କୋରୋନା ଟେଷ୍ଟରେ ହେଉଛି ବିଲମ୍ୱ, ଘରୋଇ ଲ୍ୟାବକୁ ନମୁନା ପରୀକ୍ଷା ପାଇଁ ପଠାଇବେ କେଜ୍ରିୱାଲ ସରକାର

ନୂଆଦିଲ୍ଲୀ: ଦିଲ୍ଲୀର କାପସହେଡ଼ା ଅଞ୍ଚଳରେ ଗୋଟିଏ ବିଲ୍ଡିଂରୁ  ୪୧ ଜଣଙ୍କ କୋରୋନା ରିପୋର୍ଟ ପଜିଟିଭ ଆସିଛି ବୋଲି ଜଣାପଡିଛି । ସେମାନଙ୍କ ପରୀକ୍ଷା ରିପୋର୍ଟ ଆସିବାରେ ବହୁତ ବିଳମ୍ବ ହୋଇଛି। ଏହା ପରେ ରବିବାର ଦିଲ୍ଲୀ ସରକାର ଏକ ବଡ ପଦକ୍ଷେପ ନେଇଛନ୍ତି । ବିଳମ୍ବିତ ପରୀକ୍ଷା ରିପୋର୍ଟ ପରେ ଦିଲ୍ଲୀ ସରକାର ନିଷ୍ପତ୍ତି ନେଇଛନ୍ତି ଯେ, ଏଣିକି ଦିଲ୍ଲୀର ସମସ୍ତ ଘରୋଇ ଲ୍ୟାବକୁ ନମୁନା ପଠାଯିବ । ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ କହିଛନ୍ତି ଯେ, ପରୀକ୍ଷା ରିପୋର୍ଟ ପାଇଁ ୨୪ ରୁ ୩୬ ଘଣ୍ଟା ସମୟ ସୀମା ସ୍ଥିର କରାଯାଇଛି ।

ମଇ ୨ରେ କାପସହେଡ଼ାର ଗୋଟିଏ ବିଲ୍ଡିଂରେ ୪୧ ଜଣ ବ୍ୟକ୍ତି କୋରୋନା ପଜିଟିଭ୍ ଥିବା ଦେଖିବାକୁ ମିଳିଥିଲା । ଏପ୍ରିଲ ୧୮ରେ ଗୋଟିଏ କୋରୋନା ମାମଲାର ପୃଷ୍ଟି ହୋଇଥିଲା । ଜନବହୁଳ ଅଞ୍ଚଳକୁ ଦୃଷ୍ଟିରେ ରଖି ପ୍ରଶାସନ ଏପ୍ରିଲ ୧୯ରେ ଏହି ଅଞ୍ଚଳକୁ ସିଲ୍ କରିବାକୁ ନିର୍ଦ୍ଦେଶ ଦେଇଥିଲା । ଏହା ପରେ ଏଠାରୁ ୯୫ ଜଣଙ୍କ ନମୁନା ଏପ୍ରିଲ ୨୦ରେ ଏବଂ  ଏପ୍ରିଲ ୨୧ରେ ୮୦ ଜଣଙ୍କ ନମୁନା ନିଆଯାଇଥିଲା । ନମୁନାର ଯାଞ୍ଚ ପାଇଁ NIB,ନୋଏଡାକୁ ପଠାଯାଇଥିଲା ।

ମୋଟରେ ୧୭୫ ଜଣଙ୍କ ନମୁନା ମଧ୍ୟରୁ ୬୭ ଜଣଙ୍କ ନମୁନା ରିପୋର୍ଟ ଶନିବାର ପର୍ଯ୍ୟନ୍ତ ଆସିଥିଲା । ଏଥିରୁ ୪୧ ଜଣଙ୍କୁ କୋରୋନା ସଂକ୍ରମିତ ହୋଇଥିବା ଜଣାପଡିଛି । ୧୭୫ ଜଣଙ୍କ ନମୁନା ପଠାଯାଇଥିଲା । ସେଥିମଧ୍ୟରୁ ୬୭ ଜଣ ରିପୋର୍ଟ ମିଳିଥିଲା ।  ଅର୍ଥାତ୍ ୧୦-୧୧ ଦିନ ମଧ୍ୟରେ କେବଳ ଏତିକି ରିପୋର୍ଟ ଆସିଛି ।

ଏହି ପରିପ୍ରେକ୍ଷୀରେ ଦକ୍ଷିଣ ପଶ୍ଚିମ ଦିଲ୍ଲୀ ପ୍ରଶାସନ କହିଛି ଯେ, ଏହି ନମୁନାଗୁଡିକ ୧୫ ଦିନ ପୂର୍ବରୁ ନିଆଯାଇଥିଲା । ରିପୋର୍ଟ ପାଇବାରେ ବିଳମ୍ବ ହେବାର ଦୁଇଟି କାରଣ ଅଛି । ପ୍ରଥମ-ଦିଲ୍ଲୀ ନୋଏଡା ସୀମା ବନ୍ଦ ହେତୁ ଏହି ସମସ୍ୟା ଦେଖାଦେଇଛି । ଦ୍ୱିତୀୟରେ ନୋଏଡା, ଏନଆଇଏରେ ଅଧିକ ମାମଲା ରହିଛି । ଯେଉଁ କାରଣରୁ ରିପୋର୍ଟ ଆସିବାରେ ବିଳମ୍ୱ ହେଉଛି । ତେଣୁ ଏବେ ପ୍ରଶାସନ ଆସନ୍ତାକାଲି ସମସ୍ତ ପଜିଟିଭ ବ୍ୟକ୍ତିଙ୍କ ପୁନଃ ପରୀକ୍ଷା କରିବ ।