିରୁ ସୁସ୍ଥ ହେଲେ କୋରୋନା ରୋଗୀ !

ନୂଆଦିଲ୍ଲୀ: ଦିଲ୍ଲୀର ମ୍ୟାକ୍ସ ସାକେତ ହସ୍ପିଟାଲରେ ଦେଶରେ ପ୍ରଥମ ଥର ପାଇଁ ପ୍ଲାଜମା ଥେରାପି ଦିଆଯାଇଥିବା କୋରୋନା ସଂକ୍ରମିତ ବ୍ୟକ୍ତି ବର୍ତ୍ତମାନ ସୁସ୍ଥ ହୋଇ ହସ୍ପିଟାଲରୁ ଡିସଚାର୍ଜ ହୋଇଛନ୍ତି । ରବିବାର ମ୍ୟାକ୍ସ ହସ୍ପିଟାଲ ଏହି ସୂଚନା ଦେଇଛି । ୪୯ ବର୍ଷୀୟ କୋରୋନା ସଂକ୍ରମିତ ବ୍ୟକ୍ତିଙ୍କୁ ଏପ୍ରିଲ ୪ରେ ମ୍ୟାକ୍ସ ସାକେତ ହସ୍ପିଟାଲରେ ଭର୍ତ୍ତି କରାଯାଇଥିଲା । ତାଙ୍କ ଅବସ୍ଥା ଖରାପ ହେବା ପରେ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା । ଏପ୍ରିଲ ୧୪ରେ ହସ୍ପିଟାଲ ପ୍ରଶାସନ ତାଙ୍କୁ ପ୍ଲାଜମା ଥେରାପି ଦେଇଥିଲା । ଯାହା ପରେ ପରବର୍ତ୍ତୀ ସପ୍ତାହରେ ରୋଗୀର ଅବସ୍ଥା ଯଥେଷ୍ଟ ଉନ୍ନତ ଆସିଥିଲା ।

ମ୍ୟାକ୍ସ ହସ୍ପିଟାଲ ଏକ ବୟାନରେ କହିଛି ଯେ, ଦେଶରେ ପ୍ରଥମ ଥର ପାଇଁ କୋରୋନା ସଂକ୍ରମିତ ବ୍ୟକ୍ତିଙ୍କୁ ପ୍ଲାଜମା ଥେରାପି ଦିଆଯାଇଥିଲା । ଏହା ସଫଳ ହୋଇଥିଲା । ମ୍ୟାକ୍ସର ଗ୍ରୁପ୍ ମେଡିକାଲ୍ ନିର୍ଦ୍ଦେଶକ ସନ୍ଦୀପ ବୁଦ୍ଧିରାଜା କହିଛନ୍ତି, "ଏହି ଘଟଣାରେ ଥେରାପି ଭଲ କାମ କରିଥିବାରୁ ଆମେ ବହୁତ ଖୁସି । ପ୍ଲାଜମା ଥେରାପି ମ୍ୟାଜିକ୍ ବଟିକା ନୁହେଁ । ଚିକିତ୍ସା ସମୟରେ ଅନ୍ୟ ମାନକ ଚିକିତ୍ସା ପ୍ରୋଟୋକଲ୍ ମଧ୍ୟ ଗ୍ରହଣ କରାଯାଇଥିଲା । ଆମେ ଏହା କହିପାରିବା ଯେ ପ୍ଲାଜମା ଥେରାପି ତ୍ୱରାନ୍ୱିତ କରିବା ପାଇଁ କାମ କରିଛି । ଯାହା ଶୀଘ୍ର ରୋଗୀର ଅବସ୍ଥାର ସୁଧାର ଆଣିଥିଲା । ରୋଗୀର ସୁସ୍ଥ ହେବା ପାଇଁ ଆମେ କେବଳ ୧୦୦% ଶ୍ରେୟ ପ୍ଲାଜମା ଥେରାପିକୁ ଦେଇପାରିବା ନାହିଁ । କାରଣ ଏଥିରେ ଅନ୍ୟାନ୍ୟ କାରଣ ଅଛି ।"

ଏଠାରେ କହି ରଖୁଛୁ ଯେ, କୋରୋନା ସଂକ୍ରମିତ ପିତା ଏବଂ ପୁଅଙ୍କୁ ମ୍ୟାକ୍ସ ହସ୍ପିଟାଲରେ ଭର୍ତ୍ତି କରାଯାଇଥିଲା । ଅବସ୍ଥା ଖରାପ ହେବା ପରେ ପରିବାର ପ୍ଲାଜମା ଥେରାପି ପାଇଁ ଅନୁରୋଧ କରିଥିଲେ । ପରିବାର ମଧ୍ୟ ଏକ ପ୍ଲାଜମା ଦାତା ପାଇଥିଲା । ପ୍ଲାଜମା ଦେବା ସତ୍ତ୍ୱେ ବାପାଙ୍କୁ ରକ୍ଷା କରାଯାଇ ପାରିଲା ନାହିଁ, କିନ୍ତୁ ପ୍ଲାଜମା ଥେରାପି ପୁଅ ଉପରେ ଭଲ କାମ କଲା ଏବଂ ଏବେ ତାଙ୍କୁ ଡିସଚାର୍ଜ କରାଯାଇଛି ।